ខេត្តកំពត៖ ម្ចាស់អគារមួយកន្លែងដែលមានទីតាំងស្ថិតនៅភូមិអូរតូច សង្កាត់អណ្តូងខ្មែរ ស្រុកទឹកឈូ ខេត្តកំពត បានរងការចោទប្រកាន់ថាបានគេចវេសមិនព្រមទូទាត់ថ្លៃធ្វើគ្រឿងសង្ហារឹមឲ្យអ្នកម៉ៅការសាងសង់ ដែលនៅសល់ប្រមាណជាជាង១ម៉ឺនដុល្លារ ទោះមានកិច្ចសន្យាត្រឹមត្រូវយ៉ាងណាក៏ដោយនោះ ។
បើតាមការលើកឡើងរបស់តំណាងក្រុមហ៊ុនអាយឌីអេហ្វ ដេគ័រ និងគ្រឿងសង្ហារឹម បានលើកឡើងថា ក្រុមហ៊ុនរបស់លោកបានទទួលធ្វើគ្រឿងសង្ហារឹមឲ្យម្ចាស់អគារមួយកន្លែងដែលមានឈ្មោះ ចាន់ ប៊ុនលាង រស់នៅភូមិកំពង់បាយ ឃុំកំពង់បាយ ស្រុកទឹកឈូ ខេត្តកំពត ដែលក្នុងនោះក៏មានធ្វើកិច្ចសន្យាត្រឹមត្រូវផងដែរ ក្នុងតម្លៃ៥០១៥៨ ដុល្លារអាមេរិក ។
តំណាងរូបនេះបានបញ្ជាក់ឲ្យដឹងទៀតថាការធ្វើគ្រឿងសង្ហារឹមក្នុងអគារខាងលើនេះក៏បានរួចរាល់ជាស្ថាពរ ប៉ុន្តែការទូទាត់ថ្លៃម៉ៅការធ្វើគឺម្ចាស់អគារនេះមិនព្រមប្រគល់លុយឲ្យគ្រប់ចំនួននោះទេ គឺនៅសល់ប្រមាណជាង១ម៉ឺនដុល្លារ ហើយម្ចាស់អគារខាងលើដែលមានឈ្មោះ ចាន់ ប៊ុនលាង មិនព្រមទូទាត់ប្រាក់នៅជំពាក់នោះទេ ថែមទាំងបានគេចវេសឆ្លើយដោះសារយ៉ាងនេះយ៉ាងនោះក្នុងចេតនា មិនចង់ទូទាត់លុយដែលនៅសេសសល់ឲ្យគ្រប់ចំនួន ទោះបីកន្លងមកមានការណាត់ជួបជជែកគ្នាជាច្រើនលើកច្រើនសារយ៉ាងណាក៏ដោយ ពោលគឺលោក ចាន់ ប៊ុនលាង តែងតែរកឡេះឥតឈប់ឈរ ម្តងថាថ្ងៃនេះម្តងថាថ្ងៃនោះ ។
ជុំវិញការចោទប្រកាន់ខាងលើនេះ លោក ចាន់ ប៊ុនលាង ដែលជាម្ចាស់អគារខាងលើនេះបានប្រាប់តាមទូរស័ព្ទថារឿងនេះលោកមិនបានគេចវេសទៅណាទេ ប៉ុន្តែលោកចង់ឲ្យតំណាងក្រុមហ៊ុនម៉ៅការធ្វើគ្រឿងសង្ហារឹម រួមនិងក្រុមការងាររបស់គាត់ចេញមុខព្រមគ្នា ដើម្បីទៅជួបចចាររឿងលុយកាក់ដែលនៅសេសសល់ចំនួន១០៥០០ដុល្លារនោះសិន។
ប៉ុន្តែបើតាមតំណាងក្រុមហ៊ុនម៉ៅការធ្វើគ្រឿងសង្ហារឹម បានបញ្ជាក់ថានៅក្នុងកិច្ចសន្យាគឺបានធ្វើឡើងរវាងរូបលោក ជាតំណាងក្រុមហ៊ុន ដែលហៅថាភាគី ខ និងលោក ចាន់ ប៊ុនលាង ជាម្ចាស់អគារ ដែលហៅថាភាគី ក ដូច្នេះការទូទាត់នេះគឺមិនចំាបាច់អីឲ្យក្រុមការងារពីរបីនាក់ផ្សេងទៀតចូលរួមនោះទេ បានន័យថាតំណាងម្ចាស់ក្រុមហ៊ុនជាអ្នកទទួលខុសត្រូវក្នុងការទូទាត់លុយ ហើយត្រង់ម្ចាស់អាគារតម្រូវឲ្យទៅទាំងអស់គ្នានោះគឺគ្រាន់តែជាឡេះមិនចង់សងលុយឲ្យមកក្រុមហ៊ុនតែប៉ុណ្ណោះ ៕
ដោយ៖ សត្យា
