ខេត្តសៀមរាប៖ នៅព្រឹកថ្ងៃទី៣០ ខែ កញ្ញា ឆ្នាំ២០២៥ នេះព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក អាជ្ញាធរក្រុងសៀមរាប រួមនិងរដ្ឋបាលសង្កាត់គោកចក បាននិមន្តនិងអញ្ជើញនាំយកគ្រឿងឧបភោគបរិភោគនិងសម្ភារៈប្រើប្រាស់ចែកជូនដល់បងប្អូនប្រជាការពារចំនួន៤៣នាក់នៅក្នុងសង្កាត់គោកចកដែលបានចំណាយកម្លាំងកាយដើម្បីផលប្រយោជន៍ចូលរួមកាយលូស្តារប្រឡាយនិងប្រមូលសំរាមដើម្បីរំដោះជំនន់ទឹកភ្លៀងក្នុងមូលដ្ឋានសង្កាត់គោចកក្រុងសៀមរាប ។
ក្នុងនាមរដ្ឋបាលក្រុង លោក ហាយ យង់ អភិបាលរងក្រុងសៀមរាបបានមានប្រសាសន៍ថ្លែងនូវការកោតសរសើរនិងដឹងគុណយ៉ាងស្មោះអស់ពីចិត្តចំពោះកិច្ចខិតខំប្រឹងប្រែងរបស់បងប្អូនប្រជាការពារ ដែលបានបង្ហាញនូវស្មារតីទទួលខុសត្រូវខ្ពស់ ក្នុងការចូលរួមកសាង និងការពារមូលដ្ឋាន។
លោក ហាយ យង់ បានបន្តថា កិច្ចការកាយលូ ស្តារប្រឡាយ និងប្រមូលសំរាម ដែលបានធ្វើកន្លងមក គឺជាកិច្ចការមួយដ៏សំខាន់ដែលបានចូលរួមចំណែកដោយផ្ទាល់ក្នុងការកាត់បន្ថយហានិភ័យនៃគ្រោះទឹកជំនន់ និងរក្សាបាននូវ សោភ័ណភាពអនាម័យ ក្នុងមូលដ្ឋានរបស់យើង។
ព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក បានមានថេរដីកាថាការចែកជូន គ្រឿងឧបភោគបរិភោគ និងសម្ភារៈប្រើប្រាស់ នៅពេលនេះ គឺជាការបង្ហាញពី ការយកចិត្តទុកដាក់និងការដឹងគុណរបស់ព្រះសង្ឃនិងអាជ្ញាធរមូលដ្ឋាន ជូនដល់កម្លាំងបងប្អូនប្រជាការពារដែលជាសសរស្តម្ភដ៏សំខាន់ ដែលបានលះបង់ទាំង កម្លាំងកាយ កម្លាំងចិត្ត និងពេលវេលា ដើម្បីចូលរួមធ្វើការកាយលូ ស្តារប្រឡាយរំដោះទឹក និងប្រមូលសំរាម ក្នុងពេលមានទឹកជំនន់ក្នុងភូមិសាស្ត្រសង្កាត់គោកចក ហើយ ការងារនេះគឺបានជួយកាត់បន្ថយការជន់លិច និងផលប៉ះពាល់ដល់សហគមន៍យើងទាំង មូល ហើយគ្មានការចូលរួមពីបងប្អូនប្រជាការពារយើងទេទេ ការងាររំដោះទឹកនឹងជួបការលំបាកខ្លាំងដែលទង្វើនេះគឺជាគំរូវីរភាពដ៏ល្អមួយដែលបង្ហាញពី ស្មារតីស្នេហាជាតិ និងសាមគ្គីភាព ដ៏រឹងមាំនៅក្នុងមូលដ្ឋានយើងផងដែរ ។
ព្រះតេជគុណ ហែម គឹមសាន មានថេរដីកាបន្តថាការផ្តល់ជូនអំណោយគឺមិនច្រើនប៉ុន្មានទេ តែវាគឺជាទឹកចិត្តនៃការដឹងគុណតិចតួចពីព្រះសង្ឃ និងការយកចិត្តទុកដាក់ របស់អាជ្ញាធរមូលដ្ឋាន ដើម្បីលើកទឹកចិត្តដល់ការលះបង់របស់បងប្អូនទាំងអស់ដែលបានធ្វើដើម្បីសហគមន៍របស់យើង។
ព្រះគ្រូចៅអធិការវត្តប្រាសាទគោកចកក៏បានមានថេរដីកាសូមអំពាវនាវដល់បងប្អូនប្រជាការពារទាំងអស់ សូមបន្ត រក្សាកិច្ចសហការល្អ ជាមួយអាជ្ញាធរ និងប្រជាពលរដ្ឋដទៃទៀត ដើម្បី ពង្រឹងសាមគ្គីភាព និងបន្តធ្វើការងារសង្គមដ៏មានតម្លៃនេះនាពេលអនាគត ហើយព្រះអង្គរួមទាំងអាជ្ញាធរនឹងបន្តគាំទ្រ និងលើកទឹកចិត្តជានិច្ច ហើយបន្តចូលរួមថែរក្សា អនាម័យបរិស្ថាន ជុំវិញលំនៅឋាន និងក្នុងភូមិឱ្យបានស្អាតល្អ ក្រោយពេលទឹកស្រក ដើម្បីបង្ការជំងឺឆ្លងផ្សេងៗផងដែរ ៕
ដោយ៖ ពន្លឺ
