ខេត្តត្បូងឃ្មុំ៖ នៅព្រឹកថ្ងៃទី២៦ ខែកញ្ញា ឆ្នាំ២០២៥ កម្លាំង គយចល័ត ដឹកនាំផ្ទាល់ដោយលោក ព្រាប គារ៉ាត អនុប្រធាននាយកដ្ឋានបង្ការ និងបង្រ្កាបបទល្មើស សហការជាមួយសមត្ថកិច្ចចម្រុះ ក្រោមការសម្របសម្រួលពីលោក ងិន ពេជ ព្រះរាជអាជ្ញាអមសាលាដំបូងខេត្តត្បូងឃ្មុំ បានចុះបង្ក្រាបទីតាំងលក់ម៉ូតូគេចពន្ធចំនួន ៩កន្លែង នៅក្នុងភូមិសាស្ត្រស្រុកមេមត់ ខេត្តត្បូងឃ្មុំ ដោយបានរកឃើញម៉ូតូគ្មានពន្ធនាំចូលចំនួន ១៥១គ្រឿង។
មន្ត្រីគយដែលចុះប្រតិបត្តិការផ្ទាល់ មុននឹងឈានទៅដល់ការព័ទ្ធចាប់នៅទីតាំងលក់ម៉ូតូខាងលើ អង្គភាពគយ បានស្រាវជ្រាវតាមរយៈការឃាត់រថយន្តរបស់ក្រុមហ៊ុន «វីរៈ ប៊ុនថាំ» ដែលបានលួចដឹកម៉ូតូគេចពន្ធចេញពីទីតាំងលក់ម៉ូតូខាងលើ ហើយយកមកភ្នំពេញ និងដែលត្រូវបានកម្លាំងគយបង្ក្រាបកាលពីពេលកន្លងទៅ។
មន្រ្តីគយបានបញ្ជាក់ទៀតថា ក្រុមអ្នករកស៊ី ក៏បានលួចដឹកម៉ូតូគេចពន្ធតាមរយៈរថយន្តដឹកអ្នកដំណើរ ហើយត្រូវបានមន្ត្រី គយឃាត់ខ្លួនផងដែរ។ ពេលសួរនាំអ្នកបើកបរ, គាត់បានឆ្លើយសារភាពថា ខ្លួនបានដឹកចេញពីទីតាំងលក់ម៉ូតូខាងលើពិតប្រាកដមែន៕
