ខេត្តបន្ទាយមានជ័យ ៖ តាមប្រភពពីមន្រ្តីនៅច្រកព្រំដែនបឹងត្រកួនដែលស្ថិតនៅក្នុងឃុំគោករមៀត ស្រុកថ្មពួក ខេត្តបន្ទាយមានជ័យបានឱ្យដឹង ថាលោក ញឹក ប៊ុនលេខ ប្រធានការិយាល័យគយនិងរដ្ឋាករ បឹងត្រកួននេះគឺលោកមេគយស៊ីលុយឆៅៗតែម្តងអត់មានស្លាក់ អីតិចទេហើយលុយ លោកមេគយរូបនេះស៊ីដោយរលូននេះគឺបានពីការប្រមូលលុយ តាមរយៈការឃុបឃិតបើកដៃឲ្យឈ្មួញនាំចូល ទំនិញគេចពន្ធ ទំនិញបង់ពន្ធ មិនគ្រប់និងទំនិញខុសច្បាប់យ៉ាងពេញបន្ទុកតែម្តង។ពិសេសទំនិញម៉ូតូអត់ពន្ធនិងគ្រឿងបន្លាស់រួមនិងបរិក្ខាផ្សេងៗផងដែរ។
ក្រុមមន្ត្រីខាងលើនេះ បានឲ្យដឹងបន្ថែមទៀតថាលោក ញឹក ប៊ុនលេខ ប្រធានការិយាល័យគយនិងរដ្ឋាករ ច្រកបឹងត្រកួន បានបើកឲ្យឈ្មួញ នាំចូល ម៉ូតូស៊េរីទំនើបៗគេចពន្ធតាមច្រកនេះយ៉ាងរលូនដោយមានការឃុបឃិតជាមួយបក្ខពួកស្និទ្ធៗជាមួយគាត់និងជាអ្នកប្រមូលលុយឱ្យលោក ញឹក ប៊ុនលេខ ដាក់ហោប៉ៅធ្វើមានធ្វើបានផ្ទាល់ខ្លួន។
ប្រភពខាងលើ បានដឹងបន្ថែមថា មួយរយៈចុងក្រោយនេះលោក ញឹក ប៊ុនលេខ ប្រធានការិយាល័យគយ និងរដ្ឋាករបឹងត្រកួន បានឃុបឃិតឲ្យឈ្មួញនាំចូលម៉ូតូទំនើបៗគេចពន្ធ កាន់តែច្រើនឡើងៗដោយមិនខ្វល់ពីការរិះគន់ អ្វីទាំងអស់។
អ្នកស៊ីឈ្នួលបើកបរម៉ូតូពីទឹកដីថៃចូលទឹកដី ខ្មែរទទួលបានលុយ ៥០០បាត(លុយថៃ) សម្រាប់ម៉ូតូមួយគ្រឿង ដោយពួកគេបើកចូល តាមច្រកបឹងត្រកួន ឆ្ពោះទៅកាន់ក្នុងស្រុកថ្មពួក និងចូលទៅក្រុងសិរី សោភ័ណ ខេត្តបន្ទាយមានជ័យ ដើម្បីលក់ចែកចាយ តាមហាងលក់ម៉ូតូ។ បើតាមក្រុមឈ្មួញដែលនាំចូលម៉ូតូ គេចពន្ធតាមច្រកតំបន់បឹងត្រកួន បានបានដឹងដែរថា ពួកគេបង់លុយឲ្យលោក ញឹក ប៊ុនលេខ ប្រធានការិយាល័យគយនិង រដ្ឋាករ បឹងត្រកួន និងសមត្ថកិច្ចពាក់ព័ន្ធទើបអាចនាំម៉ូតូគេចពន្ធ និងទំនិញផ្សេងៗទៀតចូលមកបាន ដោយមិនបាច់បង់ចូលជាពន្ធអារកគយនោះទេ គឺបង់ចូលហោប៉ៅពួកគាត់ជាការស្រេចតែម្តង។
សមត្ថកិច្ចនៃស្ថាប័នផ្សេងៗ ក៏ដូចប្រជាពលរដ្ឋដែរ បានសំណូមពរដល់លោក គុណ ញឹម អគ្គនាយកនៃអគ្គនាយកដ្ឋាន គយនិងរដ្ឋាករកម្ពុជា គួរ ចាត់វិធានការ ទប់ស្កាត់អំពើពុករលួយរបស់លោក ញឹក ប៊ុនលេខ ប្រធានការិយាល័យគយ និងរដ្ឋាករបឹងត្រកួន និងបក្ខពួកជាបន្ទាន់ផង បើទុក បណ្តោយបែបនេះចំណូលពន្ធគយចូលរដ្ឋខាតបង់ក្នុងមួយខែៗរាប់សិបម៉ឺនដុល្លារហើយថវិកានោះត្រូវធ្លាក់ចូលប៉ៅលោក ញឹក ប៊ុនលេខ និងបក្ខពួក ជាក់ជាពុំខាន។
រឿងរ៉ាវពាក់ព័ន្ធករណីនេះគេហទំព័រ រស្មីក្រុងយើង (www.rskynews.com) មិនទាន់អាចទាក់ទងសុំការបំភ្លឺពីលោក ញឹក ប៊ុនលេខ ប្រធានការិយា ល័យ គយនិងរដ្ឋាករបឹងត្រកួន បាននៅឡើយទេព្រោះCallទៅមិនលើក៕
ដោយ ៖ សិរីបុត្រ
