ខេត្តសៀមរាប៖ នារសៀលថ្ងៃទី ១១ ខែ កញ្ញា ឆ្នាំ២០២៥ នេះក្រុមការងារគណៈកម្មការនៃវិទ្យាស្ថានស្រាវជ្រាវនិងអភិវឌ្ឍន៍ជលផលទឹកសាបនៃរដ្ឋបាលជលផលរបស់ ក្រសួងកសិកម្មរុក្ខាប្រមាញ់ និងនេសាទ រួមជាមួយអាជ្ញាធរស្រុកក្រឡាញ់និងមន្រ្តីជំនាញមន្ទីរកសិកម្មរុក្ខាប្រមាញ់និងនេសាទខេត្តសៀមរាបចុះធ្វើការត្រួតពិនិត្យចាប់កូនត្រីដើម្បីធ្វើការសិក្សាស្រាវជ្រាវអំពីប្រភេទត្រី គឺសិក្សារទៅលើប្រភេទត្រី អម្បូរត្រី ថាតើមានប៉ុន្មានប្រភេទដែលបានឆ្លងកាត់ជណ្ដើរត្រីនៃការបំលាស់ទីរបស់ត្រីតាមរយៈជណ្តើរត្រីទំនប់ស្លែងដែលស្ថិតនៅក្នុងឃុំស្រណាលស្រុកក្រឡាញ់ខេត្តសៀមរាប ។
លោក តុប ចាន់អូន អនុប្រធានវិទ្យាស្ថានស្រាវជ្រាវ និងអភិវឌ្ឍន៍ទឹកសាបនៃរដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ឲ្យដឹងថា នៅក្នុងរយៈពេល២ឆ្នាំដែលបានកសាងជណ្តើរត្រីទំនប់ស្លែងមកគឺមានត្រីប្រមាណជាង១០០ប្រភេទដែលបានធ្វើការបំលាស់ទីតាមជណ្តើរត្រីទៅកាន់តំបន់ផ្សេងៗ។
លោក តុប ចាន់អូន បានបន្តថា ជណ្តើរត្រី គឺសាងសង់ឡើងនៅកន្លែងទំនប់ ឬប្រព័ន្ធធារាសាស្ត្រ ដើម្បីជួយសម្រួលដល់ការធ្វើដំណើររបស់ត្រីឆ្លងកាត់ឧបសគ្គហើយ ជណ្តើរត្រីមានសារៈសំខាន់ និងផ្តល់អត្ថប្រយោជន៍ជាច្រើនដូចជា៖ ធ្វើជា “ផ្លូវ” សម្រាប់ត្រីហែលឡើងចុះបានដោយសេរី.ជួយដល់ការផ្លាស់ទីរបស់ត្រីជាច្រើនប្រភេទដែលត្រូវផ្លាស់ទីទៅកាន់តំបន់ផ្សេងៗគ្នា ដើម្បីស្វែងរកអាហារ កន្លែងពងកូន ឬជម្រកថ្មី ហើយអភិរក្សធនធានជលផល ដោយសារជណ្តើរត្រីជួយឲ្យត្រីអាចបន្តវដ្តជីវិតរបស់វាបាន វាក៏ជួយការពារ និងរក្សាបាននូវចំនួនត្រីនៅក្នុងធម្មជាតិ ជាពិសេសប្រភេទត្រីដែលធ្វើដំណើរផ្លាស់ទីតាមរដូវកាល ព្រមទាំងមានសារៈសំខាន់ណាស់ក្នុងការការពារកុំឲ្យប្រភេទត្រីក្នុងស្រុកមានការថយចុះផងដែរ។
ក្នុងឱកាសនោះដែរ លោក សុខ ណារ៉េត អភិបាលស្រុកក្រឡាញ់បានមានប្រសាសន៍ថា ជណ្តើរត្រីទំនប់ស្លែងនេះគឺបានផ្តល់សារៈសំខាន់ខ្លាំងណាស់សម្រាប់ឱ្យត្រីគ្រប់ប្រភេទអាចឡើងពងកូន នៅតាមតំបន់ផ្សេងៗបាន ហើយនៅពេលត្រីបន្តពូជបានច្រើន ត្រីនឹងមានចំនួនកើនឡើងវិញក្នុងធម្មជាតិដូច្នេះ ការកើនឡើងនៃចំនួនត្រី គឺមានន័យថាប្រជាជនដែលប្រកបរបរនេសាទអាចចាប់បានត្រីកាន់តែច្រើន ហើយពួកគាត់ក៏អាចលក់បានប្រាក់ចំណូលកាន់តែច្រើនផងដែរ។
លោក សុខ ណារ៉េតបានបន្ថែមថាជណ្ដើរត្រីមិនត្រឹមតែជាការវិនិយោគលើហេដ្ឋារចនាសម្ព័ន្ធប៉ុណ្ណោះទេ តែវាជាការវិនិយោគដ៏មានសារៈសំខាន់ក្នុងការលើកកម្ពស់ជីវភាពរបស់បងប្អូនប្រជាពលរដ្ឋ និងថែរក្សាធនធានជលផលធម្មជាតិសម្រាប់មនុស្សជំនាន់ក្រោយ ហើយនៅពេលត្រីក្នុងធម្មជាតិមានច្រើន ប្រជាពលរដ្ឋមិនចាំបាច់ចំណាយប្រាក់ច្រើនដើម្បីទិញត្រីយកមកហូបនោះទេ។ក្នុងនាមអាជ្ញាធរស្រុកក្រឡាញ់ លោកអភិបាលស្រុកក៍បានមានប្រសាសន៍ថ្លែងអំណរគុណដល់រាជរដ្ឋាភិបាល ក្រសួងស្ថាប័នពាក់ព័ន្ធ និងអង្គការដៃគូអភិវឌ្ឍន៍នានា ដែលបានជួយទំនុកបម្រុងការអភិរក្សធនធានធម្មជាតិ ជាពិសេសធនធានជលផលនេះ ដែលធ្វើ ឱ្យមូលដ្ឋានរបស់លោករឹតតែមានធនធានត្រី សម្រាប់ផ្តល់នូវអាហារបរិភោគដល់ប្រជាជននៅក្នុងមូលដ្ឋាន ហើយលោកសង្ឃឹមថា តាម រយៈជណ្តើរត្រីនេះ នឹងធ្វើឱ្យធនធានជលផលនៅក្នុងមូលដ្ឋានឃុំស្រណាលនឹងកើនឡើង ជាពិសេសប្រភេទត្រីត្រូវដែលជិតផុតពូជវាអាចនឹងត្រូវបានកើនឡើងវិញ៕
ដោយ៖ ពន្លឺ
