ឯកឧត្តម ខូយ រីដា អញ្ជើញជួបសំណេះសំណាល និងផ្តល់ក្បាលដីឡូតិ៍ សម្រាប់បងប្អូនប្រជាពលរដ្ឋ ដែលរស់នៅតាមបណ្តោយមាត់ស្ទឹង ក្នុងក្រុងពោធិ៍សាត់ ចំនួន៩៨គ្រួសារ

ខេត្តពោធិ៍សាត់៖ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ នាព្រឹកថ្ងៃសុក្រ ទី០៥ ខែកញ្ញា ឆ្នាំ២០២៥ បានអញ្ជើញជួបសំណេះសំណាល និងផ្តល់ក្បាលដីឡូតិ៍ សម្រាប់បងប្អូនប្រជាពលរដ្ឋ ដែលរស់នៅតាមបណ្តោយមាត់ស្ទឹង ក្នុងក្រុងពោធិ៍សាត់ ចំនួន៩៨គ្រួសារ ដែលទទួលរងផលប៉ះពាល់ ពីគម្រោងអភិវឌ្ឍន៍ច្រាំងស្ទឹងពោធិ៍សាត់ សម្រាប់ជំហានទី៣ ទីតាំងដីស្ថិតនៅភូមិបឹងយា ឃុំវាល ស្រុកកណ្តៀង ខេត្តពោធិ៍សាត់។

ឯកឧត្តម ខូយ រីដា បានថ្លែងអំណរគុណដល់បងប្អូនប្រជាពលរដ្ឋ ដែលបានចូលរួមសហការដោយរីករាយ ដើម្បីអភិវឌ្ឍន៍ច្រាំងស្ទឹងក្រុងពោធិ៍សាត់ ឱ្យមានភាពស្រស់បំព្រង និងប្រកបដោយពហុប្រយោជន៍។

សូមបញ្ជាក់ថា បងប្អូនប្រជាពលរដ្ឋ ចំនួន៩៨គ្រួសារ ដែលរស់នៅតាមបណ្តោយមាត់ស្ទឹង ក្នុងក្រុងពោធិ៍សាត់ បានចាប់ឆ្នោត ទទួលយកដីឡូតិ៍លំនៅឋានថ្មី ដែលមានប្លង់កម្មសិទ្ធិស្របច្បាប់ត្រឹមត្រូវ ជាការដោះស្រាយគោលនយោបាយឈ្នះឈ្នះ ដោយក្នុងមួយគ្រួសារ ទទួលបានដីមួយឡូតិ៍ ទំហំ៥x២០ម៉ែត្រ។

ពិធីនេះធ្វើឡើងនៅក្នុងបរិវេណដីឡូតិ៍ ភូមិបឹងយា ឃុំវាល ស្រុកកណ្តៀង ខេត្តពោធិ៍សាត់ ដោយការចូលរួមពី លោកអភិបាលរងខេត្ត ថ្នាក់ដឹកនាំមន្ទីរពាក់ព័ន្ធ រដ្ឋបាលក្រុងពោធិ៍សាត់ និងស្រុកកណ្តៀង៕

ប្រភព៖ រដ្ឋបាលខេត្តពោធិ៍សាត់