រាជធានីភ្នំពេញ ៖ រសៀលថ្ងៃទី០៤ ខែកញ្ញា ឆ្នាំ២០២៥ នៅសាលប្រជុំខេត្តបាត់ដំបង ទីស្ដីការក្រសួងមហាផ្ទៃ ឯកឧត្តម ឧត្តមអគ្គានុរក្ស.១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានអញ្ជើញជាអធិបតី ក្នុងកម្មវិធីបិទវគ្គបណ្តុះបណ្តាលពង្រឹងសមត្ថភាពមន្ត្រី ប៉ុស្តិ៍សុខភាពពន្ធនាគារ តាមមណ្ឌលអប់រំកែប្រែ និងពន្ធនាគាររាជធានី ខេត្ត។
កម្មវិធីនេះដែរមានការចូលរួមពី លោកជំទាវ អគ្គនាយករង លោកប្រធាននាយកដ្ឋាន អនុប្រធាននាយកដ្ឋាន និងសិក្ខាកាមមកពីមណ្ឌលអប់រំកែប្រែ និងពន្ធនាគាររាជធានី ខេត្ត។
ឆ្លៀតក្នុងឱកាសនេះដែរ ឯកឧត្ដម អគ្គនាយក បានមានប្រសាសន៍ផ្ដាំផ្ញើមួយចំនួនដូចខាងក្រោម៖
– គ្រប់ពន្ធនាគារទាំងអស់ត្រូវយកចិត្តទុកដាក់ទៅលើជំងឺកម រមាស់នៅក្នុងពន្ធនាគារ និងរក្សាបរិស្ថានល្អ អនាម័យ ខ្យល់ ចេញចូល និងពន្លឺគ្រប់គ្រាន់ជាពិសេសក្នុងរដូវវស្សានេះ ។
– គ្រប់មន្រ្តីជំនាញសុខាភិបាល និងប៉ុស្តិ៍សុខភាពត្រូវមានទំនាក់ទំនងអោយបានល្អជាមួយមន្ទីសុខាភិបាល និងអង្គការសហការណ៍នានា ។
– ត្រូវបន្តយកចិត្តទុកដាក់លើការព្យាបាលជនជាប់ឃុំដែលមានជំងឺអោយបានល្អ ដោយមិនទុកចោលឡើយ ។
– ត្រូវបន្តស្នើសុំក្រសួងសុខាភិបាលក្នុងការចាក់វ៉ាក់សាំងការពារជំងឺផ្សេងៗ និងឱសថដែលជាតម្រូវការ ។
– ត្រូវរួមគ្នាដើម្បីឱ្យជនជាប់ឃុំមានសុខភាពល្អប្រសើរឡើង ដើម្បីកាត់បន្ថយការឈឺ និងស្លាប់របស់ជនជាប់ឃុំ ។
– នាយកដ្ឋានជំនាញរបស់អគ្គនាយកដ្ឋានពន្ធនាគារ ត្រូវបន្តពង្រឹងបន្ថែមទៀតនូវកិច្ចសហប្រតិបត្តិការជាមួយដៃគូគ្រប់លំដាប់ថ្នាក់ ក្នុងការកៀរគរធនធានគាំទ្រនានា ។
– មន្ត្រីពេទ្យគ្រប់រូប ត្រូវតែប្រកាន់ខ្ជាប់នូវគោលការណ៍វិជ្ជាជីវៈ និងក្រមសីលធម៌ ដូចបានកំណត់ចំពោះមន្ត្រីសុខាភិបាល ក្នុងការផ្តល់សេវា ។
– សិក្ខាកាមទាំងអស់ ដែលបានបញ្ចប់វគ្គបណ្តុះបណ្តាលថ្ងៃនេះ ត្រូវយកចំណេះ ដឹង និងបទពិសោធល្អៗដែលទទួលបានពីវគ្គបណ្តុះបណ្តាល ទៅអនុវត្តការងារប្រចាំថ្ងៃឱ្យមាន ប្រសិទ្ធភាពដើម្បីបម្រើជាប្រយោជន៍ដល់អង្គភាពរៀងៗខ្លួន៕
ប្រភព ៖ ការិយាល័យព័ត៌មាន និងផ្សព្វផ្សាយ
