ភ្នំពេញ ៖ លោករដ្ឋមន្ដ្រីក្រសួងព័ត៌មាន ខៀវ កាញារីទ្ធ បានអញ្ជើញចូលរួមបិទវេទិកា ” អ្នកសារព័ត៌មាន និងអ្នកនាំពាក្យ ” នារសៀលថ្ងៃទី១២ ខែមករា ឆ្នាំ ២០១៨។ នោះជាលើកដំបូងដែលរៀបចំឡើងដោយសហភាពសហព័ន្ធសារព័ត៌ មានកម្ពុជា (ស.ស.ស.ក)។
តាមប្រសាសន៏ ឯកឧត្តម ខៀវ កាញារីទ្ធ រដ្ឋមន្ដ្រីក្រសួងព័ត៌មាន បានស្នើដល់ អ្នកសារព័ត៌មានទាំងអស់ កុំផ្ចាញ់ផ្ចាលអ្នកនាំពាក្យ ហើយត្រូវយល់ថាអ្នកសារ ព័ត៌មាននិងអ្នកនាំពាក្យប្រៀបដូចជាផ្នែកសំខាន់ៗនៅក្នុងរាងកាយតែមួយដោយ មិនអាចបាត់មួយណាបាននោះឡើយ។
លោករដ្ឋមន្ដ្រី ក៏បានស្នើទៅកាន់អ្នកនាំពាក្យផងដែរថា ក្នុងនាមអ្នកនាំពាក្យ ត្រូវក្ដោបព្រឹត្តិការណ៍ឲ្យបានជុំនិងច្បាស់លាស់ ដើម្បីជាបេសកម្មក្នុងនាមជាមន្រ្តីផ្តល់ព័ត៌មានដល់សារធាណៈជន តាមរយៈសារព័ត៌មានឲ្យបានច្បាស់ផងដែរ ហើយអ្នកនាំពាក្យដែលដឹងមិនច្បាស់សូមកុំជំនះឆ្លើយតបជាមួយសំណួររបស់អ្នកសារព័ត៌មាន ។
តាមលោករដ្ឋមន្ដ្រី ខៀវ កាញារីទ្ធ បើទោះបីជាប្រទេសយើងមិនទាន់មានសាលាដើម្បីបង្រៀនអ្នកនាំពាក្យក៏ពិតមែន ប៉ុន្តែអ្នកនាំពាក្យត្រូវបានជ្រើសរើសចេញពី សាលាបណ្ដុះបណ្ដាល សារព័ត៌មាន (DMC)។
ឆ្លៀតក្នុងឱកាសនោះដែរ ប្រមុខដឹកនាំក្រសួងព័ត៌មានរូបនេះ ក៏បានបង្ហាញនូវគោលបំណងចង់ឲ្យមានពិធីជួបជុំអ្នកសារព័ត៌មាន និងអ្នកនាំពាក្យព្រោះក្រុមអ្នកទាំងពីរប្រភេទនេះ គឺមានសារៈសំខាន់ដូចគ្នា ។
សូមបញ្ជាក់ថា វេទិកាដែលរៀបចំឡើងនៅទីស្នាក់ការកណ្តាលរបស់ ស.ស .ស. ក ក្នុងរាជធានីភ្នំពេញ ដោយមានការអញ្ជើញចូលរួម ពីស្ថាប័នពាក់ព័ន្ធ ចំនួន៦៤ស្ថាប័ន និងអ្នកសារព័ត៌មានប្រមាណ១០០នាក់ផងដែរ៕
ដោយ : សំណាង
