ខេត្តតាកែវ÷ នៅព្រឹកថ្ងៃ០៣ ខែកក្កដា ឆ្នាំ២០២៥ អាជីវករជាង៤០គ្រួសារ ដែលប្រកបរបរដឹកទំនិញតាមរថយន្តសាំយ៉ុង ពីព្រំដែន កម្ពុជា វៀតណាម និងច្រកនានា តាមបណ្ដោយផ្លូវជាតិលេខ០២ ក្នុងភូមិសាស្ត្រខេត្តតាកែវ បាននាំគ្នាទៅស្នើសុំពីអភិបាលខេត្តតាកែវ ដើម្បីជួយសម្រួលក្នុងការបើកគូថរថយន្តដើម្បីដាក់ទំនិញបន្ថែម ព្រោះពួកគាត់បានត្អូញត្អែថា ក្រោយពីមានការទប់ស្កាត់និងលុបបំបាត់ចំពោះយានយន្តដឹកសំពីងសំពោងគ្រប់ប្រភេទ កម្លាំងសមត្ថកិច្ចបានចុះរឹតបន្តឹងច្បាប់ចរាចរណ៍ផ្លូវគោក នៅតាមដងផ្លូវក្នុងភូមិសាស្រ្តខេត្តតាកែវមក ពួកគាត់ពិតជាមានការលំបាកក្នុងការរកប្រាក់ចំណេញណាស់។
ពួកគាត់បន្ថែមថារាល់ការដឹកទំនិញ ដែលនាំចូលតាមច្រកនានាតាមព្រំដែនជាប់ប្រទេសវៀតណាមត្រូវបង់ពន្ធ ជាច្រើនកន្លែងទម្រាំដល់ទីតាំងគោលដៅជាមួយការចំណាយលុយបាយសមត្ថកិច្ចជាងម្ភៃមុឺនរៀល ទៅ៣០មុឺនរៀល បើគិតគូទូទាត់ទៅគ្មានបានប្រាក់ចំណេញចូលផ្ទះនោះទេ។
ជាការឆ្លើយតបលោក ញ៉ែម ស្រស់ អភិបាលរងខេត្ត តំណាងឯកឧត្តម វុី សំណាង អភិបាលខេត្តតាកែវ បានចុះមកជួបបងប្អូនអាជីវករជាង៤០គ្រួសារ លោកបានសម្របសម្រួល ឱ្យបងប្អូនជាតំណាងអាជីវករ ធ្វើការដាក់ពាក្យស្នើសុំ ជាលាយលាក់អក្សរ ប្រភេទរថយន្ត ទំនិញ និងផ្លាកលេខរថយន្ត ដើម្បីរដ្ឋបាលខេត្ត ធ្វើការប្រជុំពិភាក្សាគ្នានិងត្រួតពិនិត្យមើលនៅពេលក្រោយ ដោយឱ្យបងប្អូនអាជីវករវិលត្រលប់ទៅផ្ទះរៀងៗខ្លួនសិន។
ដោយ៖ សត្យា
