រដ្ឋមន្រ្តីក្រសួងមហាផ្ទៃបានចេញលិខិតព្រមានគណបក្សមហាសាមគ្គីជាតិខ្មែរឱ្យបំពេញកាតព្វកិច្ចតាមលក្ខខណ្ឌកំណត់ត្រង់ប្រការ២៨ នៃលក្ខន្តិកៈគណបក្សមហាសាគ្គីជាតិខ្មែរ!

រាជធានីភ្នំពេញ៖ នៅថ្ងៃទី១១ ខែមិថុនា ឆ្នាំ២០២៥ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានជម្រាបជូនលោក ហ៊ាង គឹមសឿន ប្រធានស្តីទីគណបក្សមហាសាមគ្គីជាតិខ្មែរ ស្តីពីការបំពេញកាតព្វកិច្ចតាមលក្ខខណ្ឌកំណត់ត្រង់ប្រការ២៨ នៃលក្ខន្តិកៈគណបក្សមហាសាមគ្គីជាតិខ្មែរ។

ក្នុងលិខិតបានបញ្ជាក់ថា លោក លោក ញ៉ែម វណ្ណថន ប្រធានគណបក្សមហាសាមគ្គីជាតិខ្មែរ បានធ្លាក់ខ្លួនឈឺពិការភាពជាទម្ងន់ ដោយមិនអាច ដឹកនាំការងារគណបក្សបានរហូតមកដល់បច្ចុប្បន្ននេះ។ ទន្ទឹមនេះគណៈកម្មាធិការអចិន្ត្រៃយ៍គណបក្ស បានសម្រេចបោះឆ្នោតជ្រើសតាំងលោក ហ៊ាង គឹមសឿន ជាប្រធានស្តីទីគណបក្ស ដើម្បីសម្របសម្រួល ការងារផ្ទៃក្នុងគណបក្សបណ្តោះអាសន្ន តាមរយៈលិខិតលេខ ០២៤ គមសជខ/១៩ ចុះថ្ងៃទី២១ ខែឧសភា ឆ្នាំ២០១៩ និងលិខិតលេខ ០០៥ គមសជខ/២១ ចុះថ្ងៃទី១៨ ខែមមីនា ឆ្នាំ២០២១ របស់គណបក្ស មហាសាមគ្គីជាតិខ្មែរ និងតាមរយៈរបាយការណ៍សកម្មភាពប្រចាំឆ្នាំ២០២៣ របស់គណបក្សបានចុះហត្ថលេខាដោយលោក ហ៊ាង គឹមសឿន ជាប្រធានស្តីទីគណបក្ស។

ក្នុងន័យនេះក្រសួងមហាផ្ទៃស្នើឱ្យលោកប្រធានស្តីទីគណបក្សត្រូវបំពេញកាតព្វកិច្ចតាម លក្ខខណ្ឌកំណត់ត្រង់ប្រការ២៨ នៃលក្ខន្តិកៈគណបក្សមហាសាមគ្គីជាតិខ្មែរ ដោយត្រូវធ្វើការជ្រើសរើស ប្រធានគណបក្សស្របតាមលក្ខន្តិកៈគណបក្សដែលបានតម្កល់ទុកនៅក្រសួងមហាផ្ទៃ និងច្បាប់ស្តីពី គណបក្សនយោបាយ ហើយត្រូវបញ្ជូនជីវប្រវត្តិសង្ខេបប្រធាន និងសមាសភាពថ្មីចំនួន១ (មួយ) ច្បាប់ ជូនមក ក្រសួងមហាផ្ទៃឱ្យបានមុនដំណាច់ខែកញ្ញា ឆ្នាំ២០២៥ ជាកំហិត។

ក្នុងករណីគណបក្សមិនបំពេញកាតព្វកិច្ចតាមសេចក្តីជូនដំណឹងនេះ ក្រសួងមហាផ្ទៃនឹងអនុវត្តវិធានការតាមផ្លូវច្បាប់ជាធរមាន។

ដោយ៖ សត្យា