ខេត្តសៀមរាប៖ កុលបុត្រចំនួន ២៤រូប ត្រូវបានធ្វើការបំបួស ដើម្បីតបស្នងសងគុណមាតាបិតា និងបម្រើក្នុងវិស័យព្រះពុទ្ធសាសនានៅវត្តប្រាសាទចន្ទរង្សី ហៅ វត្តគោកចាន់ ភូមិគោកចាន់ ឃុំអំពិល ស្រុកប្រាសាទបាគង ខេត្តសៀមរាប នាព្រឹកថ្ថៃទី២៤ ខែ ឧសភា ឆ្នាំ២០២៥នេះ ។
ព្រះធម្មានុរ័ក្ខញាណ ស៊ុម ពិសិដ្ឋ ព្រះសមុហ៍គណខេត្តសៀមរាប និងជាព្រះគ្រូចៅអធិការវត្តប្រាសាទចន្ទរង្សី(ហៅវត្តគោចាន់) បានមាន ថេរដីកាថា ការបំបួសនាគឬបំបួសកុលបុត្រនាពេលនេះគឺក្នុងគោលបំណងដើម្បី ឱ្យយុវជន និងកុមារាខ្មែរ មានឱកាសបានចូលសាងផ្នួស តបស្នង សងគុណចំពោះ អ្នកមានគុណ ទាំងឡាយនិងបានបម្រើក្នុងវិស័យព្រះពុទ្ធសាសនាផងដែរ។
ព្រះគ្រូចៅអធិការវត្តប្រាសាទចន្ទរង្សី មានថេរដីកាពន្យល់ថា ការសាងព្រះផ្នួសបច្ចុប្បន្ននេះមានបំណងប្រាថ្នាធំៗ៣ គឺដើម្បីសងគុណមាតាបិតា ដើម្បីរួចចាកទុក្ខនិងដើម្បីបន្តការសិក្សាជាមួយព្រះពុទ្ធសាសនា។
ព្រះអង្គបន្តថាពិធីបំបួសនាគមានន័យថា ជាការបំបួសកុលបុត្រមិនថាក្មេង ឬចាស់ឡើយ ឱ្យតែបុគ្គលនោះមានសទ្ធាចង់ក្លាយជាព្រះសង្ឃ ហើយចំពោះការបំបួសប្រសិនបើបុគ្គលនោះ ចង់បួសត្រឹមតែជាសាមណេរ គឺមិនប្រកាន់អាយុឡើយ តែបើចង់បួសជាភិក្ខុទាល់តែមានអាយុចាប់ពី២០ឆ្នាំឡើងទៅ ទើបអាចបួសបាន។ ចំណែកឯបុគ្គលដែលហៅថានាគ គឺជាអ្នកដែលត្រូវបួស ស្ថិតនៅក្នុងពេលរៀបចំបំបួសនេះ។ លុះពេលបំបួសរួចបុគ្គលនោះនិងក្លាយជាព្រះសង្ឃ លែងជានាគទៀតហើយ។ ការបួសជាព្រះសង្ឃមានន័យថា ព្រះសង្ឃរូបនោះ ចង់បំពេញបុណ្យកុសលក្នុងព្រះពុទ្ធសាសនា និងចង់បំពេញភារកិច្ចជាកូនប្រុសសងគុណមាតាបិតា និងម្យ៉ាងវិញទៀត គឺចង់បម្រើដល់ព្រះពុទ្ធសាសនានេះតែម្តង។ ជាមួយគ្នានោះ លក្ខខណ្ឌនៃការបួសព្រះសង្ឃបានកំណត់ថា ចំពោះបុគ្គលដែលចង់បួស ទី១៖ បុគ្គលខ្លួនអែងត្រូវមានកាយសម្បទាគ្រប់គ្រាន់ ទី៖ ២ ត្រូវតែមានការអនុញ្ញាតពីមាតាបិតា ទី៣៖ ត្រូវតែជាអ្នកមិនជាប់បំណុលគេ និងទី៤ បុគ្គលនោះមិនជាអ្នកជាប់ទោស។ បើបុគ្គលនោះមានលក្ខណៈសម្បត្តិគ្រប់គ្រាន់ ហើយមានសទ្ធាចង់បួសទៀត បុគ្គលនោះអែង អាចបួសពេលណាក៏បាន ព្រោះពិធីបំបួសនាគ អាចធ្វើបានពេញមួយឆ្នាំ មិនមានការកំណត់ឡើយ ប៉ុន្តែបើបំបួសនៅថ្ងៃ១៤កើត(ថ្ងៃកោរ)ខែអាសាឍ មុនចូលព្រះវស្សា២ថ្ងៃ គឺល្មមពេលគ្នា នឹងព្រះសង្ឃគង់ចាំព្រះវស្សារយៈពេល៣ខែ តាមព័ទ្ធសីមារបស់ព្រះសម្មាសម្ពុទ្ធ ហើយអ្នកបួសថ្មីយកពេលគង់ចាំព្រះវស្សានេះ សិក្សាគម្ពីរធម៌ រៀនសូត្រធម្មវិន័យផ្សេងៗបានតាមការគួរ។
សូមបញ្ជាក់ផងដែរថា នៅក្នុងពិធីបំបួសនាគ គេត្រូវរៀបចំធ្វើតាមប្រពៃណីបុរាណ ដូចជា ពិធីកោរសក់ ពិធីជូនត្រ័យចំពោះលោកអ្នកមានគុណ ពិធីក្រុងពាលី ពិធីបង្វិលពពិល ពិធីធ្វើធ្មេញនាគ ពិធីកួចចំណងដៃនាគ ពិធីលាបប្រេងម្សៅ ពិធីចម្រើនព្រះបរិត្តនាគ ពិធីហែនាគ ៣ជុំព្រះវិហារ ពិធីចូលព្រះវិហារ ពិធីនាគវន្ទាចំពោះព្រះពុទ្ធរូប ពិធីនាគវន្ទាព្រះឧបជ្ឈាយ៍ ពិធីសុំនិស្ស័យបំបួសនាគ ព្រះឧបជ្ឈាយ៍ ព្រះសង្ឃហត្ថាបាស ចម្រើនពុទ្ធជ័យមង្គល ពិធីពហុទេវាសាមណេរវន្ទា លាញោមប្រុស-ស្រី លោកតា លោកយាយ ដើម្បីសាងផ្នួស និងពិធីកប់សក់ដើម្បីសុំសេចក្ដីសុខ ។
គិតត្រឹមឆ្នាំ២០២៥នេះ ព្រះពុទ្ធសាសនាបានឈានមកដល់ ព.ស.២៥៦៩ ហើយប្រទេសនានាដែលកាន់ព្រះពុទ្ធសាសនានៅតែបន្តមានបងប្អូនប្រជាពលរដ្ឋចូលបួសជាព្រះសង្ឃផងដែរ៕
ដោយ៖ ពន្លឺ
