ខេត្តកំពង់ធំ៖ ប្រជាពលរដ្ឋមានការហួសចិត្តជាមួយនិងការរៀបចំដេញថ្លៃគម្រោងមូលនិធិអភិវឌ្ឍន៍ឃុំ/សង្កាត់ សាងសង់ផ្លូវបេតុងអាមេប្រវែង ៣០០ម៉ែត្រ និងទទឹង ០៥ម៉ែត្រ ក្នុងតម្លៃប៉ាន់ស្មាន ១៧២,៦៨១,៤៦៥រៀល (មួយរយចិតសិបពីរលាន ប្រាំមួយរយប៉ែតសិបមួយពាន់បួនរយហុកសិបប្រាំរៀល) នៅឃុំព្នៅ ស្រុកសន្ទុក ខេត្តកំពង់ធំ។ ខណៈដែលគេសង្កេតឃើញមាន ត្រឹមតែ៣ក្រុមហ៊ុនប៉ុណ្ណោះបានចូលរួមដេញថ្លៃ ក្នុងពេលដែលគេសង្កេតឃើញមានតំណាងក្រុមហ៊ុនជាច្រើនទៀតបានទៅចូលរួមដែរ តែគេមិនដាក់សំណើរបស់ពួកគេ ខណៈក្នុងការដេញថ្លៃគម្រោងនេះត្រូវបានទៅលោក គាត ណាវីន ក្រុមហ៊ុនឈ្មោះ គាត ណាវីន ដែលបានដាក់តម្លៃទាបជាងគេគឺ ១៧០,១០០,០០០រៀល (មួយរយចិតសិបលាន មួយរយពាន់រៀលគត់) ដោយចុះបានត្រឹមតែ ២,៥៨១,៤៦៥៛ (ពីរលាន ប្រាំរយប៉ែតសិបមួយពាន់ បួនរយហុកសិបប្រាំរៀលគត់) បើគិតជាមធ្យមតម្លៃសំណង់នោះគឺមានតម្លៃខ្ពស់កប់ពពកស្មើនឹង១១៣៤០០រៀលក្នុង១ម៉ែត្រក្រឡា។
ដោយសារតែក្នុងគម្រោងដេញថ្លៃហាកបីដូចគេរៀបចំទុកមុន ដោយចុះត្រឹមតែជាងពីរលានរៀលយ៉ាងដូច្នេះហើយទើប ប្រជាពលរដ្ឋម្ចាស់ប្រាក់បានដាក់ការសង្ស័យ និងស្នើសុំដល់ប្រធានលទ្ធកម្មខេត្ត ជាពិសេស ឯកឧត្តម អភិបាលខេត្តកំពង់ធំ មេត្តាចាត់វិធានការពិនិត្យភាពមិនប្រក្រតី ព្រមទាំងបើកការស៊ើបអង្កេតឡើងវិញ ដើម្បីជៀងវាងមានជនខិលខូចណាមួយ បានប្រើវិធីបន្លំភ្នែក យកថវិកាជាតិទៅចែកគ្នាចាយយ៉ាងរំភើយ ដែលការខាតបង់យ៉ាងធ្ងន់ធ្ងរនោះគឺ រាជរដ្ឋាភិបាលកម្ពុជា។
ដោយ៖ សត្យា
