ខេត្តសៀមរាប៖ នៅក្នុងពិធីបើកសិក្ខាសាលាស្ដីពីនីតិវិធីនិងយុទ្ធសាស្ត្រតស៊ូមតិលើកទី១សម្រាប់កម្មវិធី«ជជែកដេញដោលយុវជនថ្នាក់ខេត្ត២០២៥»ក្នុងខេត្តសៀមរាបដែលរៀបចំដោយមន្ទីរអប់រំយុវជន និងកីឡាខេត្តសៀមរាប នៅសាលាគរុកោ សល្យ និងវិក្រឹតការ នាព្រឹកថ្ងៃទី១៧ ខែឧសភា ឆ្នាំ២០២៥នេះ លោក កែវ វិបុល អនុប្រធាននាយកដ្ឋានអប់រំយុវជន និងកុមារនៃអគ្គនាយកដ្ឋានយុវជននៃក្រសួងអប់រំយុវជននិងកីឡា បានមានប្រសាសន៍ថា យុវជនត្រូវមានវិជ្ជាសម្បទា បំណិនសម្បទា ចរិយាបំណិន និងកាយសម្បទា ដើម្បីក្លាយជាមូលធនមនុស្សក្នុងសង្គម។
លោកបន្តថាដើម្បីឆ្លើយ តបតាមគោលនយោបាយស្តីពីការអភិវឌ្ឍយុវជន និងកំណែទម្រង់ស៊ីជម្រៅរបស់ក្រសួងអប់រំ យុវជន និងកីឡា បានកំណត់អាទិភាពក្នុងការបន្តធ្វើកំណែទម្រង់សាលារៀន ឱ្យក្លាយជាស្តង់ដា សាលារៀនគំរូ នៃដំណើរការ និងការអភិវឌ្ឍសាលារៀន តាមស្តង់ដារចំនួន ៥ គឺ៖ ១.លទ្ធផលសិក្សា របស់សិស្ស, ២.ដំណើរការបង្រៀន និងរៀន, ៣.ការចូលរួមរបស់សហគមន៍, ៤.ដំណើរការប្រតិបត្តិ និងរដ្ឋបាលសាលារៀន, និងទី៥.គណនេយ្យភាព។
លោក កែវ វិបុល បានថ្លែងបញ្ជាក់បន្ថែមថា ក្រសួងអប់រំ យុវជន និងកីឡាបានធ្វើការណែនាំឱ្យមន្ទីរអប់រំ យុវជន និងកីឡា ២៥រាជធានី ខេត្ត រៀបចំកម្មវិធី “ជជែកដេញដោលយុវជនថ្នាក់ខេត្ត” ក្នុងនោះមានខេត្តចំនួន០៧ (ប្រាំពីរខេត្ត) កំពុងអនុវត្តមានដូចជា៖ (កណ្តាល កំពង់ចាម បាត់ដំបង ព្រះសីហនុ កំពង់ឆ្នាំង កំពង់ធំ និង សៀមរាប)បានរៀបចំកម្មវិធីមួយឆ្នាំរួចហើយ និងកំពុងបន្តអនុវត្តឆ្នាំទី២សម្រាប់កម្មវិធី “ជជែក ដេញដោលយុវជនថ្នាក់ខេត្តឆ្នាំ២០២៥” នៅតាមគ្រឹះស្ថានអប់រំរដ្ឋ និងឯកជនមកប្រកួតថ្នាក់ខេត្ត បានកំណត់យកសិស្សជាគោលដៅអាទិភាពដែលទាំងនេះគឺជាបេសកកម្មយ៉ាងសំខាន់របស់ក្រសួងសម្រាប់អភិវឌ្ឍយុវជនប្រកបដោយចំណេះដឹង ចំណេះធ្វើ ទំនាក់ទំនងល្អ និងការចេះរស់នៅជាមួយគ្នា ប្រកបដោយស្មារតីទទួលខុសត្រូវ មាន សីលធម៌ គុណធម៌ ចរិយាធម៌ សុជីវធម៌ និងមានឥរិយាបថថ្លៃថ្នូរក្នុងសង្គមជាតិ។
លោក ស៊ិន កុសល ប្រធានការិយាល័យយុវជននៃមន្ទីរអប់រំយុវជន និងកីឡា ខេត្តសៀមរាប មានប្រសាសន៍ថាបានមានប្រសាសន៍ថាការបើកសិក្ខាសាលាស្ដីពីនីតិវិធីនិងយុទ្ធសាស្ត្រតស៊ូមតិលើកទី១សម្រាប់កម្មវិធី«ជជែកដេញដោលយុវជនថ្នាក់ខេត្ត២០២៥»នាពេលនេះគឺក្នុងគោលបំណង បណ្តុះបណ្តាលយុវជនឱ្យក្លាយជាពលរដ្ឋសកល.បណ្តុះបណ្តាលយុវជនឱ្យចេះប្រើប្រាស់នូវវិវប្បធម៌សន្ទនាតាមរយៈការជជែកដេញ ដោល បណ្តុះសមត្ថភាពយុវជនក្នុងការដោះស្រាយបញ្ហាផ្សេងៗដែលពួកគេជួបប្រទះ តាមរយៈការសន្ទនា កសាងសមត្ថភាពយុវជនឱ្យមានភាពក្លាហានចេះប្រើប្រាស់សិទ្ធិស្របច្បាប់ប្រកប ដោយភាពឈ្លាសវៃក្នុងការបញ្ចេញមតិដើម្បីទទួលបាននូវផ្លែផ្កាជាវិជ្ជមានជូនសង្គម ពង្រឹងជំនាញនៃការត្រិះរិះពិចារណា ការសិក្សាស្រាវជ្រាវ ការចែករំលែកគំនិត ការទាក់ទាញការគាំទ្រ ជំនាញក្នុងការនិយាយសាធារណៈជាដើមផ្តល់ឱកាសឱ្យយុវជន ពិចារណា បញ្ចេញគំនិតយោបល់ បង្ហាញសមត្ថភាព និងទេពកោសល្យជាសាធារណៈក្នុងការជជែកដេញដោលក្នុងសមរភូមិ គំនិតនៃ សង្គមពុទ្ធិ ដើម្បីស្វែងរកនូវសុខដុមនីយកម្មសម្រាប់ទាំងអស់គ្នា បង្កើនបណ្តាញទំនាក់ទំនង ភាពស្និតស្នាល ល្អរវាងយុវជននិងយុវជន ដើម្បី ផ្លាស់ប្តូរបទពិសោធគ្នាក្នុងតម្លៃជាមិត្តភាពនិងពង្រីកធនធានយុវជនដើម្បីអាចអភិវឌ្ឍខ្លួនក្លាយជាមូលធនមនុស្សសម្រាប់ ជាតិកម្ពុជា។
លោក ស៊ិន កុសល បានបន្ថែមថាសិក្ខាសាលនេះគឺមានការចូលរួមជាសិក្ខាកាមដែលជានាយក គ្រូដឹកនាំ គ្រូបង្វឹក និងបច្ចេកជនជាយុវជន មកពីវិទ្យាល័យរដ្ឋ និងឯកជនចំនួន២០ វិទ្យាល័យ ក្នុងខេត្ដសៀមរាបដោយធ្វើឡើងមានរយៈពេល២ថ្ងៃ ចាប់ពីថ្ងៃទី ១៧ដល់១៨ខែឧសភា ២០២៥នេះផងដែរ៕
ដោយ៖ ពន្លឺ
