ខេត្តសៀមរាប៖ នៅថ្ងៃទី១៣ ខែឧសភា ឆ្នាំ២០២៥ រដ្ឋបាល ឃុំឫស្សីលក ស្រុកជីក្រែង ខេត្តសៀមរាប បានកាត់ខ្សែបូ សម្ពោធដាក់ឱ្យប្រើប្រាស់ស្ពានបេតុង និងផ្លូវបេតុង០១ខ្សែមានប្រវែង៣,៥០០ម កាត់ភូមិក្រូច និងភូមិដើមអំពិល និងសមិទ្ឋផលមួយចំនួនសម្រាប់ឃុំឫស្សីលក ក្រោមព្រះអធិបតីភាពព្រះបវរវិជ្ជា ទេព ភឿន ព្រះធម្មធរគណខេត្ត និងជាព្រះអនុគណស្រុកជីក្រែង ជាព្រះចៅអធិការវត្តបុព្វទិសារាម ហៅវត្តកំពង់ក្តី និងលោក ទី ម៉េង មេឃុំឫស្សីលក ព្រមទាំងព្រះវត្តមានព្រះសង្ឃ អាជ្ញាធរមូលដ្ឋាន និងប្រជាពលរដ្ឋជាច្រើនទៀត។
ក្នុងរបាយការណ៍របស់គណៈកម្មការសាងសង់និងលោក ទី ម៉េង មេឃុំឫស្សីលក បង្ហាញថា៖ស្ពានលូជ្រុងនេះ សាង សង់ស្ថិតក្នុងភូមិក្រូច និងផ្លូវបេតុងមួយខ្សែប្រវែង៣៥០០ម ទទឹង០៣ម៉ែត្រផ្លូវដីភ្ជាប់ពីភូមិក្រូចទៅភូមិដើមអំពិល បានជួស ជុលស្តារឡើងវិញជាផ្លូវបេតុងសរុបចំនួន៤១៤.៨០០.០០០ រៀល(បួនរយដប់បួនលានប្រាំបីសែនរៀល)ជាថវិកាមូល នីធិឃុំឆ្នាំ២០២៥ និងបានការចូលរួមបន្ថែមពីប្រជាពលរដ្ឋក្នុងមូលដ្ឋានជាច្រើនផងដែរ។ គិតពីឆ្នាំ២០២៣ មកដល់ឆ្នាំ២០២៥ ឃុំឫស្សីលក បានសាងសង់ និងជួសជុលហេដ្ឋារចនាសម្ព័ន្ឋក្នុងមូលដ្ឋាន តាមរយៈគម្រោងមូលនីធិឃុំ អស់ទឹកប្រាក់ ចំនួន៤៤០.០៦០.០០០រៀល ក្នុងនោះធ្វើលូកាត់ផ្លូវ ១៤កន្លែង សង់ស្ពានបេតុង០១ ផ្លូវបេតុង០១ខ្សែ។
លោក ទី ម៉េង មេឃុំឫស្សីលក មានប្រសាសន៍ថា៖កន្លងមក អាជ្ញាធរឃុំ និងរដ្ឋបាលឃុំឫស្សីលកតែងតែយកចិត្តទុកដាក់គិតគូរពីសុខទុក្ខ និងការលំបាករបស់ប្រជាពលរដ្ឋនៅក្នុងមូលដ្ឋាននិងការអភិវឌ្ឍហេដ្ឋារចនាសម្ព័ន្ឋនានាតាមគម្រោងមូលនីធិឃុំដើម្បីជួយសម្រួល ជាពិសេសអំណោយផ្លូវមួយខ្សែនេះពិតជាបានជួយសម្រួល និងបង្កភាពងាយស្រួលនៃការធ្វើដំណើររបស់ប្រជាពលរដ្ឋ និងឆ្លើយតបបានតាមការចង់បានរបស់ប្រជាពលរដ្ឋក្នុងមូលដ្ឋាន។
ព្រះបវរវិជ្ជា ទេព ភឿន ព្រះធម្មធរគណខេត្ត និងជាព្រះអនុគណស្រុកជីក្រែង ជាព្រះចៅអធិការវត្តបុព្វទិសារាមហៅវត្តកំពង់ក្តី បានចាត់ទុកសមិទ្ឋផលថ្មីនេះគឺកើតចេញពីកម្លាំងសាមគ្គីនិងការគិតគូររបស់អាជ្ញាធរមូលដ្ឋាន ព្រោះថាផ្លូវនិងសំណង់សិល្បៈការណ៍ទាំងនេះថាពិតជាមានសារៈសំខាន់ណាស់ សម្រាប់បងប្អូនប្រជាពលរដ្ឋក្នុងទីជនបទ ជាពិសេស ជួយរំដោះទឹកការពារគ្រោះទឹកជំនន់បានមួយផ្នែក ជួយកាត់បន្ថយពេលវេលា កាត់បន្ថយថ្លៃចំណាយ ជួយសម្រួលដល់ការធ្វើដំណើរ និងការដឹកជញ្ជូនផ្សេងៗបានងាយស្រួល ឆាប់រហ័ស ដែលកត្តានេះ នឹងរួមចំណែកលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋយើងក្នុងមូលដ្ឋាន ។
ព្រះតេជគុណ មានថេរដីកាថា៖ក្នុងនីតិកាលទី៧ នៃរដ្ឋសភា រាជរដ្ឋាភិបាលកម្ពុជា ក្រោមការដឹកនាំប្រកបដោយភាពជឿជាក់ និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាពនៅកម្ពុជា ដោយឈរលើសរសរស្តម្ភគន្លឹះចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល។ ហេតុនេះសូមបងប្អូនពុកមែមីងមានាំគ្នាជំរុញកូនចៅឱ្យសិក្សារៀនសូត្របានចប់ចុងចប់ដើម ដើម្បី យកចំណេះវិជ្ជាមកលើកស្ទួយជីវភាពគ្រួសារនិងរួមគ្នាអភិវឌ្ឍភូមិឃុំរបស់យើងឱ្យកាន់តែរីកចម្រើនជាបន្តទៅ ទៀត សំដៅដើរឱ្យទាន់បរិបទនៃការវីវដ្តរីកចម្រើនជឿនលឿនស្របតាម យុគសម័យបច្ចេកវិទ្យាឌីជីថល និងបដិវត្តឧស្សាហកម្ម៤.០៕
ដោយ៖ ពន្លឺ
