ខេត្តសៀមរាប៖ កាលពីរសៀលថ្ងៃទី១១ ខែឧសភា ឆ្នាំ២០២៥ ត្រូវនិងថ្ងៃ១៥កើត ខែពិសាខ ជាថ្ងៃសីល និងពេញបូណ៌មី ដែលជាថ្ងៃ «បុណ្យវិសាខបូជា» នោះព្រះគ្រូចៅអធិ ការវត្ត អាចារ្យ គណៈកម្មការវត្តនិង ដូនជី តាជី រួមនឹងពុទ្ធបរិស័ទចំណុះជើងវត្តព្រះព្រហ្មរ័ត្ន ក្នុងក្រុងសៀមរាប បានរៀបចំប្រារព្ធធ្វពិធីបុណ្យវិសាខបូជា គឺដើម្បីរំលឹកដល់ព្រឹត្តិ ការណ៍ដ៍វិសេសចំនួន៣ដែលទាក់ទងនឹងព្រះសម្មាសម្ពុទ្ធគឺ ទី១៖ ព្រះអង្គទ្រង់ប្រសូត ២៖ ព្រះអង្គទ្រង់ត្រាស់ដឹង និងទី៣៖ ព្រះអង្គទ្រង់ចូលបរិនិព្វាន ដែលព្រឹត្តិការណ៍ដ៏អស្ចារ្យទាំង ៣នេះបានកើតឡើងចំថ្ងៃពេញបូណ៌មី ខែពិសាខដូចគ្នា ខុសតែឆ្នាំប៉ុណ្ណោះ ដូច្នេះ បុណ្យវិសាខបូជា គឺតំណាងឲ្យ «ថ្ងៃទាំងបី» ។
ព្រះសាសនសត្ថា តង់ តន ព្រះបាឡាត់គណខេត្ត និងជាព្រះគ្រូចៅអធិការវត្តព្រះព្រហ្មរ័ត្ន បានមានថេរដីកាឲ្យដឹងបន្ថែមដែរ ថា វិសាខបូជា គឺជាបុណ្យដ៏ធំមួយ ក្នុងព្រះពុទ្ធសាសនា ដែលប្រទេសកម្ពុជា បានចាត់ទុកជាបុណ្យជាតិ ហើយវិសាខបូជានេះចាត់ទុកថាជាបុណ្យដ៏ធំមួយ ដែលមានមហាជនក្មេងចាស់ប្រុសស្រី បានជួបជុំគ្នាអ៊ូអរ ដោយនាំទៅជាមួយនូវគ្រឿងសក្ការបូជា មានទៀន ធូប ផ្កា ភ្ញី និងប្រទីបជ្វាលា តូចធំ អុចបំភ្លឺ ព្រោងព្រាតនៅតាមទីវត្តអារាម។
ព្រះសាសនសត្ថា តង់ តន ព្រះថេរដីកាបន្តថា វិសាខបូជាគឺជាបុណ្យប្រវត្តិសាស្ត្រមួយរបស់ព្រះពុទ្ធសាសនា ហើយក៏ជាអាយុរបស់ព្រះពុទ្ធសាសនាដែលយើងបានកាន់ ពីព្រោះពុទ្ធសាសនាយើងរាប់ជាសករាជឡើង នៅថ្ងៃបន្ទាប់ពីថ្ងៃដែលព្រះសម្មាសម្ពុទ្ធបានចូលបរិនិព្វាន។ ដូច្នេះថ្ងៃវិសាខបូជា គឺប្រារព្ធទៅដល់ថ្ងៃដែលព្រះសម្មាសម្ពុទ្ធបានប្រសូត ត្រាស់ដឹង និងចូលបរិនិព្វាន ហើយគ្រប់ប្រទេសទាំងអស់ដែលបានកាន់ព្រះពុទ្ធសាសនាគឺពុទ្ធសាសនិកជនរួមទាំងព្រះសង្ឃ ទាំងគ្រហស្ថ តែងតែធ្វើសក្ការបូជាប្រកបដោយជំនឿយ៉ាងមុតមាំថា ជាមហាកុសលដ៏ប្រសើរថ្លៃថ្លាបំផុតផងដែរ៕
ដោយ៖ ពន្លឺ
