អាជ្ញាធរខេត្តសៀមរាបសំណូមពរដល់ព្រះគ្រូចៅអធិការវត្តដែលមាននៅក្នុងបរិវេណឧទ្យានអង្គរចូលរួមបំពេញតួនាទីភារកិច្ច ក្នុងការការពារតំបន់រមណីដ្ឋានអង្គរ សម្បត្តិបេតិកភណ្ឌជាតិ ក្នុងខេត្តសៀមរាប

ខេត្តសៀមរាប៖ នៅក្នុងពិធីបើកសន្និបាតព្រះសង្ឃ ក្នុងតំបន់ឧទ្យានបេតិកភណ្ឌពិភពលោកអង្គរ ស្តីពី “វត្តអារាមពុទ្ធសាសនា បេតិកភណ្ឌ ទឹក បរិស្ថាន បម្រែបម្រួលអាកាសធាតុ និងសុវត្ថិភាពស្បៀង” ក្រោមកិច្ចផ្តួចផ្តើមរបស់ក្រុមប្រឹក្សាកិច្ចការវត្តអារាមនៅតំបន់ឧទ្យានអង្គរនៃសាលាគណខេត្តសៀមរាប នាព្រឹកថ្ងៃទី០៨ ខែឧសភា ឆ្នាំ២០២៥ វត្តរាជបូណ៍ លោក លី សារី អភិបាលរងខេត្តសៀមរាបបានមានប្រសាសន៍ធ្វើការសំណូមពរដល់ព្រះគ្រូចៅអធិការវត្តទាំងអស់ដែលមាននៅក្នុងបរិវេណឧទ្យានអង្គរ អាជ្ញាធរមូលដ្ឋានទាំងអស់ ចូលរួមបំពេញតួនាទីភារកិច្ចរបស់ខ្លួន ក្នុងការការពារតំបន់រមណីដ្ឋានអង្គរ សម្បត្តិបេតិកភណ្ឌជាតិ និងវិស័យផ្សេងៗ ក្នុងខេត្តសៀមរាប ឱ្យកាន់តែល្អប្រសើរជាលំដាប់។

ជាមួយគ្នានោះដែរ អភិបាលរងខេត្តសៀមរាប ក៏បានថ្លែងសង្ឃឹមយ៉ាងមុតមាំថា រដ្ឋបាលខេត្ត អាជ្ញាធរជាតិអប្សរា រដ្ឋបាលក្រុង-ស្រុក មន្ទីរអង្គភាព អាជ្ញាធរមូលដ្ឋានពាក់ព័ន្ធ វត្តអារាម និងអាស្រម ក្នុងតំបន់រមណីដ្ឋានអង្គរទាំងអស់ ត្រូវពង្រឹងការសហការ ការការពារសម្បត្តិវប្បធម៌ និងសម្បត្តិបេតិកភណ្ឌពិភពលោក ដែលជាកេរ្តិ៍តំណែលពីដូនតាបានបន្សល់ទុកនេះ ឱ្យបានគង់វង្សយូរអង្វែង ស្របតាមរដ្ឋធម្មនុញ្ញ លិខិតូបករណ៍អន្តរជាតិ ច្បាប់ និងបទដ្ឋានគតិយុត្តពាក់ព័ន្ធជាធរមាន។

លោក លី សារី ក៏បានមានប្រសាសន៍បញ្ជាក់បន្ថែមថាខេត្តសៀមរាប ជាតំបន់ទេសចរណ៍ប្រវត្តិសាស្រ្ត ដែលត្រូវបានរាជរដ្ឋាភិបាលចាត់ទុកជាតំបន់ប៉ូលទីពីរ នៃការអភិវឌ្ឍវិស័យទេសចរណ៍របស់ជាតិ និងជាខឿនសេដ្ឋកិច្ចយ៉ាងសំខាន់ ដោយមានរមណីយដ្ឋានអង្គរ ជាសម្បតិ្តបេតិកភណ្ឌពិភព លោកដ៏មានតម្លៃជាសកល ដែលមានស្នាដៃសិល្បៈវប្បធម៌ និងស្ថាបត្យកម្មទំនើប នៃសំណង់នៅក្នុងតំបន់ ព្រមទាំងមានតំបន់ទេសចរណ៍បែបប្រវត្តិសាស្រ្ត និងបែបធម្មជាតិផ្សេងៗទៀត ជាតំបន់ទិសដៅទេសចរណ៍ដ៏ល្បីល្បាញ សម្រាប់បម្រើវិស័យទេសចរណ៍ជូនដល់ភ្ញៀវទេសចរជាតិ និងអន្តជាតិនៅជុំវិញពិភពលោក។

អភិបាលរងខេត្តសៀមរាប ក៌បានថ្លែងរំលឹកផងដែរថា តំបន់រមណីយដ្ឋានអង្គរ ត្រូវបានអង្គការយូណេស្កូ (UNESCO) ធ្វើការចុះក្នុងបញ្ជីបេតិកភណ្ឌពិភពលោក ក្រោមការជួយជ្រោម ជ្រែងពី អាយស៊ីស៊ី-អង្គរ ICC Angkor ដែលមានប្រទេស ជប៉ុន និងបារាំងជាសហប្រធាន ក្នុងនោះអាជ្ញាធរជាតិអប្សរា ជាស្ថាប័នប្រតិបត្តិរមណីយដ្ឋានអង្គរ និងត្រូវបានផ្សព្វផ្សាយជាបន្តបន្ទាប់ទៅកាន់ទីផ្សារទេសចរណ៍ពិភពលោក ក្លាយជាផលិតផលទេសចរណ៍ដ៏ទាក់ទាញសម្រាប់ប្រទេសកម្ពុជា។

សម្ដេចព្រះព្រហ្មរតនមុនី ពិន សែម សិរីសុវណ្ណោ ព្រះរាជា គណៈថ្នាក់ទោគណៈមហានិកាយ ឧត្តមទីប្រឹក្សាសម្តេចព្រះសង្ឃនាយក បានមានថេរដីកាថា សន្និបាតព្រះសង្ឃក្នុងតំបន់ឧទ្យានបេតិកភណ្ឌពិភពលោកអង្គរស្តីពី វត្តអារាមពុទ្ធសាសនា បេតិកភណ្ឌ ទឹក បរិស្ថាន បម្រែបម្រួលអាកាសធាតុ និងសុវត្ថិភាពស្បៀង នេះប្រារព្ធឡើងដើម្បីបង្កើនការយកចិត្តទុកដាក់ប្រុងប្រយ័ត្ន អំពីសំណាក់ព្រះសង្ឃ អាចារ្យ គណកម្មការវត្តក្មេងវត្ត និងពុទ្ធបរិស័ទចំណុះជើងវត្តទាំងឡាយដែលមាន នៅក្នុងបរិវេណឧទ្យានអង្គរទៅលើបេតិកភណ្ឌជាតិ និងពិភព លោកនេះ ឲ្យកាន់តែប្រសើរឡើងក្នុងគោលដៅ។

សម្ដេចព្រះព្រហ្មរតនមុនី ពិន សែម បានថេរដីការបន្ថែមថា វត្តនិងអាស្រមនានា មានជិត ៤០ កន្លែងដែលស្ថិតនៅក្នុងតំបន់ឧទ្យានបេតិកភណ្ឌពិភពលោកអង្គរ ទោះតិចឬច្រើន រមែងមានឥទ្ធិពលទៅលើបេតិកភណ្ឌជាតិ និងបេតិកភណ្ឌពិភពលោកនេះ ទាំងវិជ្ជមានខ្លះ អវិជ្ជមានខ្លះ ហើយដែលនឹងប៉ះពាល់ទៅ លើ ច្បាប់គោលការណ៍បេតិកភណ្ឌពិភពលោកដែលកំពុងអនុវត្ត និងប៉ះពាល់ដល់វិស័យទេសចរណ៍ជាតិខ្លះៗជាពុំខាន។ គណៈសង្ឃខេត្តសៀមរាប ក៏ដូចជាគណៈសង្ឃនៃព្រះរាជា ណាចក្រកម្ពុជា តែងមានការព្រួយបារម្ភ និងយកចិត្តទុកដាក់ ដោះស្រាយជាមួយអាជ្ញាធរជាតិគ្រប់លំដាប់ថ្នាក់ ដើម្បីឲ្យវត្តនិងអាស្រមទាំងនោះស្ថិតនៅក្រោមច្បាប់នៃព្រះរាជាណាចក្រកម្ពុជា ព្រមទាំងចូលរួមក្នុងវិស័យផ្សេងៗ ដែលអាចនឹងលើកស្ទួយការអភិវឌ្ឍនៅតំបន់អង្គរនេះ ឲ្យបានប្រសើរឡើងផង ដែរ៕

ដោយ៖ ពន្លឺ