ខេត្តសៀមរាប៖ នៅមន្ទីរពេទ្យបង្អែកខេត្តសៀមរាប នារសៀលថ្ងៃទី៣១ ខែមីនា ឆ្នាំ២០២៥ ក្រុមការងារសង្គ្រោះ បឋម និងបន្ទាន់ព្រឹត្តិការណ៍អង្គរសង្ក្រាន្តឆ្នាំ២០២៥
សហការជាមួយមន្ទីរសុខាភិបាលនៃរដ្ឋបាលខេត្ត និងបានការសម្របសម្រួលពីមន្ទីរពេទ្យបង្អែកខេត្តបានរៀបចំវគ្គបណ្តុះបណ្តាលស្តីពីការសង្គ្រោះបឋម និងបន្ទាន់ដល់យុវជនស្ម័គ្រចិត្តចំនួន៥៤នាក់ជានិស្សិតកំពុងសិក្សានៅមហាវិទ្យាល័យសុខាភិបាលនៃសាកលវិទ្យាល័យអង្គរខេត្តសៀមរាប។
លោក ហួត សូនី ប្រធានក្រុមការងារសង្គ្រោះបឋម និងបន្ទាន់ព្រឹត្តិការណ៍អង្គរសង្ក្រាន្ត ឆ្នាំ២០២៥ មានប្រសាសន៍ថា៖ការបណ្តុះបណ្តាលនេះថ្វីត្បិតតែមានរយៈពេលតែកន្លះថ្ងៃតែវាមានសារៈសំខាន់ដើម្បីពង្រឹងសមត្ថភាព ចំណេះដឹងដល់យុវជននិងក្រុមការងារក្នុងការឆ្លើយតបប្រកបដោយប្រសិទ្ឋភាព អំពីរបៀប និងការប្រើប្រាស់ឧបករណ៍សង្គ្រោះ វិធីសាស្ត្រការ ជួយសង្គ្រោះបឋម និងបន្ទាន់ឱ្យបានត្រឹមត្រូវ ក្តាប់បានពីស្ថានភាពអ្នករងគ្រោះ ទំនាក់ទំនងស្វែងរកជំនួយសង្គ្រោះក្នុងគ្រាមានអាសន្នជាយថាហេតុណាមួយ និងប្រើដើម្បីសង្គ្រោះអាយុជីវិតជាបឋមដល់ជនរងគ្រោះនិងអាចពន្យាពេលរហូតដល់អ្នកសង្គ្រោះមកដល់។ ខ្លឹមសារនៃមេរៀន ផ្តោតលើជំនាញឆ្លើយ តបសង្រ្គោះបឋមសំខាន់ៗ ដូចជា CPR ការភ្ញោចចង្វាក់ បេះដូង រុំរបួស និងវិធីសាស្ត្រសង្គ្រោះអ្នកលង់ទឹក ខ្សែភ្លើងឆក់ ការប៉ះទង្គិច សាច់ដុំ ឆ្អឹង សន្លាក់ ជាដើម ជាការឆ្លើយតប សង្រ្គោះបឋមនិងបន្ទាន់។
លោក វេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប រំពឹងថា យុវជនក្រោយទទួលការបណ្តុះបណ្តាល បឋមនេះ នឹងយកចំណេះដឹងទៅប្រើប្រាស់ប្រកបដោយប្រសិទ្ឋភាព ក្នុងជួយសង្គ្រោះដល់ប្រជាពលរដ្ឋណាម្នាក់ដែល មកលែងកំសាន្តនៅក្នុងព្រឹត្តិការណ៍អង្គរសង្ក្រាន្ត រយៈពេលបីថ្ងៃ ខាងមុខនេះហើយជួបបញ្ហាសុខភាពជាយថាហេតុ នឹងអាចសង្គ្រោះបឋម ទៅតាមស្ថានភាពជាក់ស្តែង និងចាំបាច់ ផ្សេងៗ។
លោកប្រធានមន្ទីរបានស្នើដល់ក្រុមការងារសម្រប់សម្រួល សង្គ្រោះបឋមនិងបន្ទាន់ព្រឹត្តិការណ៍អង្គរសង្ក្រាន្តឆ្នាំ២០២៥ បែងចែកគ្នាជាក្រុមដើម្បីជួយពន្យល់ឱ្យយុវជនទាំងនេះយល់កាន់តែច្បាស់ពីវិធីសាស្ត្រសង្គ្រោះបឋម ហើយក៏សំណូមពរដល់ក្មួយៗថា៖ថ្វិបើជាការងារស្ម័គ្រចិត្ត តែនៅពេលប្រតិបត្តិការងារជាក់ស្តែងត្រូវស្គាល់តួនាទីភារកិច្ចរបស់ខ្លួន មានឥរិយាបទ និងអាកប្បករិយាទន់ភ្លន់រួសរាយ សមជាអ្នកជួយ សង្គ្រោះចៀសវាងភាពរើសអើងទៅលើអ្នកមានបញ្ហាសុខភាពហើយត្រូវការជំនួយសង្គ្រោះបឋម៕
ដោយ៖ ពន្លឺ
