ខេត្តព្រះវិហារ៖ តាមប្រភព័ត៌មានពីពលរដ្ឋស្រុកឆែប ខេត្តព្រះវិហារ បានជំរុញឲ្យអាជ្ញាធរខេត្តព្រះវិហារ ចាត់វិធានការទប់ស្កាត់សកម្មភាពជនជាតិចិនឆ្លងដែនខុសច្បាប់ពីប្រទេសឡាវចូលមកកម្ពុជា និងពីកម្ពុជាចេញទៅឡាវក្នុងភូមិសាស្ត្រឃុំកំពង់ស្រឡៅ១ និងឃុំកំពង់ស្រឡៅ២ ស្រុកឆែប ឱ្យមានប្រសិទ្ធភាព។ ការជំរុញនេះបន្ទាប់ពីមានអ្នកភូមិរាយការណ៍មកថា សកម្មភាពជនជាតិចិនលួចឆ្លងដែនខុសច្បាប់តាមទន្លេមេគង្គពីប្រទេសឡាវ ចូលមកកម្ពុជានិងពីកម្ពុជាទៅឡាវ កំពុងកើតមានយ៉ាងខ្លាំង ប៉ុន្តែការបង្ក្រាបរបស់អាជ្ញាធរមូលដ្ឋានហាក់មានតិចតួច។
ប្រភពដដែលបានបន្តថា ពលរដ្ឋមួយចំនួន នៅឃុំកំពង់ស្រឡៅ១ និងឃុំកំពង់ស្រឡៅ២ ស្រុកឆែប ខេត្តព្រះវិហារ អះអាងថា សកម្មភាពរត់ពន្ធជនជាតិចិនឆ្លងដែនខុសច្បាប់ពីប្រទេសឡាវចូលមកកម្ពុជា និងពីកម្ពុជាទៅឡាវ ឆ្លងទន្លេមេគង្គ កំពុងកើតមានទាំងយប់ទាំងថ្ងៃ បើទោះបីជាមានកម្លាំងចម្រុះរបស់រដ្ឋាភិបាលជាច្រើនបានដាក់ពង្រាយដើម្បីចាំទប់ស្កាត់នៅទីនោះក្តី ប៉ុន្តែស្ទើរតែរាល់ថ្ងៃមានជនជាតិចិនជិះទូកឆ្លងទន្លេមេគង្គពីប្រទេសឡាវ ចូលមកកម្ពុជាដោយខុសច្បាប់ បន្ទាប់ពីជនជាតិចិនទាំងនោះបានឆ្លងទូកពីប្រទេសឡាវ ចូលដល់ទឹកដីកម្ពុជារួចហើយ គឺមានឡានទំនើបៗមកដឹកចេញទៅកន្លែងផ្សេងភ្លាម។ ដោយពួកគាត់អះអាងថាពួកគាត់បានឃើញនិងមុខគឺចិនឆ្លងទូកមកគេឱ្យស្នាក់នៅនិងមាត់ទន្លេអង្គុយរង់ចាំនៅពេលឡានមកដល់ទើបដឹកចេញទៅ ជួនកាលឡានដឹកយកទៅទុកនៅកន្លែងកាស៊ីណូចិននៅទឹកជ្រោះព្រះនិមិត្តសិន រង់ចាំដល់ពេលយប់ទើបដឹកចេញទៅភ្នំពេញបន្ត។
ប្រភពខាងលើបានបញ្ជាក់ទៀតថា បច្ចុប្បន្ននេះ មានច្រកព្រំដែនផ្លូវទឹកជាច្រើនកន្លែង ដែលជនជាតិចិនតែងលួចឆ្លងដែនខុសច្បាប់ចូលមកកម្ពុជា ដូចជាច្រកតំបន់ទឹកធ្លាក់ព្រះនិមិត្ត នៅភូមិកំពង់សាមី ត្រង់តំបន់ចុងភូមិ និងដើមភូមិ នៅភូមិកំពង់ជ្រៃ ត្រង់ម្តុំចន្លោះពីភូមិកំពង់ជ្រៃ និងភូមិកំពង់ព្រះឥន្ទ្រ នៅភូមិកំពង់ក្រសាំងមានច្រកចំនួន២ និងនៅភូមិកំពង់ពោធិ នាតំបន់ព្រៃជាប់ច្រមុះភ្នំជាដើម។ អ្នកភូមិរិះគន់ថា នៅតាមច្រកព្រំដែនទាំងនោះ គឺសុទ្ធតែមានកម្លាំងចម្រុះរបស់រដ្ឋាភិបាលបានដាក់ពង្រាយដើម្បីទប់ស្កាត់បទល្មើសឆ្លងដែនខុសច្បាប់ និងទប់ស្កាត់សកម្មភាពរត់ពន្ធគ្រឿងញៀនឆ្លងដែន ក៏ប៉ុន្តែហេតុអ្វីបានជាជនជាតិចិននៅតែអាចលួចឆ្លងដែនខុសច្បាប់ចូលមកកម្ពុជា និងឆ្លងទៅឡាវបាន។
សេចក្តីរាយការណ៏ បានបញ្ជាក់បន្តថា សកម្មភាពដឹកជញ្ជូនជនជាតិចិនឆ្លងដែនដោយខុសច្បាប់នៅច្រកព្រំដែនកម្ពុជា-ឡាវ ក្នុងភូមិសាស្ត្រឃុំកំពង់ស្រឡៅ១ ស្រុកឆែប ខេត្តព្រះវិហារ គឺមានអ្នកធ្វើជាច្រើនក្រុមណាស់ ប៉ុន្តែមាន៤ក្រុម គឺសុទ្ធតែជាក្រុមដែលគេអះអាងថា ស្គាល់ឈ្មោះ និងតួនាទីពិតប្រាកដ។ សកម្មភាពនាំជនជាតិចិនឆ្លងដែនខុសច្បាប់របស់ពួកគេ មិនខុសពីសកម្មភាពការរកស៊ីបទល្មើសឈើក្រញូងកាលពីប៉ុន្មានឆ្នាំមុននោះទេ គឺគេរៀបចំខ្សែបណ្តាញយ៉ាងត្រឹមត្រូវច្បាស់លាស់ទៀតផង។
ប្រជាពលរដ្ឋបញ្ជាក់ថា សកម្មភាពបទល្មើសឆ្លងដែនពីឡាវមកកម្ពុជា និងពីកម្ពុជា-ទៅឡាវ ពិសេសបទល្មើសនាំជនជាតិចិនឆ្លងដែនខុសច្បាប់ទៅប្រទេសឡាវ គាត់ជឿជាក់ថា កម្រិតថ្នាក់ខេត្ត ថ្នាក់ស្រុក មិនអាចធ្វើការបង្ក្រាប និងទប់ស្កាត់បានទេ លុះត្រាតែមានការសហការពីកងកម្លាំង និងសមត្ថកិច្ចពាក់ព័ន្ធនៅថ្នាក់ជាតិ ទើបអាចបង្រ្កាបករណីនេះបាន។ បើចង់ដឹងថាតើអ្នកណាមួយ ឫក្រុមណាមួយ ដែលជាអ្នកនៅពីក្រោយខ្នងនៃការនាំជនជាតិចិនឆ្លងដែនខុសច្បាប់នោះ ត្រូវដាក់បណ្តាញតាមសង្កេតឃ្លាំមើល នោះពិតជាដឹងច្បាស់មិនខាន។
ពាក់ព័ន្ធករណីខាងលើអ្នកសារព័ត៌មានមិនអាចសុំការបំភ្លឺជុំវិញការលើកឡើងរបស់ពលរដ្ឋនេះពីលោកស្នងការនគរបាលខេត្តព្រះវិហារ លោកឧត្តមសេនីយ៍ទោ សួស សុខដារ៉ា បានទេនៅរសៀលថ្ងៃទី៣១ ខែមីនា ឆ្នាំ២០២៥ នេះ ដោយខលទូរស័ព្ទចូលជាច្រើនដងមិនលើក។
សូមបញ្ជាក់ផងដែរថា បើតាមរបាយការណ៍កិច្ចប្រជុំប្រចាំខែរបស់រដ្ឋបាលស្រុកឆែប កាលពីថ្ងៃទី២១ ខែកុម្ភៈ អភិបាលស្រុកស្តីទី លោក អ៊ុ សុភឿន បានទទួលយកការរាយការណ៍របស់ពលរដ្ឋដែលថា មានជនជាតិចិនតែងលួចឆ្លងដែនខុសច្បាប់ពីឡាវចូលមកកម្ពុជា និងពីកម្ពុជាទៅឡាវ កំពុងកើតមានទាំងយប់ទាំងថ្ងៃនេះ។ ជាមួយនោះ លោក អ៊ុ សុភឿន ជំរុញឱ្យកម្លាំងចម្រុះដែលដាក់ពង្រាយនៅតាមច្រកព្រំដែន ត្រូវរឹតបន្តឹងលើការអនុវត្តច្បាប់ថែមទៀត ដើម្បីទប់ស្កាត់ជនអន្តោប្រវេសន៍ឆ្លងដែនខុសច្បាប់ឱ្យមានប្រសិទ្ធភាព។
តាមរបាយការណ៍នៃកិច្ចប្រជុំស្ដីពីការទប់ស្កាត់ និងបង្ក្រាបបទល្មើសនៅតាមព្រំដែនកម្ពុជា-ឡាវ របស់សាលាខេត្តព្រះវិហារ កាលពីខែវិច្ឆិកា ឆ្នាំ២០២៤ ក៏ធ្លាប់បញ្ជាក់ដែរថា គិតត្រឹមខែតុលា ឆ្នាំ២០២៤ សមត្ថកិច្ចខេត្តព្រះវិហារ បានឃាត់ខ្លួនជនជាតិចិនឆ្លងដែនខុសច្បាប់ចំនួន៥៦នាក់ និងបង្ក្រាបបទល្មើសគ្រឿងញៀនដោយឃាត់ខ្លួនជនសង្ស័យចំនួន ២១នាក់ ព្រមទាំងដកហូតបានគ្រឿងញៀនជាច្រើនប្រភេទទម្ងន់ជាង ៦៤៨គីឡូក្រាមផងដែរ៕
ដោយ៖ លោក ទ្រី សុផល
