ខេត្តសៀមរាប៖ នៅរសៀលថ្ងៃទី២៧ ខែមីនា ឆ្នាំ២០២៥ នេះ ឯកឧត្តម អែល សៀត សមាជិកក្រុមប្រឹក្សាខេត្ត និងជាប្រធានគណៈចលនាសាសនិកឥស្លាមខេត្តសៀមរាប រួមជាមួយ លោក ស្រេន សុព្រី សមាជិកប្រឹក្សាក្រុងសៀមរាប និង លោក ហ៊ា ហាវ ចៅសង្កាត់ស្វាយដង្គំ លោកមេភូមិស្ទឹងថ្មី ព្រមទាំងគណៈគ្រប់គ្រងសាសនាឥស្លាមខេត្តសៀមរាប រួមនិង លោក កូប ស្មាអេល នាយកអប់រំខ្មែរឥស្លាមចូលរួមផងដែរ បាននាំយកកញ្ចប់អាហារសម្រាប់ស្រាយបួសខែរ៉ាម៉ាឌនដែលជាគ្រឿងឧបភោគបរិភោគចែកជូនដល់បងប្អូនប្រជាពលរដ្ឋដែលជាសាសនិកឥស្លាមមានជីវភាពខ្វះខាតចំនួន៧០គ្រួសារនៅវិហារឥស្លាមអាន់នៀកម៉ះដែលស្ថិតនៅក្នុងភូមិស្ទឹងថ្មីសង្កាត់ស្វាយដង្គំ ក្រុងសៀមរាប។
ឯកឧត្តម អែល សៀត បានមានប្រសាសន៍ថាកញ្ចប់អាហារសម្រាប់ស្រាយបួសខែម៉ារ៉ាឌនដែលយកមកជូនសាសនិកឥស្លាមដែលមានជីវភាពខ្វះខាតនាពេលនេះគឺទទួលបានការឧបត្ថម្ភពីអង្គការសមាគមយ៉ាយ៉ាសានចាមីន របស់ប្រទេស ម៉ាឡេស៊ីដែលផ្តល់តាមរយៈ ឯកឧត្តមផ្ទាល់។
ឯកឧត្តមបន្តថា អំណោយដែលផ្តល់ជូននាពេលនេះ មិនអាច ជួយសម្រាលបន្ទុកជីវភាពគ្រួសាររបស់សាសនិកក្នុងរយៈពេលយូរអង្វែងនោះទេ ប៉ុន្តែនេះជាទឹកចិត្តរបស់សប្បុរសជន នៃប្រទេសម៉ាឡេស៊ី ក្នុងនាមសាសនិកឥស្លាមដូចគ្នា។
ឯកឧត្តមបានមានប្រសាសន៍បញ្ជាក់បន្ថែមទៀតថា ជារៀងរាល់ឆ្នាំ អង្គការសមាគមយ៉ាយ៉ាសានចាមីន របស់ប្រទេស ម៉ាឡេស៊ីតែងតែផ្តល់ជំនួយកញ្ចប់អាហារដល់សហគមន៍ឥស្លាមខេត្តសៀមរាប ដើម្បីចែករំលែកដល់សាសនិកដែល។ មានជីវភាពខ្វះខាតផងដែរ។
ក្នុងនាមសាសនិកឥស្លាមខេត្តសៀមរាប ឯកឧត្តម អែល សៀត បានថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់ អង្គការសមាគមយ៉ាយ៉ាសានចាមីន របស់ប្រទេសម៉ាឡេស៊ីដែលជារៀងរាល់ឆ្នាំតែងតែផ្ដល់ការយកចិត្តទុកដាក់ និងឧបត្ថម្ភដល់សាសនិកឥស្លាមក្នុងខេត្តសៀមរាប។
ក្នុងនោះដែរ ឯកឧត្តម អែល សៀត បានមានប្រសាសន៍បញ្ជាក់បន្ថែមទៀតថាការអំណត់អទ់ធន់ក្នុងការបួសរបស់សាសនិកឥស្លាមចំនួន១ខែ ឥលូវនេះគឺបានរយះពេល២៧ថ្ងៃ នៅសល់តែចំនួន៣ឬ៤ថ្ងៃទៀតទេនិងត្រូវបញ្ចប់នៃការបួស ខែរ៉ាម់ាឌនរបស់សាសនិកឥស្លាមផងដែរ៕
ដោយ៖ ពន្លឺ
