រាជធានីភ្នំពេញ÷ តាមសេចក្តីរាយការណ៍នាថ្ងៃទី២៨ ខែមករា ឆ្នាំ២០២៥ នៅចំនុះក្រោយមន្ទីរពេទ្យសែនសុខ ផ្លូវលេខ ១០១១ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មានទីតាំងល្បែងឡូតូ៨៨៨៨ មួយកន្លែងដែលបានកំពុងជ្រោកក្រោមហាងកាហ្វេគ្មានស្លាកយីហោ បាននឹងកំពុងបើកទទួលក្រុមអ្នកញៀនល្បែងគ្រប់ប្រភេទចូលលេងយ៉ាងគគ្រឹកគគ្រេងភ្លេចបាយភ្លេចទឹក ខ្លះខ្ចប់ប្រាក់ក្រុមហ៊ុនទាំងកាបូបមកចាក់យ៉ាងអាណាធិបតេយ្យដោយគ្មានការខ្លារអារជាមួយច្បាប់ស្តីពីការគ្រប់គ្រងល្បែងពាណិជ្ជកម្ម ជាពិសេសបទបញ្ជាសម្តេចតេជោអតីតនាយករដ្ឋមន្ត្រី បន្តមកបទបញ្ជាសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី អាណត្តិទី៧ នៃរដ្ឋសភា។
យោងតាមអាខោនតេឡេក្រាមដែលមានឈ្មោះ ប៊ុន ស្រ៊ាង (Bun Sreang) បានប្រាប់ថាខ្លួនជាអ្នកធ្វើការងាររាជការ និងជាម្ចាស់ហាងកាហ្វេ មានប្រពន្ធជាអ្នកលក់ដូរកាហ្វេនៅទីតាំងខាងលើបានឱ្យដឹងថា ខ្លួនបានជួលទីតាំងដាក់តុឱ្យថៅកែល្បែងនោះដើម្បីបានប្រាក់ ហើយម្យ៉ាងទៀតលោកថាគេបើកលេងល្បែងទូទាំង១៤ខណ្ឌ មិនឃើញមានសមត្ថ កិច្ចណាចុះបង្ក្រាបឡើយ ចុះហេតុអីកន្លែងខ្ញុំបើកមិនបាន។ មួយទៀតលោកថាម្ចាស់ល្បែងគេបានដាក់ខែឱ្យអាជ្ញាធរមូលដ្ឋានអស់ហើយ។
ទាក់ទងការលើកឡើងខាងលើរបស់បុគ្គលដែលមានឈ្មោះ ប៊ុន ស្រ៊ាង (Bun Sreang) នោះអ្នកសារព័ត៌មានយើងបានរាយការណ៍ដោយផ្ញើរូបភាពទីតាំងល្បែងនោះទៅកាន់លោក ហួរ ម៉េងវ៉ាង អធិការនគរបាលខណ្ឌសែនសុខ លោកគ្រាន់តែចូលមើលហើយមិនមានការឆ្លើយតប។
តាមប្រភពពីប្រជាពលរដ្ឋរស់នៅក្បែរទីតាំងខាងលើសុំមិនបញ្ចេញឈ្មោះបានឱ្យដឹងថា គាត់តែងតែបានលឺពីម្ចាស់ទីតាំងនោះថាគេបានចំណាយបង់ប្រាក់ប្រចាំខែឱ្យជំនាញអស់ហើយគឺគ្មានអាណាមកចាប់ ឬបិទទីទាំងល្បែងគេបានឡើយ។
មហាជនស្នើសុំដល់លោក ម៉ូវ ម៉ានិត អភិបាលខណ្ឌសែនសុខ មេត្តាបញ្ចាកម្លាំងចុះបង្ក្រាប និងអប់រំម្ចាស់ផ្ទះកុំបន្តកិច្ចសន្យា ជួលដាក់ទីតាំងនោះឱ្យមេល្បែងបន្តដែល ឬនាំឱ្យខាតចំណូល លើពន្ធកាត់ទុករបស់រដ្ឋបន្តទៀត។
ដោយ÷ សត្យា
