រាជធានីភ្នំពេញ ៖ មន្រ្តីកាំកុងត្រូលផែស្ងួតចុងទីភ្នំពេញសាខារាជធានីភ្នំពេញ និងមន្រ្តីមន្ទីរពិសោធន៍ សហការជាមួយមន្ទីរពាណិជ្ជកម្ម, មន្ទីរឧសហ្សាកម្ម នៅថ្ងៃទី៤ ខែមករា ឆ្នាំ២០១៩ បានចុះបិទសិប្បកម្មអំបិលមួយកន្លែង នៅខណ្ឌព្រែកព្នៅ ក្រោយពិនិត្យឃើញថា គ្មានច្បាប់អនុញ្ញាត និងគ្មានអនាម័យ។
ប្រតិបត្តិការនេះបានធ្វើឡើង ដោយយោងតាមពាក្យបណ្តឹងរបស់ប្រជាពលរដ្ឋថា មានសិប្បកម្មអំបិលអ៊ីយ៉ូដ ចំនួន០២ទីតាំងនៅទីនោះ បានបើដំណើរការសង្ស័យគ្មានច្បាប់ និងគ្មានអនាម័យ។
លោក គង់ វុទ្ធី អនុប្រធានសាខាកាំកុងត្រូវផែស្ងួតចុងទីភ្នំពេញ ដែលដឹកនាំមន្ត្រីចុះផ្ទាល់បានឲ្យដឹងថា សិប្បកម្មពីរទីតាំងខាងលើនេះរួមមាន៖
ទី១៖ សិប្បកម្មអំបិលស្ថិតនៅផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ក្រុមការងារបានត្រួតពិនិត្យ និងពិសោធន៍ឃើញថាមានអំបិលអ៊ីយ៉ូដម៉ត់ជាតិអីយ៉ូដ៩០PPM (លើសអ៊ីយ៉ូដ), អំបិលគ្រួសគ្មានជាតិអ៊ីយ៉ូដ។ ក្រោយពីការត្រួតពិនិត្យឃើញថា សិប្បកម្មនេះពុំមានច្បាប់ គ្មានអនាម័យ ទើបគណៈកម្មការសំរេចឲ្យផ្អាកបណ្តោះអាសន្នឲ្យម្ចាស់ធ្វើច្បាប់ និងរៀបចំ អនាម័យឲ្យបានល្អឡើងវិញ។
ទី២៖ ស្ថិតនៅផ្លូវជាតិលេខ៥ សង្កាត់ព្រែកព្នៅ ខណ្ឌព្រែកព្នៅ គណៈកម្មការបានធ្វើពិសោធន៏ អំបិលអ៊ីយ៉ូដម៉ត់ មានជាតិអ៊ីយ៉ូដ២០PPM (ខ្វះជាតិអ៊ីយ៉ូដ), អំបិលគ្រួសមានជាតិអ៊ីយ៉ូដ៧០PPM ក្រោយពីការត្រួតពិនិត្យ ឃើញថា សិប្បកម្មនេះមានច្បាប់ និងធ្វើការណែនាំផ្នែកអនាម័យឲ្យបានល្អហើយ ឲ្យដំណើរការធម្មតា និងយកគំរូមួយចំនួនបញ្ជូន ទៅមន្ទីរពិសោធនែអគ្គនាយកដ្ឋានកាំកុងត្រូល។
លោក គង់ វុទ្ធី បានបន្តថា ចំពោះសកម្មភាពទាំងនេះ គឺអនុវត្តន៍ទៅតាមការណែនាំរបស់ប្រតិភូរាជរដ្ឋ ភិបាលទទួលបន្ទុកអគ្គនាយកដ្ឋានកាំកុងត្រូល ឯកឧត្តម ម៉ក់ ពិជ្ជរិទ្ធ និងលោកប្រធានសាខាកាំកុងត្រូលរាជធានីភ្នំពេញ៕
ដោយ ៖ សិរីបុត្រ
