ខេត្តត្បូងឃ្មុំ ៖ នៅស្នាក់ការគណបក្សស្រុកតំបែរ នាព្រឹកថ្ងៃសៅរ៍ ១៤រោច ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៥ ខែមករា ឆ្នាំ២០១៩ បានប្រារព្វមិទ្ទិញខួបអនុស្សាវរីយ៍លើកទី៤០ ទិវាជ័យជម្នះ ៧មករា និងធ្វើការផ្សព្វផ្សាយពីលទ្ធផលរបស់មហាសន្និបាតគណ:កម្មាធិការកណ្តាលគណបក្សប្រជាជនកម្ពុជាលើកទី៤១ អាណត្តិទី៥។ ពិធីនេះ ស្ថិតក្រោមអធិបតីភាពឯកឧត្តម វេង សាខុន ប្រធានក្រុមការងារថ្នាក់កណ្ដាលចុះជួយស្រុកតំបែរអមដោយប្រធាន អនុប្រធានក្រុមការងារ សមាជិក សមាជិកាបក្សឃុំ ភូមិ គណ:កម្មការ ស២៦ ស២៧ យុវជន ក្រុមការងារស្រ្តីឃុំ សរុបប្រមាណ ៥៦០នាក់ បានអញ្ជើញចូលរួម។
បន្ទាប់ពីលោក នាដ្ឋ រ៉ាវុធ ប្រធានគណ:កម្មការគណៈបក្សស្រុកមានមតិស្វាគមន៍រួចមក ឯកឧត្តមប្រធានក្រុមការងារបានធ្វើការសំណេះសំណាលជាមួយសមាជិក សមាជិកាអំពីខ្លឹមសារនិងអត្ថន័យជាប្រវត្តិសាស្ត្រនៃខួបអនុស្សាវរីយ៍លើកទី៤០ ទិវាជ័យជម្មះ ៧មករា។ លោកបានបញ្ជាក់ថាថ្ងៃជ័យជម្មះ ៧មករា នេះបានឆ្លុះបញ្ចាំងយ៉ាងប្រចក្សពីឆន្ទ: មនសិការ និងគុណបំណាច់របស់វីរ:កម្មាភិបាល វីរ:យុវជន យុវនារីស្នេហាជាតិ និងប្រជាជនគ្រប់មជ្ឈដ្ឋានដែលបានក្រោកឈរឡើងតស៊ូ ធ្វើពលីកម្ម បូជាអាយុជីវិតយ៉ាងអង់អាចក្លាហានដើម្បីរំដោះជាតិ មាតុភូមិ និងប្រជាជនចេញពីរបបប្រល័យពូជសាសន៍ប៉ុល ពត នាថ្ងៃ ៧មករា ឆ្នាំ១៩៧៩។
ពន្លឺជ័យជម្មះជាប្រវត្តិសាស្ត្រយ៉ាងត្រចះត្រចង់នេះ បានធ្វើឲ្យប្រទេសជាតិ និងប្រជាជនទូទាំងប្រទេសទទួលបានយ៉ាងពេញលេញនូវសុខសន្តិភាព ស្ថិរភាព និងការអភិវឌ្ឍន៍ទូទាំងផ្ទៃប្រទេសជាបន្តបន្ទាប់រហូតសម្រេចបាននូវសមិទ្ធផលយ៉ាងធំធេងលើគ្រប់វិស័យដូចយើងបានឃើញក្នុងពេលបច្ចុប្បន្ន។ ដើម្បីរក្សាការពារ និងបន្តអភិវឌ្ឍន៍ប្រទេសជាតិឲ្យកាន់តែររីកចម្រើនបន្ថែមទៀត ឆ្លើយតបទៅតាមសេចក្តីត្រូវការជាចាំបាច់របស់ប្រទេសជាតិ និងប្រជាជន រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា កាលពីថ្ងទី១៨ ដល់ថ្ងៃទី២០ ខែធ្នូ ឆ្នាំ ២០១៨ បានធ្វើសន្និបាតគណ:កម្មាធិការកណ្តាលលើកទី៤១ ដើម្បីបូកសរុបលទ្ធផលដែលសម្រេចបាន វាយតម្លៃលើចំណុចខ្លាំង និងចំណុចខ្សោយ រួចដាក់ចេញនូវគោលនយោបាយ និងយុទ្ធសាស្ត្រស៊ីជម្រៅដើម្បីបន្តរក្សាសុខសន្តិភាព ស្ថិរភាព និងការអភិវឌ្ឍន៍ឈានទៅសម្រេចឲ្យបាននូវចក្ខុវិស័យនាឆ្នាំ២០៣០ និង២០៥០។
ពិតណាស់ដើម្បីគាំទ្រ និងចូលរួមសម្រេចឲ្យបាននូវផែនការយុទ្ធសាស្រ្ត និងចក្ខុវិស័យនេះ ឯកឧត្តមបាននាំយកលទ្ធផលរបស់មហាសន្និបាតទាំង ១១ចំណុច ផែនការ និងទិសដៅអនុវត្តបន្ត ព្រមជាមួយអនុសាសន៍សំខាន់ៗរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា មកផ្សព្វផ្សាយ និងបានធ្វើការណែនាំបន្ថែមដល់សមាជិក សមាជិកាគ្រប់លំដាប់ថ្នាក់លើចំណុចសំខាន់ៗស្របតាមទិដ្ឋភាព និងស្ថានការណ៍ជាក់ស្តែងនៅមូលដ្ឋានផ្ទាល់ ដើម្បីយកទៅធ្វើជាត្រីវិស័យក្នុងការកសាង ការពារ និងអភិវឌ្ឍន៍ប្រទេសជាតិ ដោយឡែកអភិវឌ្ឍន៍ស្រុកតំបែរឲ្យមានការរីកចម្រើនបន្ថែមទៀត។
នាឱកាសនេះផងដែរ ឯកឧត្តមបានផ្តាំផ្ញើដល់សមាជិក មាជិកាថាយើងមិនត្រូវមានមោទភាពលើជ័យជម្មះដែលយើងទទួលបានពេកទេ ផ្ទុយទៅវិញត្រូវបង្កើនស្មារតីប្រុងប្រយ័ត្នខ្ពស់ក្នុងការការពារ និងថែរក្សាឲ្យបាននូវសុខសន្តិភាព ស្ថិរភាពសង្គម ប្រឆាំងដាច់ខាតនូវចលនាបដិវត្តន៍ព័ណ៌គ្រប់រូបភាព ហើយចាំបាច់ត្រូវបង្កើនស្មារតីទទួលខុសត្រូវ និងយកចិត្តទុកដាក់អនុវត្តអនុសាសន៍របស់សម្តេចតេជោហ៊ុន សែន ប្រធានគណបក្ស ប្រជាជនកម្ពុជា និងជានាយករដ្ឋមន្ត្រី គឺត្រូវចុះមូលដ្ឋានបម្រើប្រជាជនដោយស្មោះត្រង់ ពេញលេញ សកម្ម ទូលំទូលាយ ទាន់ពេលវេលា មានការទទួលខុសត្រូវ និងមានប្រសិទ្ធភាពខ្ពស់ និងជាពិសេសត្រូវបន្តអនុវត្តគោលនយោបាយ ក៣ (កើត អាពាហ៍ពិពាហ៍ និងមរណភាព) និងត្រូវពង្រឹងសេវាសាធារណៈ នៅមូលដ្ឋានស្រុកតំបែរឲ្យកាន់តែមាន ប្រសិទ្ធភាព។
ដោយ ៖សិរីបុត្រ
