សាកសពឃាតករ ដែលបានលោតទឹកសម្លាប់ខ្លួនក្រោយពេលសម្លាប់សង្សារបស់ខ្លួន បានរកឃើញហើយ

ខេត្តសៀមរាប÷ ក្រោយពេលកើតហេតុ កម្លាំងសមត្ថកិច្ចបានធ្វើការ ស្រាវជ្រាវស្វែងរកជនសង្ស័យ រហូតដល់ម៉ោង១៣និង២០នាទី ថ្ងៃទី០៦ ខែវិច្ឆិកា ឆ្នាំ២០២៤ កម្លាំងសមត្ថកិច្ចបានរកឃើញសាកសពរបស់ជនសង្ស័យ ឈ្មោះ ផាន ជីនី ភេទប្រុស អាយុ ២៤ ឆ្នាំ ថ្នាក់ទី១២ រស់នៅភូមិភ្លង់ ឃុំលាងដៃ ស្រុកអង្គរធំ ខេត្តសៀមរាប បានមកលោតទឹកសម្លាប់ខ្លួននៅទំនប់ទឹក ស្ថិតក្នុងភូមិនគរក្រៅ សង្កាត់គោកចក ក្រុង  ខេត្តសៀមរាប នៅក្រោយពេលសម្លាប់សង្សារបស់ខ្លួន ។

តាមការបញ្ជាក់ពីលោកវរសេនីយ៍ឯក សុខ  ម៉េង អ៊ាង ប្រធានការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាបបានឲ្យដឹងថា យុវតី ជានិស្សិតឆ្នាំទី៤ ផ្នែកច្បាប់ម្នាក់ ត្រូវបានសង្សាចាក់សម្លាប់ចំនួន ២៣ កាំបិតនៅក្នុងផ្ទះបណ្តាល ឲ្យស្លាប់ ខណៈនៅពេលបញ្ជូនទៅកាន់មន្ទីរ ពេទ្យបង្អែកខេត្តសៀម ចំណែកឯជនសង្ស័យជា(សង្សារ) បានជិះម៉ូតូរត់គេចខ្លួន និងយកម៉ូតូទៅប្លុងចោលនៅត្រង់ចំណុចក្បែរខ្លោងទ្វារតាកៅ ខាងលិចក្រុងអង្គរធំ  និង ស្បែកជើង ទុកចោលនៅមាត់ទឹក ស្ថិតក្នុងភូមិគោកតាចាន់ សង្កាត់គោកចក ក្រុង ខេត្តសៀមរាប ។

ក្នុងហេតុការណ៍ឃាតកម្មនេះ បានកើតឡើងនៅវេលាម៉ោង០៨និង០០នាទី ព្រឹកថ្ងៃទី៦ ខែវិច្ឆិកា ឆ្នាំ២០២៤ ត្រង់ចំណុចតូបលក់កាហ្វេ របស់ជនរងគ្រោះ តាមបណ្ដោយផ្លូវព្រលានយន្តហោះចាស់ ស្ថិតក្នុងភូមិគោកដូង សង្កាត់ទឹកវិល ក្រុងសៀមរាប។ លោកបានបន្តទៀតថា ជនសង្ស័យ ឈ្មោះ ផាន ជីនី ភេទប្រុស អាយុ ២៤ឆ្នាំ មុខរបរអ្នកឌីហ្សាញ រស់នៅភូមិភ្លង់ ឃុំលាងដៃ ស្រុកអង្គរធំ ខេត្តសៀមរាប ជាអតីតសង្សារចាស់របស់ជនរងគ្រោះ បានធ្វើសកម្មភាពយកកាំបិតចុងស្រួចចាក់ទៅលើជនរងគ្រោះ ឈ្មោះ វណ្ណ សុភ័ក្តតា ភេទស្រី អាយុ ២៣ឆ្នាំ មុខរបរ លក់កាហ្វេ ជានិស្សិតឆ្នាំទី៤ ផ្នែកច្បាប់បច្ចុប្បន្នរស់ភូមិគោកដូង សង្កាត់ទឹកវិល ក្រុង ខេត្តសៀមរាប ខណះពេលដែល ជនរងគ្រោះមកបើកតូបលក់កាហ្វេ ជនសង្ស័យបានជិះម៉ូតូមក ហើយចូលធ្វើសកម្មភាព យកកាំបិតចុងស្រួច ចាក់ទៅលើជនរងគ្រោះជាច្រើនកាំបិត បណ្តាលឲ្យរងរបួសធ្ងន់ ក្រោយពេលបញ្ជូនទៅដល់មន្ទីពេទ្យបង្អែកខេត្តសៀមរាប ក៏បានស្លាប់បាត់បង់ជីវិត ។ ចំណែកជនសង្ស័យ ក្រោយពេលធ្វើសកម្មភាពហើយបានជិះម៉ូតូគេចខ្លួនទៅលោតទឹកសម្លាប់ខ្លួន។

បច្ចុប្បន្ន សពជនសង្ស័យ ត្រូវបានកម្លាំងនគរបាលជំនាញ សហការជាមួយ កម្លាំងនគរបាលការិយាល័យបច្ចេកទេស ធ្វើកោសល្យវិច័យ ដើម្បីប្រគល់សព ជូនក្រុមគ្រួសារ យកទៅធ្វើបុណ្យតាមប្រពៃណី នៅល្ងាចថ្ងៃនេះផងដែរ ៕

ដោយ÷ ពន្លឺ