ខេត្តសៀមរាប÷ នៅព្រឹកថ្ងៃទី០២ ខែវិច្ឆិកាឆ្នាំ២០២៤ នេះនៅមជ្ឈមណ្ឌលជាតិយុវជនកម្ពុជាខេត្តសៀមរាបក្រសួងអប់រំយុវជន និងកីឡា បានបើកកម្មវិធីប្រគួតប្រជែងស្នាដៃយុវជនសតវត្យរ៍ទី២១ឆ្នាំ២០២៤ ក្រោមប្រធានបទ”STEM ក្នុងវិស័យថាមពលបៃតង” ដោយមានការអញ្ជើញចូលរួមពីសំណាក់ លោក ម៉ិល ផនសីហា ប្រធាននាយកដ្ឋានអប់រំយុវជន និងកុមារនៃក្រសួងអប់រំយុវជន និងកីឡា ព្រមទាំងមានការចូលរួមពីសំណាក់លោក លោកស្រីតំណាងមន្ទីរអប់រំយុវជនរាជធានីខេត្ត។
នៅក្នុងកម្មវិធីនេះដែរគឺមានបេក្ខជនប្រគួតប្រជែងចំនួន ២៥ក្រុមដែលជាសិស្សានុសិស្សមកពីបណ្តាវិទ្យាល័យដែលបានជ្រើសរើសមកចូលរួមប្រគួតទាំង២៥រាជធានីខេត្ត។ លោក ម៉ិល ផនសីហា ប្រធាននាយកដ្ឋានអប់រំយុវជន និងកុមារនៃក្រសួងអប់រំយុវជន និងកីឡា បានមានប្រសាសន៍ថាការបើកកម្មវិធីប្រគួតប្រជែងស្នាដៃយុវជនសតវត្យរ៍ទី២១ឆ្នាំ២០២៤ក្រោមប្រធានបទ “STEM ក្នុងវិស័យថាមពលបៃតង”នាពេលនេះគឺមានគោលបំណងដូចជា៖ អភិវឌ្ឍសមត្ថភាពយុវជនកម្ពុជា លើជំនាញសរសេរគម្រោងស្នាដៃ និងហ៊ានចូលរួម ប្រកួតប្រជែងដណ្តើមជ័យលាភី-បណ្តុះស្មារតីយុវជន ឱ្យចេះទទួលខុសត្រូវមានសេចក្តីក្លាហានចូលរួមចំណែកនិងទទួលយកបទពិសោធថ្មីៗ បង្កើនការយកចិត្តទុកដាក់ក្នុងការសិក្សា (STEM) និងមាន គំនិតផ្តួចផ្តើមច្នៃប្រឌិត និងនវានុវត្តន៍-បង្កើតទម្លាប់ប្រើប្រាស់ថាមពលកកើតឡើងវិញប្រកបដោយស្មារតីទទួលខុសត្រូវ និងសន្សំសំចៃ ដើម្បីចីរភាពបរិស្ថានសារសំខាន់នៃថាមពលបៃតង។
លោកបានបន្តថាក្នុងនាមយុវជនសតវត្សរ៍ទី២១ គឺត្រូវមានសមត្ថភាព មានទំនុកចិត្ត ភាពក្លាហាន ស្មារតីសាមគ្គីភាព ក្នុងកិច្ចការ ស្រាវជ្រាវនូវអ្វីដែលថ្មី និងបង្កើតស្នាដៃ ថ្មីសម្រាប់ជាប្រយោជន៍ដល់ សង្គមជាតិ។ នៅក្នុងនោះដែរ លោក ម៉ិល ផនសីហា ក៏បានជំរុញ និងលើកទឹកចិត្តដល់សិស្សានុសិស្សជាសិក្ខាកាមទាំងអស់ ថានៅក្នុងរយៈពេលនៃការប្រគួតនេះ សូម យកចិត្ត ទុកដាក់សិក្សាឈ្វេងយល់ឱ្យបាន ស៊ីជម្រៅ លើខ្លឹមសារមេរៀន ដែលវាគ្មិន បង្ហាត់បង្ហាញ ព្រោះនេះគឺជាឱកាស សម្រាប់ប្អូនៗត្រូវចាប់យកចំណេះដឹង និង បទពិសោធន៍ថ្មីៗ ដើម្បីជាទុនក្នុងការផ្សារភ្ជាប់ទ្រឹស្តីទៅនឹងការអនុវត្តជាក់ស្តែងលើការប្រគួតប្រជែងគម្រោងស្នាដៃរបស់ខ្លួន ហើយយើងទាំងអស់គ្នាត្រូវ ការបង្កើតទំនាក់ទំនងល្អរវាងយុវជនមកពីគ្រប់មជ្ឈដ្ឋាន និងបទពិសោធន៍ ចំណេះធ្វើដែលទទួលបានពីការចូលរួមកម្មវិធី និងការរៀបចំគម្រោង ដូចជា បំណិនការងារជាក្រុម ភាពជាអ្នកដឹកនាំ ភាពអត់ធ្មត់ ភាពជឿជាក់លើខ្លួនឯង នឹងក្លាយជាទុនសម្រាប់ប្អូនៗទាំងអស់គ្នា យកទៅប្រើប្រាស់ជា ប្រយោជន៍សម្រាប់ការរស់នៅប្រចាំថ្ងៃ។ ជាពិសេសស្មារតីចូលរួម និងផ្តល់ត្រឡប់ឱ្យសង្គមវិញ តាមរយៈការស្ម័គ្រចិត្ត ដែលនឹងជួយ យើង ឱ្យស្គាល់ខ្លួនឯង និងចូលរួមចំណែកក្នុងការដោះស្រាយបញ្ហា និងការអភិវឌ្ឍសហគមន៍ផងដែរ៕
