ខេត្តសៀមរាប÷ នៅព្រឹកថ្ងៃទី០១ ខែវិច្ឆិកា ឆ្នាំ២០២៤ នេះសាលាបឋមសិក្សាបន្ទាយឈើ ដែលស្ថិតនៅភូមិបន្ទាយឈើ សង្កាត់ទឹកវិល ក្រុងសៀមរាប បានប្រារព្ធពិធីបើកបវេសនកាលឆ្នាំថ្មីឆ្នាំសិក្សា២០២៤- ២០២៥ ព្រមទាំងចែករង្វាន់ដល់សិស្សពូកែប្រចាំសាលាផងដែរ។
នៅក្នុងពិធីនោះដែរក៏មានការនិមន្តជាព្រះអធិបតីពីសំណាក់ព្រះសនសត្ថា តង់ តន ព្រះបាឡាត់គណខេត្តនិងជាព្រះគ្រូចៅអធិការវត្តព្រះព្រហ្មរ័ត្ន និងព្រះសច្ចានុបាល នឿម វុទ្ធី ព្រះរាជាគណៈកិត្តិយស ព្រះចៅអធិការវត្តស្វាយរមៀត និងជាប្រធានកិត្តិយសគណៈកម្មការគ្រប់គ្រងសាលាបឋមសិក្សាបន្ទាយឈើព្រមទាំងមានការអញ្ជើញចូលរួមពីសំណាក់អាជ្ញាធរសង្កាត់តំណាងមន្ទីរអប់រំយុវជននិងកីឡាខេត្ត អាជ្ញាធរមូលដ្ឋាននិងមាតាបិតាអាណាព្យាបាលសិស្សចូលរួមផងដែរ។
នៅក្នុងអត្ថន័យសារលិខិតរបស់សម្តេចមហាបវរធិបតី ហ៊ុន ម៉ាណែត បើកបវេសនកាលឆ្នាំសិក្សាថ្មីឆ្នាំ២០២៤-២០២៥ ដែលអានដោយលោកប្រធានការិយាល័យអប់រំក្រុងសៀមរាប ដែលមានខ្លឹមសារថា ៖ ថ្ងៃទី១ ខែវិច្ឆិកា ឆ្នាំ២០២៤ ជាថ្ងៃបើកទំព័រថ្មី នៃការចាប់ផ្តើមជីវិតសិក្សាដំបូងរបស់ក្មួយៗ ដែលទើបនឹង ដល់អាយុត្រូវចូលសាលារៀន ជាពិសេសកុមារតូច នៅតាមសាលាមត្តេយ្យសិក្សា និងកុមារអាយុ៦ឆ្នាំ នៅតាមសាលាបឋមសិក្សា ព្រមទាំងជាថ្ងៃថ្មីរបស់ក្មួយៗ ដែលបានឡើងពីកម្រិតថ្នាក់មួយ ទៅកម្រិតថ្នាក់មួយទៀត នៅក្នុងឆ្នាំសិក្សា២០២៤-២០២៥។ ក្នុងសារលិខិតអបអរសាទរថ្ងៃបើកបវេសនកាលនេះដែរ សម្តេចមហាបវរធិបតីនាយករដ្ឋមន្ត្រី បានលើកឡើងថា ក្នុងគោលបំណងកសាងមូលធនមនុស្សប្រកបដោយចំណេះដឹង ចំណេះធ្វើ គុណធម៌ និងសុខភាពល្អ មាំមួន រាជរដ្ឋាភិបាលកម្ពុជានីតិកាលទី៧នៃរដ្ឋសភា បានដាក់ចេញនូវវិធានការគន្លឹះចំនួន៥ ក្នុងនោះ ក៏មានវិធានការគន្លឹះក្នុងវិស័យអប់រំដែលមានគោលដៅលើកកម្ពស់គុណភាពអប់រំ។ ហើយឆ្នាំទី១នៃរាជរដដ្ឋាភិបាលនីតិកាលថ្មី រាជរដ្ឋាភិបាល តាមរយៈក្រសួងអប់រំ យុវជន និងកីឡា បានយកចិត្តទុកដាក់និងដាក់ចេញនូវកម្មវិធី ផ្សេងៗ សំដៅលើកកម្ពស់គុណភាពអប់រំ ដោយផ្តោតលើការពង្រឹងគុណភាពសាលារដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា តាមរយៈវិធានការចំនួន៤ រួមមាន៖ ទី១- ការពង្រឹងអភិបាលកិច្ច ទី២-ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា ឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស ទី៣- ការយកចិត្តទុកលើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី៤- ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យស្លោក «ភាពជាដៃគូរដ្ឋ និងសហគមន៍ ដើម្បីការអប់រំ»។
ក្នុងនាមប្រធានកិត្តិយសគណៈកម្មការគ្រប់គ្រងសាលាបឋមសិក្សាបន្ទាយឈើ ព្រះសច្ចានុបាល នឿម វុទ្ធី ព្រះគ្រូចៅអធិការវត្តស្វាយរមៀត បានមានសង្ឃដីកាអំពាវនាវឱ្យមានការចូលរួមរបស់មាតាបិតាអាណាព្យាបាលសិស្សនិងមហាជនជួយគាំទ្រសាលាដើម្បីឲ្យមានរីកចម្រើនទៅមុខទៀតគឺមានការចូលរួមពីអាណាព្យាបាលសិស្សនិងមហាជនទូទៅក្នុងការចូលរួមក្នុងកំណែទម្រង់វិស័យអប់រំដែលជាកត្តាសំខាន់ក្នុងការចូលរួមអភិវឌ្ឍន៍វិស័យអប់រំនៅកម្ពុជា។
ក្នុងនោះដែរព្រះសច្ចានុបាល នឿម វុទ្ធី ក៏បានមានសង្ឃដីកាសូមឲ្យមាតាបិតា អ្នកអាណាព្យាបាល សូមចូលរួមតាមដានលទ្ធផលសិក្សា អត្តចរិត សីលធម៌ និងសុជីវធម៌ របស់កូនចៅ ទាំងនៅក្នុងគ្រួសារនិងក្នុងសហគមន៍ ព្រមទាំងជួយបង្រៀនកូនបន្ថែម ឬបង្កលក្ខណៈឱ្យកូនបានសិក្សាបន្ថែមពេលនៅផ្ទះជាពិសេសការចូលរួមអានសៀវភៅជាមួយកូន ដើម្បីហ្វឹកហាត់ទាំងនៅសាលារៀននិងនៅផ្ទះ ចូលរួមគាំទ្រដល់ការអភិវឌ្ឍសាលារៀន និងគាំទ្រដល់ គ្រូបង្រៀនតាមគ្រប់លទ្ធភាពផងដែរ។
មានប្រសាសន៍សំណេះសំណាលនាពេលនោះដែរ ព្រះសនសត្ថា តង់ តន ព្រះបាឡាត់គណខេត្ត និងជាព្រះគ្រូចៅអធិការវត្តព្រះព្រហ្មរ័ត្ន បានមានសង្ឃដីកាថាការអប់រំលើវិស័យព្រះពុទ្ធសាសនា គឺមានសារៈសំខាន់ណាស់ សំរាប់ការចូលរួមចំណែកអភិវឌ្ឍន៍ប្រទេសជាតិ និង សីលធម៌សង្គម ព្រោះប្រទេសកម្ពុជាតាមរដ្ឋធម្មនុញ្ញ បានចាត់ទុកព្រះពុទ្ធសាសនាជាសាសនារបស់រដ្ឋ ហើយព្រះសង្ឃគ្រប់អង្គ គឺជាកំលាំងចលករដ៏សំខាន់ក្នុងការអភិវឌ្ឍប្រទេសជាតិ ទាំងពេលនៅជាព្រះសង្ឃ និងក្រោយពេលលាចាកសិក្ខាបទ មកជាគ្រហស្ថវិញ។
ព្រះសនសត្ថា តង់ តន បានមានសង្ឃដីកាជំរុញដល់សិស្សានុសិស្សទាំងអស់ឱ្យខិតខំប្រឹងប្រែងរៀនសូត្រដើម្បីអនាគតរបស់ប្រទេសជាតិព្រោះថាប្អូនជាសិស្សា នុសិស្សគឺជាសសរទ្រូងនៃប្រទេសជាតិហើយ ប្រទេសជាតិត្រូវប្អូនៗសិស្សានុសិស្សដែលជាទំពាំងស្នងឬស្សីជំនាន់ក្រោយនេះហើយដែលជាអ្នកកសាងនិងអភិវឌ្ឍប្រទេសជាតិបន្តវេន ព្រោះថាការសិក្សារៀនសូត្រ ដែលអាចជួយ ចៅៗទាំងអស់ បានចូលរួមកែប្រែ និង អភិវឌ្ឍន៍ខ្លួនឯង ឱ្យមានការរីកចម្រើនជាបន្តបន្ទាប់ បានជួយខ្លួនឯង គ្រួសារ និង សង្គមជាតិ ។
ព្រះគ្រូចៅអធិការវត្តព្រះព្រហ្មរ័ត្ន បានបន្តថា ថ្ងៃនេះដើម្បីចូលរួមចំណែកក្នុងការលើកស្ទួយផ្នែកវិស័យអប់រំនិងដើម្បីលើកទឹកចិត្តដល់សិស្សានុសិស្សឲ្យរៀនបានពូកែថែមទៀតនោះ ព្រះអង្គក៏បានយកអំណោយជាសម្ភារៈសិក្សា និងគ្រឿងបរិភោគព្រមទាំងថវិកាមក ចែកជូនដល់កូនៗសិស្សានុសិស្ស និងលោកគ្រូ អ្នកគ្រូ បន្ថែមពីនេះទៀតព្រះតេជគុណក៍មានសង្ឃដីកាថាជារៀងរាល់ឆ្នាំព្រះតេជគុណនឹងនាំសម្ភារៈសិក្សាមកចែក ជូនដល់សិស្សានុសិស្សក្នុងសាលាបឋមសិក្សាបន្ទាយ ឈើ នៅក្នុងថ្ងៃបើកបវេសនកាលឆ្នាំថ្មី និងជូនរង្វាន់បន្ថែមទៀតដល់សិស្សពូកែផងដែរ។
សូមបញ្ជាក់ផងដែរថាអំណោយជាសម្ភារៈសិក្សាដែលព្រះគ្រូចៅអធិការវត្តព្រះព្រហ្មរ័ត្ន បានយកមកចែកជូនដល់សិស្សានុសិស្ស និងលោកគ្រូអ្នកគ្រូនៅក្នុងសាលា បឋមសិក្សាបន្ទាយឈើនាពេលនេះមានចំនួន៥០០ នាក់ ហើយមានកញ្ចប់ឃីតចំនួន៥០០ឃីត (ក្នុងកញ្ចាប់ឃីតមានដូចជាសម្ភារសិក្សា និងគ្រឿងបរិភោគ) ព្រមទាំងថវិកា ចែកជូនប្រមាណជាង៨លានរៀនផងដែរ៕
ដោយ ÷ ពន្លឺ
