បើគ្មានការប្រែប្រួលសាលាដំបូងខេត្តកំពង់ឆ្នាំងនិងប្រកាសសាលក្រមករណីម្ចាស់បំណុលយកដីកូនបំណុលទៅលក់ឲ្យអ្នកផ្សេង នាថ្ងៃទី៨ ខែតុលា ឆ្នាំ២០២៤ ខាងមុខនេះ!  

ខេត្តកំពង់ឆ្នាំង÷ សំណុំរឿងរវាងម្ចាស់មាស(ម្ចាស់បំណុល) និងម្ចាស់ដី(កូនបំណុល) បានកើតមានតាំងពីឆ្នាំ២០២១ ខណៈម្ចាស់ ដីឈ្មោះ អ៊ុង រិន បានប្ដឹងសូមតុលាការឲ្យចេញសាលក្រមដែលមានខ្លឹមសារដូចខាងក្រោម÷

១. សុំសិទ្ធិគ្រប់គ្រងដីទំហំ (១០០ម×១០០ម) ដែលបានដាក់បញ្ចាំឲ្យឈ្មោះ កែវ ធិន និងប្រពន្ធឈ្មោះ ព្រំុ សាន ដែលមានលិខិតបញ្ជាក់លេខ០៧/២១…។

២. សុំឱ្យសហចុងចម្លើយប្រគល់ដីដោយមានទំហំ (១០០ម×១០០ម) ដោយមានលិខិតបញ្ជាក់លេខ០៧/២១ ចុះថ្ងៃទី៩ ខែមករា ឆ្នាំ២០២១ ដោយលោក កែ ម៉េត មានទីតាំងស្ថិតនៅចំណុចក្បាលកោះខ្មោច ភូមិក្បាលកន្លង់ ឃុំពាមឆ្កោក ស្រុកជល់គីរី ខេត្តកំពង់ឆ្នាំង មកឲ្យខ្ញុំបាទនាងខ្ញុំជាដើមចោទវិញ ហើយខ្ញុំបាទនាងខ្ញុំនឹងសងមាសឲ្យសហចុងចម្លើយវិញគ្រប់ចំនួន។។

៣. សុំទាមទារសំណងជំងឺចិត្ត ខូចខាតពេលវេលា និងសេវាកម្មផ្លូវច្បាប់៤០លានរៀល។

៤. ប្រាក់ប្រថាប់ក្តីជាបន្ទុករបស់សហចុងចម្លើយ។

តាមការរៀបរាប់របស់លោក អ៊ុង រិន បានឲ្យដឹងថា ដីដែលមានទំហំ(១០០ ម៉ែត្រ×១០០ ម៉ែត្រ) ខាងលើត្រូវបានឪពុកម្ដាយរបស់លោកជាអ្នកកាន់កាប់តាំងពីសម័យសង្គមរាស្ត្រនិយម រហូតដល់សម័យ លន់ ណុល ហើយក្រោយឆ្នាំ ១៩៧៩ គាត់ក៏បានកាន់កាប់បន្តទៀតរហូតដល់គាត់ស្លាប់នៅក្នុងឆ្នាំ១៩៨៧ ទើបលោកទាំងពីរនាក់បានបន្តកាន់កាប់ធ្វើចំការលើដីនោះរហូតមក តាមលិខិតសុំកាន់កាប់ដីលេខ០៧/២១ ចុះហត្ថលេខាដោយលោក កែ ម៉េត មេឃុំពាមឆ្កោក ថ្ងៃទី៩ ខែមករា ឆ្នាំ២០២១។ ដោយអំឡុងឆ្នាំ២០១៣ លោកនឹងប្រពន្ធបានខ្ចីចងការប្រាក់មាសពីលោក កែវ ធិន ចំនួន៥ជី ជាមាសហើយសន្យាសងរយៈ ពេល៥ឆ្នាំលុះដល់ថ្ងៃទី១៤ ខែកក្កដា ឆ្នាំ២០១៧ (លិខិត បញ្ជាក់ជូនដោយលោក កយ ហ៊ាន ) លោកបានសងមាស ៣ជី៥ហ៊ុនទៅឲ្យឈ្មោះ កែវ ធិន និងប្រពន្ធជាម្ចាស់មាសដោយនៅជំពាក់១ជី៥ហ៊ុនទៀត ដោយខ្លួនសន្យាថាសងបន្តបន្ទាប់ទៀត។ លុះដល់ចុងឆ្នាំ២០២១ ក៏ឃើញមាន ឈ្មោះ ហ៊ឹម អ៉ិត និងប្រពន្ធឈ្មោះ ឡូត សាយ ចូលកាប់ឆ្ការលើដីរបស់ខ្លួន ហើយខ្លួនក៏បានសួរនាំទើបដឹងថាឈ្មោះ កែវ ធិន និងឈ្មោះ ប៉ាល់ ស្រ៊ន មេភូមិក្បាលកន្លង់បានគប់ឃិតរៀបចំឯកសារលក់ដីរបស់ខ្លួនទៅឲ្យឈ្មោះ ហ៊ឹម អ៉ិត និង ឡូត សាយ ដោយមិនមានការឯកភាពពីរូបលោកឡើយ។

តាមពាក្យបណ្ដឹងលោក អ៊ុង រិន បានស្នើសុំដល់ឯកឧត្តមប្រធានសាលាដំបូងខេត្តកំពង់ឆ្នាំង មេត្តាទទួលពាក្យបណ្ដឹងនិងចេញសាលក្រមតាមកម្មវត្ថុនៃការស្នើសុំខាងលើ។

លោក អ៊ុង រិន បានឲ្យដឹងថា លោកបានចូលរួមនៅគ្រប់នីតិ វិធីរបស់សាលាដំបូងខេត្តកំពង់ឆ្នាំង (ដោយលោកក្រីក្រ លោកមិនមានមេធាវីអមនោះទេ) ជាពិសេសគឺនៅថ្ងៃទី២៦ ខែកញ្ញា ឆ្នាំ២០២៤ លោកបានចូលរួមនីតិវិធីទាញហេតុ ផលដោយផ្ទាល់មាត់ ដែលមានចៅក្រមនីតិវិធីលោក សំ ដារ៉ា។ លោកបានឲ្យដឹងទៀតថា លោកចៅក្រមនិងប្រកាសសាលក្រមនៅថ្ងៃទី៨ ខែតុលា ឆ្នាំ២០២៤ខាងមុខ។

ដើម្បីឲ្យដឹងច្បាស់នាល្ងាចថ្ងៃទី២ ខែតុលា ឆ្នាំ២០២៤ អង្គភាពយើងមិនអាចសុំការបញ្ជាក់ពីអ្នកនាំពាក្យសាលា ដំបូងខេត្តកំពង់ឆ្នាំងបាននៅឡើយ ទោះយ៉ាងណាអង្គភាពយើងនឹងរង់ចាំការបំភ្លឺរៀងរាល់ម៉ោងធ្វើការពីគ្រប់ភាគីពាក់ព័ន្ធ៕

ដោយ÷ ពិសិដ្ឋ