ខេត្តសៀមរាប÷ ដើម្បីជាការចូលរួមលើកស្ទួយនូវវិស័យអប់រំឲ្យកាន់តែរីកចម្រើន និងប្រកបដោយគុណភាពខ្ពស់ផងដែរនោះ នៅព្រឹកថ្ងៃទី២៧ ខែកញ្ញា ឆ្នាំ២០២៤ នេះ គណៈគ្រប់គ្រងសាលាបឋមសិក្សាកេរារាម ដែលស្ថិតក្នុងសង្កាត់ស្វាយដង្គំ ក្រុង/ខេត្តសៀមរាប បានរៀបចំពិធីចែកប័ណ្ណ សរសើរនិងរង្វាន់លើកទឹកចិត្តដល់សិស្សពូកែប្រចាំឆ្នាំសិក្សា ២០២៣- ២០២៤ ចាប់ពីថ្នាក់ទី១ដល់ថ្នាក់ទី៦ដែលទទួលបាន ពីលេខ១ដល់លេខ៥។
នៅក្នុងពិធីនោះដែរ ក៏មានការនិមន្ត និងអញ្ជើញចូលរួមពីសំណាក់ព្រះតេជគុណ ស៊ុម សឿត ព្រះគ្រូសូធ្យឆ្វេងវត្តកេសរារាម និងលោកជំទាវ អ៊ី សុធារី គ្រូបង្គោលនៃលេខាដ្ឋានគណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំប្រចាំខេត្តសៀមរាប ព្រមទាំងមានវត្តមានចូលរួមពីសំណាក់ លោកចៅសង្កាត់ស្វាយដង្គំ លោកស្រីប្រធានការិយា ល័យអប់រំក្រុង ព្រមទាំងអស់លោក លោកស្រីជាសប្បុរសជន មាតាបីតា អាណាព្យាបាលសិស្សចូលរួមផងដែរ។
លោក អួន សុណេង នាយកសាលាបឋមសិក្សាកេសរារាម បានមានប្រសាសន៍ថានៅរៀងរាល់ឆ្នាំបន្ទាប់ពីការប្រឡងត្រូវបានបញ្ចប់ និងប្រកាសលទ្ធផលរួចរាល់ហើយ គណៈគ្រប់ គ្រងសាលាតែងតែធ្វើការលើកទឹកចិត្តចែករង្វាន់ និងចែកប័ណ្ណសរសើរដល់សិស្សពូកែដែលប្រឡងជាប់ចំណាត់ថ្នាក់ពី លេខ ១ ដល់លេខ៥ហើយនៅក្នុងឆ្នាំសិក្សា២០២៣- ២០២៤ នេះសិស្សានុសិស្សដែលបានជាប់ចំណាត់ពី លេខ១ដល់លេខ៥គឺមានចំនួន១២៨នាក់ក្នុងនោះមានស្រីចំនួន៨៥នាក់។
លោកនាយកសាលាបឋមសិក្សាកេសរារាមបានបន្ត ថាការផ្តល់រង្វាន់ដល់សិស្សពូកែគឺជាការលើកទឹកចិត្តឲ្យសិស្សា នុសិស្សកាន់តែខិតខំរៀនសូត្រកាន់តែពូកែដែលក្លាយជាធនធានដ៏សំខាន់សម្រាប់កិច្ចអភិវឌ្ឍន៍ជាតិ។ ក្នុងនាមគណៈគ្រប់គ្រងសាលា លោកអួន សុណេង ក៏បានមានប្រសាសន៍សំណូមពរដល់មាតាបិតា និងអ្នកអាណាព្យាបាលសិស្សទាំងអស់សូមយកចិត្តទុកដាក់ខិតខំជំរុញកូនឲ្យមករៀនបានទៀងទាត់និងជួយជំរុញកូនរៀននៅផ្ទះជាប្រចាំហើយអាណាព្យាបាលសិស្សត្រូវមានទំនាក់ទំនងជាមួយគ្រូប្រចាំថ្នាក់ ដើម្បីតាមដានការសិក្សារបស់កូនៗ ក្នុងការជម្រុញឲ្យកូនៗបានធ្វើកិច្ចការផ្ទះដែលគ្រូដាក់ឲ្យបានទៀងទាត់ ហើយសូមមាតាបិតាអាណាព្យាបាលចូលរួមសហការគាំទ្រការបង្រៀនបន្ថែម ២ម៉ោងក្នុង ១ថ្ងៃដោយសម្របសម្រួលកូនៗឲ្យមករៀនបានទៀងទាត់ផងដែរ ។
លោកជំទាវ អ៊ី សុធារី គ្រូបង្គោលនៃលេខាដ្ឋានគណៈកម្មាធិ ការជាតិជំរុញការអនុវត្តវិធានការគន្លឹះក្នុងវិស័យអប់រំប្រចាំខេត្តសៀមរាបបានមានប្រសាសន៍ឲ្យដឹងថារាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានបង្កើត គណៈកម្មាធិ ការជាតិ ជំរុញការអនុវត្តវិធានការគន្លឹះក្នុងវិស័យអប់រំ ដែលហៅកាត់ថា (គ.វ.អ.) ហើយ គណៈកម្មាធិការជាតិនេះ មានសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណា ចក្រកម្ពុជាគឺជាប្រធាន។ លោកជំទាវ អ៊ី សុធារី បានមាន ប្រសាសន៍បន្តថា សាលាបឋមសិក្សាកេសរារាម គឺជាសាលាមួយក្នុងចំណោម៥សាលាទូទាំងខេត្តសៀមរាបក៏ដូចជាក្នុងចំណោម៤២សាលាទូទាំងប្រទេសដែលត្រូវបានក្រុម ការងាររបស់ គ.វ.អ បានធ្វើការជ្រើសរើសជាសាលាគោលដៅដោយ បានរៀនបន្ថែម២ម៉ោង ពីលើកម្មវិធីសិក្សារបស់ក្រសួងអប់រំផងដែរ ។
លោកជំទាវ គ្រូបង្គោលនៃលេខាដ្ឋាន គ.វ.អ ប្រចាំខេត្តសៀមរាប បានបន្តថា ដើម្បីឲ្យសិស្សានុសិស្សទទួលបានលទ្ធផលសិក្សាល្អ គឺត្រូវតែមានការចូលរួមចំណែកសំខាន់ពីលោកគ្រូ អ្នកគ្រូ អាណាព្យាបាល និងខ្លួនឯងផ្ទាល់ដោយក្នុងនោះដែរ បញ្ហាបរិស្ថាន អនាម័យ សោភណភាពនៅក្នុងសាលាក៏ត្រូវបានរៀបចំឲ្យបានស្អាត ដូចជានៅក្នុងបន្ទប់រៀន និងបរិវេណសាលាជាដើម។ លោកជំទាវ អ៊ី សុធារី ក៏បានមានប្រសាសន៍ផ្តាំផ្ញើរដល់ប្អូនៗសិស្សានុសិស្សទាំង អស់ត្រូវខិតខំយកចិត្តទុកដាក់ឧស្សាហ៍ព្យាយាមរៀនសូត្រដោយស្មារតីភ្ញាក់រឭកបង្កើនការស្វ័យសិក្សាដោយខ្លួនឯងត្រូវគោរពវិន័យ និងបទបញ្ជាផ្ទៃក្នុងសាលាជាប្រចាំ មានសាមគ្គីភាពល្អ រវាងមិត្តភក្តិ និងបងប្អូន ចេះជួយទុក្ខធុរៈគ្នាពេលមានធុរៈ .ត្រូវមានសុជីវធម៌ល្អ ចេះគោរពចាស់ព្រឹទ្ធាចារ្យ ឪពុកម្តាយ លោកគ្រូ អ្នកគ្រូ ជួយធ្វើការឪពុក ហើយយប់នៅផ្ទះ មិនពាលា មិនភ្លើតភ្លើន មិនដើរលេងឥត ប្រយោជន៍ ត្រូវចេះជួយការពារ និងថែរក្សាបរិស្ថានសាលារៀនគ្រប់ៗគ្នា ហើយត្រូវជៀសវាងឲ្យផុតពីគ្រឿងញៀន។
នៅក្នុងឱកាសនោះផងដែរ ព្រះតេជគុណ ស៊ុម សឿត ព្រះគ្រូសូធ្យឆ្វេងវត្តកេសរារាម បានមានសង្ឃដីកាបន្ថែមទៀតដែរថា ការសិក្សា គឺមានតម្លៃយ៉ាងធំធេងណាស់ហើយថាចំពោះអ្នកដែលមានចំណេះដឹងដែល ជាលទ្ធផលកើតចេញ ពីការសិក្សា គឺវាមានតម្លៃស្មើនឹងគ្រាប់ពេជ្រ។ ដូច្នេះសូម ក្មួយៗសិស្សានុសិស្សត្រូវខិតខំសិក្សារៀនសូត្រឲ្យបានសកម្មបំផុត ដោយមិនត្រូវយកពេលវេលាដ៏ល្អនេះ ទៅប្រព្រឹត្តនូវអំពើអ្វីដែលជាការឥតប្រយោជន៍នោះឡើយ។ ព្រះគ្រូសូធ្យឆ្វេងបានមានសង្ឃដីកាថាដើម្បីរួមចំណែកលើក កម្ពស់គុណភាពសីលធម៌ការអប់រំក្នុងវិស័យសង្គមព្រះពុទ្ធសាសនាដល់សិស្សានុសិស្សឱ្យកាន់តែទូលំទូលាយ ថែម ទៀតផងដែរនោះគឺជានិច្ចជាកាលព្រះសង្ឃក្នុងវត្តកេសរារាមតែងតែនិមន្តចូលរួមបង្រៀនដល់សិស្សានុសិស្សក្នុងសាលាបឋមសិក្សាកេរារាមអំពីសីលធម៌សង្គមតាមបែបព្រះពុទ្ធសាសនាគឺដើម្បីបង្ហាញឱ្យឃើញពីការយកចិត្តទុកដាក់លើអប់រំបែបព្រះពុទ្ធសាសនា មានការប្រកាន់ភ្ជាប់នៅគុណធម៌ សីលធម៌ និងវប្បធម៌របស់សង្គមខ្មែរយើង សំរាប់អប់រំដល់សិស្សានុសិស្សឱ្យ បានយល់ច្បាស់ពីតម្លៃនៃការអប់រំតាមបែបសង្គមព្រះពុទ្ធសាសនា ពិសេសយល់ពីតម្លៃនៃការដឹងគុណ គោរពប្រតិបត្តិចំពោះអ្នកមានគុណ តម្លៃនៃសាសនាដែលរួមចំណែកធំធេងក្នុងសង្គមខ្មែរ ហើយបានជួយណែនាំដល់ក្មួយៗឲ្យយល់ និងប្រព្រឹត្តអំពើល្អ មិនប្រើគ្រឿងញៀន គោរពច្បាប់ចរាចរណ៍ ប្រឹងប្រែងរៀនសូត្រ ធ្វើជាកូនល្អ សិស្សល្អ មនុស្សល្អ សម្រាប់សង្គម និងប្រទេសជាតិផងដែរ។
ព្រះតេជគុណ ស៊ុម សឿត បន្តថាការចូលរួមអប់រំតាមបែបព្រះពុទ្ធសាសនាគឺជាផ្នែកសំខាន់មួយដែលរួមចំណែកក្នុងការអប់រំផ្ដល់ចំណេះដឹងដល់សិស្សនៅតាមសាលារៀន ពិសេសការចែករំលែកតាមបែបសាសនា ផ្សារភ្ជាប់ជាមួយតថភាពសង្គមនាពេលបច្ចុប្បន្ន៕
ដោយ÷ ពន្លឺ
