ខេត្តសៀមរាប÷ នាព្រឹកថ្ងៃទី២៣ ខែកញ្ញា ឆ្នាំ២០២៤ នេះ លោកឧកញ៉ាបណ្ឌិត ហ៊ុយ ភៀវ ប្រធានសភា ពាណិជ្ជកម្មមណ្ឌលសៀមរាប-ឧត្តរមានជ័យ និងលោក មាស សឿម អនុប្រធានមន្ទីរពាណិជ្ជកម្មខេត្តសៀមរាបព្រមទាំងសមាជិកសមាជិកានៃសភាពា ណិជ្ជកម្មមណ្ឌលសៀមរាប-ឧត្តរមានជ័យ បានទទួល ជួបសម្តែងការគួរសមនិងពិភាក្សាការងារពាណិជ្ជកម្មក្នុងគោលបំណងពង្រឹងកិច្ចសហប្រតិបត្តិការជាមួយប្រតិភូនៃមន្ទីរពាណិជ្ជកម្ម និងម្ចាស់ក្រុមហ៊ុនជាច្រើននៅក្នុងខេត្តយូណានប្រទេសចិន ដែលដឹកនាំដោយលោក Liu Jie អនុប្រធានមន្ទីរជម្រុញពាណិជ្ជកម្មអន្តរជាតិនៃខេត្តយូណាន ប្រទេសចិននៅសណ្ឋាគារសុខាអង្គរខេត្តសៀមរាប ។
នៅក្នុងជំនួបពិភាក្សានាពេលនោះដែរលោកឧកញ៉ាបណ្ឌិត ហ៊ុយ ភៀវ ប្រធានសភាពាណិជ្ជកម្មមណ្ឌលសៀមរាប-ឧត្តរ មានជ័យ បានមានប្រសាសន៍ថាការជួបពិភាក្សាជាមួយប្រតិភូពាណិជ្ជនិងបណ្តាក្រុមហ៊ុនជាច្រើនមកពីខេត្តយូណានប្រទេសចិននាពេលនេះគឺក្នុងគោលបំណងពិភាក្សាការងារពាណិជ្ជកម្ម និងផ្សព្វផ្សាយផលិតផលផ្សេងៗក្នុងការលក់ចេញ ទិញចូលរបស់ក្រុមហ៊ុននៃភាគីទាំងពីរដោយកិច្ចពិភា ក្សានេះគឺផ្តោតជាសំខាន់លើការតភ្ជាប់ទំនាក់ទំនងធុរកិច្ចនិងការជំរុញពាណិជ្ជកម្មនិងវិនិយោគរវាងប្រទេសទាំងពីរផងដែរ។
លោកឧកញ៉ាបណ្ឌិត ហ៊ុយ ភៀវ ក៏បានមានប្រសាសន៍លើកទឹកចិត្តដល់ភាគីក្រុមហ៊ុនក៏ដូចជាធុរជនទាំងអស់ធ្វើការទំនាក់ទំនង និងសិក្សាលើ គម្រោង ជាមួយក្រសួង-ស្ថាប័នពាក់ព័ន្ធ ដើម្បីសម្រេចបាននូវលទ្ធផលប្រកបដោយប្រសិទ្ធភាព។ ដោយឡែកសភាពាណិជ្ជកម្មខេត្តមណ្ឌលសៀមរាប-ឧត្តរមានជ័យ និងមន្ទីរពាណិជ្ជកម្មខេត្តរីករាយក្នុងការសហការ និងជួយសម្របសម្រួលជូនដល់វិនិយោគិនទាំងអស់ ក្នុងក្របខណ្ឌពាណិជ្ជកម្ម ដើម្បីជំរុញកិច្ចសហប្រតិបត្តិការបានកាន់តែច្រើនឡើងបន្ថែមទៀតផងដែរ ។ ទន្ទឹមនឹងនេះដែរ លោកឧកញ៉ាបណ្ឌិត ហ៊ុយ ភៀវ ក៏បានគូសបញ្ជាក់អំពីភាពទាក់ទាញនៃច្បាប់ស្តីពីវិនិយោគនៃព្រះរាជាណាចក្រកម្ពុជា និង គោលនយោបាយលើកទឹកចិត្តសម្រាប់វិនិយោគិន និងធុរជនដែលធានាបាននូវភាពប្រាកដនិយមចំពោះបរិយាកាសវិនិយោគប្រកបដោយភាពអនុគ្រោះ និងភាពបត់បែន។
នៅក្នងឱកាសនោះផងដែរ លោកឧកញ៉ាបណ្ឌិត ហ៊ុយ ភៀវ ក៏បានមានប្រសាសន៍សំណូមពរតាមរយ: ប្រតិភូនៃមន្ទីរពាណិជ្ជកម្មនិងម្ចាស់ក្រុមហ៊ុនជាច្រើនក្នុងខេត្តយូណាន ប្រទេសចិន ឱ្យជួយណែនាំវិនិយោគិនចិនមកបណ្តាក់ទុនវិនិយោគ និងរកស៊ីនៅកម្ពុជា និងជួយជម្រុញណែនាំឲ្យប្រជាពលរដ្ឋចិនមកទស្សនាខេត្តសៀមរាបក៏ដូចជាប្រទេសកម្ពុជាឲ្យកាន់តែច្រើនឡើងថែមទៀតផងដែរ៕
ដោយ÷ ពន្លឺ
