ខេត្តសៀមរាប÷ នាព្រឹកថ្ងៃទី២១ ខែ កញ្ញា ឆ្នាំ២០២៤ នេះ រដ្ឋបាលខេត្តសៀមរាបសហការជាមួយក្រុមហ៊ុន អ អិម អេ ខេមបូឌា បានធ្វើពិធីដាំដើមឈើឥន្ទនេលចំនួន ១.៣៥០ដើម អមសងខាងផ្លូវជាតិលេខ៦ ចាប់ពីស្តុបសុខាក្នុងសង្កាត់ស្វាយដង្គំរហូត មកដល់រង្វល់មូលជ័វរ្ម័នទី៧ ក្នុងសង្កាត់ស្រង៉ែ ក្រុងសៀមរាប ដើម្បីជាការជំរុញ និងលើកសោភ័ណ្ឌភាពតំបន់ទេសចរណ៍ និងបង្កើតបរិស្ថានបៃតងក្នុងខេត្តសៀមរាប។ នៅក្នុងពិធីដាំកូនឈើនោះដែរក៏មានវត្តមានចូលរួមពីសំណាក់ លោក យុន លីនណេ អភិបាលរងខេត្តសៀមរាប ព្រមទាំង អស់ លោក លោកស្រី តំណាងមន្ទីរអង្គភាពជុំវិញខេត្ត អាជ្ញាធរក្រុងសៀមរាប អាជ្ញាធរសង្កាត់រួមជាមួយថ្នាក់ដឹកនាំ និងបុគ្គលិកក្រុមហ៊ុន អ អិម អេ (ខេមបូឌា)ម.ក និងយុវជនកាកបាទក្រហម យុវជនកាយរិទ្ធប្រជាពលរដ្ឋចូលរួមផងដែរ ។
លោក ងន សាំង អគ្គនាយកក្រុមហ៊ុន អ អិម អេ ខេមបូឌា បានមានប្រសាសន៍ថាក្នុងការចូលរួមដាំដើមឈើនាពេលនេះ គឺពិតជាមានសារៈសំខាន់ណាស់ដោយ ហេតុថា ព្រៃឈើមានតួនាទីក្នុងការជួយថែរក្សាដំណើរការប្រព័ន្ធអេកូឡូស៊ី តាមរយៈការជួយធ្វើការបំប្លែងអាកាសធាតុ កាត់ បន្ថយ ឥទ្ធិពលអវិជ្ជមាន នៃការប្រែប្រួលអាកាស ធាតុ ដូចជាទឹកជំនន់ ខ្យល់ព្យុះ និងការស្រូបយកឧស្ម័នកាបូនិចពី បរិយាកាស និងការបង្កើនគម្របបៃតងជាដើម ដើមឈើគឺជាចំណែកមួយដ៏សំខាន់មិនអាចខ្វះបានសម្រាប់មនុស្ស និងវិស័យទេសចរណ៏ រឹតតែពិសេសទៅទៀតគឺដើមឈើបន្សំគ្នា និងជួយលើកសម្រស់ខេត្តសៀមរាប សម្រស់ប្រាសាទបុរាណខ្មែរដែលជាមរត៌កវប្បធម៌មនុស្សជាតិ និងជាខេត្តទេសចរណ៏វប្បធម៌ដ៏សំបូរបែប។
លោកបានបន្តទៀតថា ថ្នាក់ដឹកនាំនិងបុគ្គលិកក្រុមហ៊ុន អ អិម អេ ខេមបូឌា បាន ចូលរួមដាំដើមឈើនាពេលនេះគឺជាចំណែកមួយដ៏សំខាន់ក្នុងកិច្ចថែរក្សាធនធានធម្ម ជាតិ និងបរិស្ថាន ព្រៃឈើដែលជាបញ្ហាចំបង និងមានសារៈសំខាន់ដល់ការរស់រាន ព្រមទាំងការអភិវឌ្ឍន៍សង្គមជាតិកម្ពុជា ទាំងពេលបច្ចុប្បន្ន ក៏ដូចទៅពេលអនាគត់ផងដែរ។
លោក យុន លីនណេ អភិបាលរងខេត្តសៀមរាបបានមានប្រសាសន៍ថា ការដែរដ្ឋបាលខេត្តសៀមរាបសហការជាមួយក្រុម ហ៊ុន អ អិម អេ ខេមបូឌា ធ្វើការដាំដើមឈើនាពេលនេះគឺមានអត្ថន័យដ៏ជ្រាលជ្រៅណាស់សម្រាប់ចលនាបំផុសស្មារតីប្រជា ពលរដ្ឋ មន្ត្រីរាជការ សិស្សានុសិស្ស និងកងកំលាំងប្រដាប់អាវុធឱ្យចេះស្រឡាញ់ ព្រៃឈើ ចូលរួមដាំដុះ និងការពារព្រៃឈើ ក៏ដូចជាជួយជំរុញផលប្រយោជន៍ដល់ប្រជារាស្ត្រយើងក្នុងជីវភាពរស់នៅបង្ក បង្កើនផល កសិកម្ម និងបង្កើនសុខមាល ភាពគ្រួសារ ព្រមទាំងជួយលើកស្ទួយ បរិស្ថាន សង្គមផងដែរ។
លោកអភិបាលរងខេត្តបានមានប្រសាសន៍ អំពាវនាវដល់បងប្អូនប្រជាពលរដ្ឋគ្រប់រូប ដែលកំពុងបន្តអាជីវកម្មកាប់បំផ្លាញព្រៃឈើ ដើម្បី ទន្ទ្រានយកដីព្រៃ ការដុតព្រៃឈើយកដីរដ្ឋធ្វើកម្មសិទ្ធិ សូមបញ្ឈប់ជាបន្ទាន់ព្រោះការធ្វើអាជីវកម្មព្រៃឈើនិងជំនួញដីព្រៃឈើ ខុសច្បាប់គឺ ជាបទល្មើសដ៏ធ្ងន់ធ្ងរបំផុត ជា ពិសេសគ្រោះមហន្តរាយដល់បរិស្ថានធម្ម ជាតិ ដែលបណ្តាលមកពីការកាប់បំផ្លាញព្រៃឈើនោះនឹងកើតភ្លាម ចំពោះសង្គម ជាតិ។ ដោយឡែកយើងត្រូវរួមសាមគ្គីគ្នា បណ្តុះឡើងវិញនូវគំនិតស្រឡាញ់ព្រៃឈើ ថែរក្សាការពារព្រៃឈើ និងបណ្តុះឡើង វិញនូវទស្សនៈ សន្សំសំចៃក្នុងការប្រើប្រាស់ផល និងអនុផលព្រៃឈើ គ្រប់ប្រភេទ បណ្តុះឡើងវិញនូវស្មារតីគោរពច្បាប់ អនុវត្តច្បាប់ដើម្បីរួមចំណែកកសាងព្រះរាជា ណាចក្រកម្ពុជាឱ្យទៅជានីតិរដ្ឋ ។
ក្នុងមានអាជ្ញាធរខេត្ត លោក យុន លីនណេ ក៏បានថ្លែងអំណរអរគុណចំពោះ ក្រុមហ៊ុន អ អិម អេ (ខេមបូឌា) ដែលបានចូលរួមចំណែកយ៉ាងសំខាន់ ក្នុងការកែលំអសោភ័ណភាពក្នុងក្រុងសៀមរាបឱ្យបានល្អប្រសើរ ហើយសង្ឃឹមថា និងដាំដើមឈើឱ្យ គ្រប់ចំនួន១ម៉ឺនដើម ក្នុងរយៈពេល២ឆ្នាំ ខាងមុខនេះ ចំពោះកូនឈើ ដែលបានដាំ រួចហើយ សូមអាជ្ញាធរគ្រប់លំដាប់ថ្នាក់ ប្រជាពលរដ្ឋ និងបណ្តាក្រុមហ៊ុនទាំងអស់ ដែលនៅអមសងខាងផ្លូវសូមចូលរួមថែទាំ ស្រោចទឹក ដាក់ជីចំពោះដើមឈើដែលមាននៅមុខគេហដ្ឋាន ឬក្រុមហ៊ុនរបស់ខ្លួន ដើម្បីឱ្យដើមឈើទាំងនោះលូតលាស់បានល្អ ជួយលើកកម្ពស់សោភ័ណភាពក្រុងសៀមរាប ឱ្យកាន់តែស្រស់ស្អាតបន្ថែមទៀតផងដែរ ៕
ដោយ÷ ពន្លឺ
