ខេត្តស្ទឹងត្រែង÷ តាមសេចក្តីរាយការណ៍ពីពីពលរដ្ឋល្អវេលាពេលព្រឹកនាថ្ងៃទី១០ ខែសីហា ឆ្នាំ២០២៤ ថា មានតាបម៉ាស៊ីនកែច្នៃឈើល្មើសខុសច្បាប់ជាច្រើនគ្រឿងនិងប្រើកម្លាំងពលកម្មដែលបង្កប់នៅក្នុងចំការស្វាយចន្ទីរបស់ប្រជាពលរដ្ឋស្ថិតនៅក្នុងភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ដែលបានកើតឡើងដុះស្លែជាយូរឆ្នាំមកហើយមិនដែលឃើញសមត្ថកិច្ចរដ្ឋបាលព្រៃឈើខេត្តស្ទឹងត្រែងចុះបង្ក្រាបម្ដងណាឡើយ។
ក្នុងថ្ងៃដដែលនោះក្រុមការងារសារព័ត៌មានយើងបានចុះទៅដល់ទីតាំងសិប្បកម្មដែលបង្កប់ម៉ាស៊ីនតាបគ្មានលិខិតអនុញ្ញាតពីសមត្ថកិច្ចជំនាញព្រៃឈើខេត្តស្ទឹង ត្រែង។ ខណៈក្នុងការធ្វើបទសម្ភាសន៍ជាមួយម្ចាស់ បទល្មើសឈ្មោះ ធួន ហៅ សុខ បានប្រាប់ថាសិប្បកម្មរបស់គេគឺមានលិខិតអនុញ្ញាតពេលនោះក្រុមការងារបានស្នើសុំឲ្យឈ្មោះសុខបង្ហាញតែបុគ្គលឈ្មោះ ធួន ហៅសុខ ថាមិនមានទេ។ បន្ទាប់មកក្រុមការងារយើង បានសួរសំណួរទាក់ទងទៅនឹងសន្និធិ ឈើដែលយក មកកែច្នៃ តើបានមកពីណា? ឈ្មោះ ធួន ហៅ សុខ ថាបានទិញពីមេព្រៃខ្លះ និងពីប្រជាពលរដ្ឋដឹកយកមកលក់ឲ្យខ្លះ។
បន្ទាប់ពីសម្ភាសន៍ជាមួយម្ចាស់សិប្បកម្មឈ្មោះធួន ហៅសុខ រួច ក្រុមការងារយើងបានទូរសព្ទទៅលោក ហ៊ុន សំអឿន 097 8118xxx0 នាយផ្នែករដ្ឋបាលព្រៃឈើស្រុកថាឡាបរិវ៉ាត់ លោកឆ្លើយថា÷ លោកជាប់រវល់បង្ក្រាបបទល្មើសព្រៃឈើនៅចំការលើ សុំឱ្យក្រុមការងារអ្នកសារព័ត៌មានយើងទាក់ទងទៅលោក ភី សាម៉ុន ជានាយសង្កាត់រដ្ឋបាលព្រៃឈើសំអាង វិញតាមលេខ ទូរសព្ទ 088279xx55 ពេលនោះក្រុមការងារយើងហៅទូរសព្ទចូលជាច្រើនដងទៅលោក ភី សាម៉ុន តែមិនមានអ្នកទទួល។
យោងតាមច្បាប់ស្តីពីព្រៃឈើ ឆ្នាំ២០០២ មាត្រា ៧ កឋាខណ្ឌទី២ មន្ត្រីរដ្ឋបាលព្រៃ ឈើមានសិទ្ធិនិងភារកិច្ចដូចខាងក្រោម÷
១.ត្រួតពិនិត្យការធ្វើអាជីវកម្មប្រមូលផលអនុផលព្រៃឈើក្នុងដែនព្រៃបម្រុងទុកអចិន្ត្រៃយ៍និងចម្ការដាំឈើរបស់រដ្ឋ។
២.ត្រួតពិនិត្យការដឹកជញ្ជូនផលអនុផលព្រៃឈើនិងផលប្រមាញ់តាមមធ្យោបាយដឹកជញ្ជូននានា។
៣.ត្រួតពិនិត្យកន្លែងសន្និធិផលអនុផលព្រៃឈើទីតាំងលក់ផលអនុផលព្រៃឈើឬផលប្រមាញ់។
៤.ត្រួតពិនិត្យមូលដ្ឋានឧស្សាហកម្មឈើរោងចក្រអាឈើ សិប្បកម្មកែច្នៃផលអនុផលព្រៃឈើ និងឡគ្រប់ប្រភេទដែលប្រើប្រាស់ផលអនុផលព្រៃឈើជាវត្ថុដើមឬប្រភពថាមពលអំពីឈើ។
៥.ត្រួតពិនិត្យអាជ្ញាប័ណ្ណ លិខិតអនុញ្ញាតនិងឯកសារផ្សេងទៀតដែលតម្រូវឲ្យត្រួតពិនិត្យតាមច្បាប់នេះ។
តាមស្មារតីនៃច្បាប់ស្ដីពីព្រៃឈើ ២០០២ បានចង្អុលបង្ហាញឲ្យមន្ត្រីរដ្ឋបាលព្រៃឈើត្រូវតែបង្ក្រាបទល្មើសព្រៃឈើ និងតម្រូវឲ្យម្ចាស់សិប្បកម្មនានាមានលិខិតអនុញ្ញាតត្រឹមត្រូវទើបអាចអនុញ្ញាតឱ្យធ្វើអាជីវកម្មដោយស្របច្បាប់បាន តែផ្ទុយទៅវិញហាក់បីដូច ជាមេព្រៃមានទំនាក់ទំនងយ៉ាងជិតស្និតជាមួយឈ្មួញបទល្មើសព្រៃឈើដើម្បីបង្ក្រាបទុកស៊ីពេសម្រាប់អាហារ ០៣ពេលនិងភាពហ៊ឺហារបស់ខ្លួនទៅវិញដែលធ្វើឱ្យព្រៃឈើជាសម្បត្តិធម្មជាតិត្រូវវិនាសហិនហោច ដោយសារមន្ត្រីគ្រាប់ល្ពៅស្ងោរមួយចំនួនតូចនោះ។
មហាជនសំណូមពរដល់លោក អុន ចាន់សុជាតិ នាយខណ្ឌរដ្ឋបាលព្រៃឈើស្ទឹងត្រែងលោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តស្ទឹងត្រែង ជា ពិសេសឯកឧត្តម សរ សុពុត្រា ទើបតែទទួលតំណែងថ្មីចូលគ្រប់គ្រងខេត្តស្ទឹងត្រែងដែលត្រូវបានប្រជាពលរដ្ឋ និងមន្ត្រីរាជការគ្រប់លំដាប់ថ្នាក់ក្នុងខេត្តស្ទឹងត្រែងសាទរថាលោកគឺមេដឹកនាំដ៏ល្អប្រកប ដោយគណៈឯកភាព សូមមេត្តាចាប់មន្ត្រីបង្ក្រាបបទល្មើសព្រៃឈើនៅទីតាំងខាងលើដើម្បីថែរក្សាសម្បត្តិធនធានធម្មជាតិដែលជាកេរ្តិ៍ដំណែលពីដូនតាជំនាន់មុនដើម្បីបន្តនិងរក្សាទុកដល់ក្មេងជំនាន់ក្រោយៗ។
នៅរសៀលល្ងាចថ្ងៃទី១០ ខែសីហា ឆ្នាំ ២០២៤ ក្រុមការងារយើងមិនអាចទំនាក់ ទំនងទៅលោក អុន ចាន់សុជាតិ នាយខណ្ឌរដ្ឋបាលព្រៃឈើស្ទឹងត្រែង បាននៅឡើយទេដើម្បីសួរនាំអំពីចំណាត់ការបង្ក្រាបលើ បទល្មើសព្រៃឈើ តួនាទី និងភារកិច្ចរបស់មន្ត្រីនៅក្រោមបង្គាប់របស់លោក ទោះយ៉ាងណាអង្គភាពយើងខ្ញុំ និងរង់ចាំការបំភ្លឺ និងសុំសហការជាមួយមន្ត្រីជំនាញរៀងរាល់ម៉ោងធ្វើការ។
