ខេត្តសៀមរាប÷ នៅព្រឹកថ្ងៃទី២៤ ខែកក្កដា ឆ្នាំ២០២៤ នៅសាលាខេត្ត សៀមរាប មានបើកកិច្ចប្រជុំអនុគណៈកម្មការសុវត្ថិ ភាព ចរាចរណ៍ផ្លូវគោកខេត្ត ក្រោមកិច្ចដឹកនាំរបស់លោក ពិន ប្រាកដ អភិបាល រងខេត្ត និង ជាអនុប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប ដោយមានការអញ្ជើញចូលរួមពីលោកស្នង ការខេត្ត ព្រះរាជអាជ្ញាសាលាដំបូងខេត្ត និង សមាជិកសមាជិកាអនុគណៈកម្មការសុវត្ថិភាព ចរាចរណ៍ផ្លូវគោកខេត្ត ផងដែរ ។
នៅក្នុងរយៈពេល៦ខែដើមឆ្នាំ២០២៤នេះ ចំនួនគ្រោះថ្នាក់ចរាចរណ៍ និង អ្នកស្លាប់ដោយសារគ្រោះថ្នាក់ចរាចរណ៍ មានការកើនឡើងប្រមាណជា៧០% បើធៀបនឹងរយៈពេលដូចគ្នានៅឆ្នាំ២០២៣ ។
លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាបបានលើកឡើងថា បញ្ហាល្បឿន បានក្លាយជាមូលហេតុចម្បងដែលបង្កឲ្យមានគ្រោះថ្នាក់ចរាចរណ៍ញឹកញាប់។ លោកថា ជាមួយគ្នានេះ ក៏មានកត្តារួមផ្សំមួយចំនួនដូចជា ខ្វះការប្រុងប្រយ័ត្ន ខ្វះភ្លើងសញ្ញាចរាចរណ៍ កត្តាអាកាសធាតុ មិនពាក់មួកសុវត្ថិភាព ក៏ជាចំណែកមួយផងដែរ ។ ក្នុងនោះលោកបានសំណូមពរដល់លេខាធិការដ្ឋានសុវត្ថិភាពចរាចរណ៍ខេត្ត បង្កើនការដាក់ភ្លើងសញ្ញាចរាចរណ៍នៅតាមបណ្តាផ្លូវបំបែកជាបួន នៅតាមបណ្តាក្រុង ស្រុក ព្រមទាំងជម្រុញធ្វើការផ្សព្វផ្សាយពីច្បាប់ចរាចរណ៍នៅតាមសាលារៀន ទីប្រជុំជន ផ្លូវសាធារណៈជាដើម ។
លោក ពិន ប្រាកដ អភិបាលរងខេត្ត និង ជាអនុប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានលើកឡើងថា យោងតាមរបាយការណ៍ខាងលើ បានបង្ហាញថា ខេត្តសៀមរាប បានក្លាយជាខេត្តទី២ឈរពីក្រោយខេត្តកណ្តាល ដែលជាខេត្តដែលមានគ្រោះថ្នាក់ចរាចរណ៍ច្រើនជាងគេ ក្នុងចំណោម២៥រាជធានីខេត្ត។
លោកបន្តថាគ្រោះថ្នាក់ចរាចរណ៍ មិនត្រឹម តែបង្កឲ្យមានការខាតបង់ទ្រព្យសម្បត្តិ និងអាយុជីវិតមនុស្សប៉ុណ្ណោះទេ ប៉ុន្តែថែមទាំងបានបន្សល់ទុកនូវវិបត្តិសង្គមជាច្រើនទៀត ដូចជា ពិការភាព កុមារកំព្រា ស្រ្តីមេម៉ាយ ចាស់ជរាឥតទីពឹង ព្រមទាំងបង្កឲ្យមានផល ប៉ះពាល់យ៉ាងធ្ងន់ធ្ងរដល់សេដ្ឋកិច្ចសង្គម ដែលបណ្តាល មកពីការបាត់បង់ទ្រព្យសម្បត្តិ ធនធានមនុស្ស សមាជិកជាទីស្រលាញ់របស់ក្រុមគ្រួសារ កំលាំងពលកម្មសកម្ម សម្រាប់ទ្រទ្រង់សេដ្ឋកិច្ចគ្រួសារ ក៏ដូចជាសេដ្ឋកិច្ចជាតិទាំងមូល ។ យ៉ាងណាមិញ គោលបំណងសំខាន់បំផុត នៃសកម្មភាពរបស់អនុគណៈកម្មកាសុវត្ថិភាពចរាចរណ៍ផ្លូវគោកខេត្ត គឺដើម្បីពញ្ញាក់ស្មារតីអ្នកប្រើប្រាស់ផ្លូវទាំងឡាយ ឲ្យយល់ដឹងអំពីផលប៉ះពាល់នៃគ្រោះថ្នាក់ចរាចរណ៍ និងត្រូវយកចិត្តទុកដាក់គោរព ច្បាប់ស្តីពីចរាចរណ៍ផ្លូវគោកឲ្យ បានខ្ជាប់ ខ្ជួន សំដៅរួមគ្នាកាត់បន្ថយគ្រោះថ្នាក់ចរាចរណ៍ឲ្យមកនៅកម្រិតទាប ដែលនេះ គឺជាផ្នែកមួយដ៏សំខាន់ ដើម្បីឈានទៅចូលរួមលុបបំបាត់សកម្មភាពអនាធិប តេយ្យនៃការធ្វើចរាចរណ៍តាមដងផ្លូវសាធារណៈ និងជម្រុញការអនុវត្តច្បាប់ឲ្យទទួលបានលទ្ធផលជាវិជ្ជមាន។
លោកអភិបាលរងខេត្ត ក៏បានជម្រុញដល់កម្លាំងសមត្ថកិច្ច មន្ទីរ ស្ថាប័នពាក់ព័ន្ធ និង អាជ្ញាធរក្រុង ស្រុក ត្រូវបង្កើនការយកចិត្តទុកដាក់ធ្វើការអប់រំ ផ្សព្វផ្សាយ បង្ហាត់ បង្រៀន និងការបង្ហាញដល់ប្រជាពលរដ្ឋ សិស្សានុសិស្ស ឲ្យបានយល់ច្បាស់ពីស្លាកសញ្ញា និងភ្លើងចរាចរណ៍ នៅតាមសាលា រៀន ទីប្រជុំជន ក្នុងមូលដ្ឋានរបស់ខ្លួន ក្នុងការកាត់បន្ថយគ្រោះថ្នាក់ចរាចរណ៍នៅកម្ពុជា។ ករណីគ្រោះថ្នាក់ ចរាចរណ៍នេះ ធ្វើឲ្យប៉ះពាល់យ៉ាងខ្លាំងដល់សង្គមជាតិ និង ធ្វើឲ្យប៉ះពាល់ដល់សេដ្ឋកិច្ចក្នុងក្រុមគ្រួសារ និងសង្គមទៀតផង ។
ដោយយោងតាមរបាយការណ៍របស់លេខាធិការដ្ឋានសុវត្ថិភាពចរាចរណ៍ ដែលបានបង្ហាញនៅក្នុងកិច្ចប្រជុំរបស់អនុគណៈកម្មការសុវត្ថិភាពចរាចរណ៍ផ្លូវគោកខេត្ត សៀមរាប បានឲ្យដឹងថាគ្រោះថ្នាក់ចរាចរ ណ៍ក្នុងឆមាសទី១ឆ្នាំ២០២៤ ក្នុងភូមិសាស្រ្តទឹកដីខេត្តសៀមរាប បានកើត មានចំនួន ៧៥លើក កើនឡើង ៣៣លើក ស្មើ៧៨% និងបណ្តាលឱ្យ ស្លាប់ចំនួន៥៧ នាក់ ស្រី២០ នាក់ កើនឡើង២៤នាក់ ស្មើ៧២% របួសធ្ងន់ចំនួន៣៤នាក់ ស្រី៥នាក់ របួសស្រាល ចំនួន៧១នាក់ ស្រី២៥នាក់ កើនឡើង៤៣នាក់ ស្មើ១៥៣%។ សរុបអ្នករងគ្រោះ ចំនួន១៦២នាក់ (ស្រីចំនួន៥០នាក់) ក្នុងនោះមានបរទេស៦នាក់ ។ របាយការណ៍បានបង្ហាញផងដែរថា នៅក្នុងគ្រោះថ្នាក់ខាងលើ ក៏បានបណ្តាលឲ្យខូចខាតយានយន្តសរុប ១៣៥គ្រឿង ធ្ងន់៨៦គ្រឿង និងស្រាល៤៩ គ្រឿង ផងដែរ ៕
ដោយ ÷ ពន្លឺ
