រាជធានីភ្នំពេញ ៖ លោកឧត្តមសេនីយ៍ឯក រ័ត្ន ស្រ៊ាង មេបញ្ជាកងរាជអាវុធហត្ថរាជធានីភ្នំពេញ នៅថ្ងៃទី២៧ ខែធ្នូ ឆ្នាំ២០១៨នេះ បានបើកកិច្ចប្រជុំបន្ទាន់ ដើម្បីផ្សព្វផ្សាយផែនការ ការពារសន្តិសុខសណ្តាប់ធ្នាប់ ក្នុងពិធីសម្ពោធវិមានអនុស្សាវរីយ៍នយោបាយឈ្នះ ឈ្នះ និងអបអរសាទរខួបទី២០ នៃការបញ្ចប់សង្គ្រាមស៊ីវិលនៅកម្ពុជា។
ថ្លែងក្នុងឱកាសនេះ លោកឧត្តមសេនីយ៍ឯក រ័ត្ន ស្រ៊ាង បានលើកឡើងដោយម៉ឹងម៉ាត់ ចំពោះកម្លាំងអាវុធហត្ថរាជធានីភ្នំពេញទាំងអស់ គឺធ្វើយ៉ាងណា ត្រូវសហការជាមួយកម្លាំងសមត្ថកិច្ចចម្រុះ និងស្ថាប័នពាក់ព័ន្ធទាំងអស់ ក្នុងការការពារសន្តិសុខសណ្តាប់ធ្នាប់ ជូនប្រជាពលរដ្ឋដែលនឹងមកចូលរួម ដើរលេងកំសាន្តឲ្យបានហ្មត់ចត់បំផុត។
សូមជម្រាបថា បន្ទាប់ពីឆ្លងកាត់ភ្លើងសង្គ្រាមអស់ជាង៥០០ឆ្នាំ ក្រោយសម័យអង្គរកន្លងមក នៅចុងទសវត្សទី១០ នៃសតវត្ស២០ នាថ្ងៃទី២៩ ខែធ្នូ ឆ្នាំ១៩៩៨ កម្ពុជាក៏បានទទួលជោគជ័យដ៏ធំជាប្រវត្តិសាស្ត្រ គឺការបញ្ចប់សង្គ្រាមស៊ីវិលទាំងស្រុងទូទាំងប្រទេស ក្រោមនយោបាយឈ្នះឈ្នះ របស់អគ្គមគ្គុទេសដ៏ល្បីឆ្នើម គឺសម្តេចតេជោ ហ៊ុន សែន។
នៅក្នុងថ្ងៃទី២៩-៣០-៣១ ខែធ្នូ ឆ្នាំ២០១៨ រយៈពេល៣យប់៣ថ្ងៃ ក្នុងសង្កាត់ព្រែកតាសេក ខណ្ឌជ្រោយចង្វារ ទល់មុខនឹងពហុកីឡដ្ឋានមរតកតេជោ រាជធានីភ្នំពេញ នឹងមានកម្មវិធីដ៏ធំជាប្រវត្តិសាស្ត្រថ្មីមួយសម្រាប់កម្ពុជា គឺពិធីសម្ពោធវិមានអនុស្សាវរីយ៍នយោបាយឈ្នះឈ្នះ និងអបអរសាទរខួបទី២០ នៃការបញ្ចប់សង្គ្រាមស៊ីវិលនៅកម្ពុជា ក្រោមអធិបតីភាពសម្តេចតេជោ ហ៊ុន សែន និងអមដោយកម្មវិធីសំខាន់ៗ ដ៏រីករាយអធិកអធមប្រចាំជាតិជាច្រើន។
កម្មវិធីទាំងអស់នោះរួមមាន កម្មវិធីរត់ប្រណាំង ការជិះកង់លេងកម្សាន្ត និងការប្រណាំងកង់ជំនាញជ្រើសរើសជើងឯកប្រចាំឆ្នាំ២០១៨ ការរៀបចំស្តង់ពិព័ណ៌ «ភូមិផលិតផល» សមិទ្ធផលផលិតផលក្នុងស្រុក រួមទាំងផលិតផលរបស់ប្រទេសដៃគូ អាស៊ាន ចិន ជប៉ុន និងកូរ៉េ ដែលជាផលិតផលគោលដៅ បម្រើឱ្យវិស័យទេសចរណ៍ ការតាំងពិពណ៌ម្ហូបអាហារ និងភេសជ្ជ «ភូមិម្ហូបឆ្ងាញ់» និងការប្រកួតជើងឯកគុនខ្មែរពិភពលោក និងប្រកួតកម្រិតអាជីពខ្ពស់បំផុត នៃសិល្បៈគុនខ្មែរ (ជាមួយនឹងគូសងសឹកខ្មែរ-មីយ៉ាន់ម៉ា)។
ការប្រកួតជើងឯកអុកចត្រង្គ ស្វែងរកស្តេចអុកយុទ្ធសាស្ត្រ ឈ្នះឈ្នះ ការប្រកួតស្វែងរកបុរសខ្លាំង ការប្រណាំងក្របី រទេះគោ និងសេះ ការប្រកួតកីឡាមហាជនកម្សាន្តសប្បាយ ជាមួយចំបាប់បុរាណខ្មែរ, កម្មវិធីសម្តែងសិល្បៈវប្បធម៌បុរាណខ្មែរចម្រុះ (ល្ខោន និងរបាំខ្មែរ) ការបញ្ចាំងខ្សែភាពយន្តឲ្យទស្សនាដោយឥតគិតថ្លៃ, ការបាញ់កាំជ្រួចដ៏ធំ និងអស្ចារ្យជាងគេប្រចាំប្រវត្តិសាស្ត្រ និងការប្រគំតន្ត្រីខ្នាតយក្ស Uber Countdown Concert ដែលមានតារាចម្រៀងល្បីៗមកពីផលិតធំៗ រួមទាំងកម្មវិធីពិសេសៗជាច្រើនផ្សេងទៀត៕
ដោយ ៖ វិចិត្រ
