ខេត្តសៀមរាប: នាព្រឹកថ្ងៃទី១២ ខែកក្កដា ឆ្នាំ២០២៤ នេះ សាខាកាកបាទក្រហមកម្ពុជា ខេត្តសៀមរាប បានប្រារព្ធពិធីប្រគល់ផ្ទះមនុស្សធម៌ទី៩៣ ដែលជាអំណោយរបស់ ឯកឧត្តមបណ្ឌិត ហ៊ឺ វីរៈ និងលោកជំទាវ យី សុភា ព្រមទាំងបុត្រាបុត្រី ដែលមានទំហំ ៦ម៉ែត្រ គុណនឹង ៦ម៉ែត្រ មាន២បន្ទប់ ដំបូលប្រក់ស័ង្កសីភ្លីក្បឿង ជញ្ជាំងស្មាតបត បាតក្រាលការ៉ូ មានកម្ពស់ផុតពីដី ០.៤ម៉ែត្រ ប្រគល់ជូនគ្រួសារស្ត្រីមេម៉ាយក្រីក្រ ពិការជើងស្តាំ ឈ្មោះ ឡាច ពៃ ភេទស្រី អាយុ៤៧ឆ្នាំ រស់នៅភូមិរហាល ឃុំដូនកែវ ស្រុកពួក ខេត្តសៀមរាប ក្រោមវត្តមានរបស់លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី រួមទាំងលោក លោកស្រី គណៈកិត្តិយស គណៈកម្មា ធិការអនុសាខា និងអាជ្ញាធរមូលដ្ឋានចូលរួមផងដែរ។
លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានមានប្រសាសន៍ថា ដោយសារមើលឃើញពីសារជីវភាពក្រខ្សត់របស់បងស្រីឈ្មោះ ឡាច ពៃ ដែលជាស្រ្តីម៉េម៉ាយក្រីក្រ ពិការជើងស្តាំរស់នៅ ផ្ទះចាស់ដែល ជាខ្ទមផ្ទាល់ដី ទំហំ៣.៥x៤.៥ម៉ែត្រ សង់ផ្ទាល់ដី ដំបូលប្រក់កៅស៊ូតង់ ជញ្ជាំងបាំងស្លឹកត្នោតតែមួយជ្រុង ខាងគ្រែគេងប៉ុណ្ណោះ(ជាអតីតរោង គោ) ហើយជូនពេលខ្ទមជាជម្រករបស់គាត់ត្រូវរលំ ដោយខ្យល់កន្ត្រាក់អំឡុងឆ្នាំ២០២៣ គាត់ក៏ជួសជុលរោងគោនេះដើម្បីស្នាក់នៅបន្តដោយទីតាំងនេះស្ថិតក្នុងតំបន់អប្សរាពិបាកនឹងសុំច្បាប់សង់ជម្រក ថ្មីបន្ទាប់ពីរលំ ឬឆេះនោះផងដែរ ។
លោកជំទាវទុយ ជិ ក៏បានបន្តថាក្រោមការអំពាវនាវរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាក៏ដូចជាឯកឧត្តមប្រធានគណៈកម្មាធិការសាខាបាទក្រហមកម្ពុជាខេត្តសៀម រាប ក្នុងការកៀគរមូលនិធិ សប្បុរសជន ក្នុងការទ្រទ្រង់សកម្មភាពមនុស្សធម៌របស់ចលនាកាកបាទក្រហម និង ដោយមើលឃើញភាពខ្វះខាតជាក់ស្តែងរបស់បងប្អូនប្រជាពលរដ្ឋក្រីក្រនៅតាមមូលដ្ឋានសំខាន់ជនពិការ ចាស់ជរាគ្មានទីពឹង ស្ត្រីម៉េម៉ាយ កុមារកំព្រា ដែលគ្មានទីជម្រករស់នៅបានសមរម្យនឹងគេនៅក្នុងសង្គមជាតិ ទើបឯកឧត្តមបណ្ឌិត ហ៊ឺ វីរៈ និងលោកជំទាវ យី សុភា ក៏បានឧបត្ថម្ភនូវផ្ទះមួយខ្នងនេះ តាមរយៈសាខាកាកបាទក្រហមកម្ពុជា ខេត្តសៀម រាប ដើម្បីជាជម្រកដ៏កក់ក្តៅសម្រាប់តរៀងទៅ។
ក្នុងនោះផងដែរលោកជំទាវ ទុយ ជិ បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ប្រាក់ សោភ័ណ ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ ចោល”។ ហើយផ្ទះមនុស្សធម៌ប្រគល់ជូនចាប់ពីពេលនេះទៅ និងសូមឲ្យសម្អាត ថែរក្សាផ្ទះថ្មីនេះ ដើម្បីបានជាជម្រក បានជាម្លប់ដ៏កក់ក្តៅតរៀងទៅ។ លោកជំទាវ ក៏បានមានប្រសាសន៍ក្រើនរម្លឹកដល់លោក យាយ លោកតា អ៊ុំពូមីង សូមប្រុងប្រយ័ត្នចំពោះខ្យល់ ផ្គររន្ទះ សូមរកទីជំរកសុវត្ថិភាព ជាពិសេស សុខភាព ជារឿងសំខាន់សូមយកចិត្តទុកដាក់ចំពោះ សុខភាពផ្ទាល់ខ្លួន និងកូនចៅតូចៗ ដែលពួកគាត់ងាយកើតជំងឺផ្សេងៗនៅក្នុងរដូវវស្សានេះ និងសូមទៅមន្ទីរពេទ្យ ឬមណ្ឌលសុខភាព ដែលនៅជិតបំផុត បើឃើញថា អាការៈសុខភាពមិនប្រក្រតី។ សម្រាប់អំណោយមនុស្សធម៌បន្ថែមមាន អង្ករ ៦០គ.ក្រ ,មី ១កេស , ត្រីខ ១យួរ ,ទឹកត្រី ១យួរអំបិល ១គ.ក្រ, កន្ទេល២ ,ឃីត ២កញ្ចប់ , សម្ភារៈផ្ទះបាយមួយចំនួន និងថវិកា ៤០ម៉ឺនរៀល និងក្នុងនោះដែរ យាយតាពូមីងបងប្អូនគ្រួសារក្រីក្រចូលរួមក្នុងពិធីប្រគល់ផ្ទះទាំងពីរចំនួន ៥០នាក់ដោយ ម្នាក់ៗទទួលបាន អង្ករ៣០ គីឡូក្រាម, មី១កេស, ត្រីខ១យួរ, ទឹកត្រី១យួរ , អំបិល ១គ.ក្រ ឃីត ១កញ្ចប់ និងថវិកា៤ម៉ឺនរៀលផងដែរ៕
ដោយ÷ ពន្លឺ
