រាជធានីភ្នំពេញ៖ ប្រភពពីមន្ត្រីរាជការនៅ ក្នុងមន្ទីរសាធារណការនិង ដឹកជញ្ជូនខេត្តកណ្ដាល បានបង្ហើបឲ្យដឹងថា៖ លោក ម៉ឹ ង យូ ឡេង ប្រធានមន្ទីរសាធារណការ ខេត្តកណ្ដាល កំពុងបើកដៃឲ្យក្រុមមន្ត្រី ប្រចាំស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ ផ្លូវជាតិលេខ៣ និងផ្លូវជាតិលេខ៤ ប្រព្រឹត្តអំពើពុករលួយយ៉ាងពេញបន្ទុក។
ប្រភពបានឲ្យដឹងទៀតថា មន្ត្រីប្រចាំស្ថានីយ៍ជញ្ជីងថ្លឹងរថយន្តទាំង៣ទីតាំងនោះ បានប្រែក្លាយជញ្ជីងថ្លឹងរថយន្តទៅជាជញ្ជីងថ្លឹងលុយយ៉ាងសុខស្រួល ហើយទាល់តែមានការឃុបឃិតបើកដៃពីសំណាក់លោក ម៉ឹង យូឡេង ទើបពួកគេហ៊ានធ្វើអ្វីៗតាមអំពើចិត្ត។ ដូច្នេះលោក ស៊ុន ចាន់ថុល រដ្ឋមន្រ្តី ក្រសួងសាធារណការនិងដឹកជញ្ជូន គួរពិនិត្យឡើងវិញជាបន្ទាន់ចំពោះទង្វើមិនប្រក្រតីនិងរឿងអាស្រូវពុករលួយរបស់លោក ម៉ឹង យូឡេង ប្រធានមន្ទីរសាធារណការខេត្តកណ្ដាល ព្រមទាំងបក្ខពួកខ្លះផងដើម្បីកុំឲ្យពួកគេធ្វើអ្វីៗតាមអំពើចិត្តទៀត។
ករណីលោក ម៉ឹង យូឡេង ប្រធានមន្ទីរសាធារណការនិងដឹកជញ្ជូនខេត្តកណ្ដាល ហ៊ានធ្វើអ្វីៗតាមអំពើចិត្តត្រូវបានមន្ត្រីរាជការក្នុងមន្ទីរសាធារណការខេត្តកណ្ដាល មួយចំនួនបង្ហើបឲ្យដឹងថាគឺដោយសារលោក ម៉ឹង យូឡេង អាងមានខ្នងបង្អែករឹងមាំនៅក្នុងក្រសួងសាធារណការ និងដឹកជញ្ជូន ចាំជួយការពារគ្រប់ពេលវេលា។
ដូច្នេះហើយទើបលោក ម៉ឹង យូឡេង ឃុបឃិតបើកដៃឲ្យមន្ត្រីប្រចាំស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ លើផ្លូវជាតិលេខ៣ និងលើផ្លូវជាតិលេខ៤ ប្រែក្លាយជញ្ជីងថ្លឹងរថយន្តទៅជាជញ្ជីងថ្លឹងលុយយ៉ាងគឃ្លើន។ ជាងនេះទៅទៀតបច្ចុប្បន្នលោក ម៉ឹង យូឡេង កំពុងប្រើតួនាទីនិងអំណាចធ្វើអ្វីៗស្រេចតែអំពើចិត្តរបស់ខ្លួន ហើយក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តជាច្រើនកន្លែងក្នុងខេត្តកណ្ដាល កំពុងបង្កើនសកម្មភាពប្រព្រឹត្តអំពើពុករលួយដោយគ្មានញញើតអ្វីទាំងអស់។ ស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ ភូមិព្រះពុទ្ធ លើផ្លូវជាតិលេខ៣ ភូមិកំពង់ទួល និងលើផ្លូវជាតិលេខ៤ ជិតសាលាស្រុកអង្គស្នួល គាបយកលុយពីម្ចាស់រថយន្តដឹកទំនិញ រថយន្តដឹកដី ដឹកខ្សាច់ ដឹកថ្ម តាមអំពើចិត្ត។ ទោះបីឈ្មួញដឹកជញ្ជូនទំនិញទុកលើទម្ងន់ឬមិនលើសទម្ងន់យ៉ាងណាក៏ដោយ ពួកគេត្រូវបង់លុយតាមការកំណត់របស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តទាំង៣កន្លែងនោះ ដោយគ្មានការរំខាន។
មន្ត្រីនៅក្នុងមន្ទីរសាធារណការនិងដឹកជញ្ជូនខេត្តកណ្ដាល បានឲ្យដឹងទៀតថា ការដោះដូរទីតាំងអង្គភាពស្ពាន-ថ្នល់ នៃមន្ទីរសាធារណការខេត្តកណ្ដាល នាពេលកន្លងមកគឺលោក ម៉ឹង យូឡេង អាចទទួលបានផលប្រយោជន៍យ៉ាងច្រើន។ ដោយហេតុថាទីតាំងចាស់មានផ្ទៃដីប្រមាណ២ហិកតានៅក្នុងភូមិថ្មី សង្កាត់តាខ្មៅ ក្រុងតាខ្មៅ ជាតំបន់ដែលដីមានតម្លៃខ្ពស់ ហើយទីតាំងថ្មីនៅភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្ដាល ចូលពីផ្លូវជាតិលេខ២១ ចម្ងាយជាង១គីឡូម៉ែត្រ។ ដូច្នេះការដោះដូរទីតាំងនោះកំពុងធ្វើឲ្យមានសេចក្ដីសង្ស័យយ៉ាងច្រើនពីភាពមិនប្រក្រតីដែលថ្នាក់ដឹកនាំក្រសួងសាធារណការនិងដឹកជញ្ជូនមិនគួរមើលរំលងនោះឡើយ៕
ដោយ ៖ សិរីបុត្រ
