គណៈកម្មការរៀបចំការបោះឆ្នោតខេត្តសៀមរាបបើកសន្និបាតបូកសរុបការងារបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ និង ការបោះឆ្នោះជ្រើសរើសក្រុមប្រឹក្សាខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤

ខេត្តសៀមរាប ÷ នាព្រឹកថ្ងៃទី ០៥ ខែ មិថុនា ឆ្នាំ២០២៤ នេះ គណៈកម្មការរៀបចំការបោះឆ្នោតខេត្តសៀមរាប បានបើកសន្និបាតបូកសរុបការងារបោះឆ្នោតជ្រើសតាំងសមាជិកព្រឹទ្ធសភា នីតិកាល ទី៥និងការបោះឆ្នោះជ្រើសរើសក្រុមប្រឹក្សា ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ក្រោមអធិបតីភាពឯកឧត្តម ឌឹម សុវណ្ណារុំ សមាជិកគណៈកម្មាធិការជាតិរៀបចំការបោះឆ្នោត និងជាប្រធានក្រុមប្រតិកម្មព័ត៌មាន ឯកឧត្តម គុជ លីណា សមាជិកក្រុម ប្រឹក្សាខេត្ត លោក អ៊ឹង គឹមលាង អភិបាលរង ដោយមានការអញ្ជើញចូលរួមពីលោក លោកស្រីជាគណៈអភិបាលក្រុង ស្រុក ក្រុមប្រឹក្សាឃុំ សង្កាត់ តំណាងគណបក្ស នយោបាយ និង មន្ត្រីគណៈកម្មការរៀបចំការបោះឆ្នោតខេត្ត សរុបប្រមាណ ១៧០នាក់ដែលបានចូលរួម ។

លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានគូសបញ្ជាក់ថា អង្គសន្និបាតនេះធ្វើឡើង ក្នុងគោលបំណងធ្វើការបូកសរុបលទ្ធផល និងវាយតម្លៃ ព្រមទាំងធ្វើការស្វែងយល់ពីចំណុចខ្លាំង និង បញ្ហាប្រឈម ក្នុងការបោះឆ្នោតនាពេលកន្លងមក ដើមី្បសម្រាប់ជាបទពិសោធន៍ និង ធ្វើការកែលម្អក្នុងការបោះឆ្នោត នៅពេលក្រោយៗទៀត ឲ្យទទួលបានលទ្ធផលល្អឡើង សំដៅទៅលើការរៀបចំ ការបោះឆ្នោតឲ្យប្រព្រឹត្តទៅ មានលក្ខណៈ សេរី ត្រឹមត្រូវ យុត្តិធម៌ និង មានតម្លាភាព និងទទួលយកបាននូវលទ្ធផលនៃការបោះឆ្នោត ដោយមានការទទួលស្គាល់ពីមជ្ឈដ្ឋានជាតិ អន្តរជាតិ ។

បន្ទាប់ពីសេចក្តីរាយការណ៍ពីលទ្ធផលការងារ និង ការងារសន្តិសុខសណ្តាប់ធ្នាប់ក្នុងរយៈពេលធ្វើការឃោសនា និង ការបោះឆ្នោត ព្រមទាំងឆ្លងតាមកិច្ចពិភាក្សា និង ការលើកនូវចំណោទបញ្ហាមួយចំនួន នៅតាមបណ្តាការិយាល័យបោះឆ្នោត ក៏ត្រូវបានធ្វើការ បកស្រាយបំភ្លឺជូនដល់សមាជិកអង្គសន្និបាតដែលបានលើកឡើងផងដែរ ។

ក្នុងឱកាសនោះ លោក អ៊ឹង គឹមលាង ក៏បានធ្វើការឯកភាព និងវាយតម្លៃខ្ពស់ ទៅលើលទ្ធផលការងារ បោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ និង ការបោះឆ្នោះជ្រើសរើសក្រុមប្រឹក្សាខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ព្រមទាំងបានក្រើនរំលឹកដល់មន្ទីរអប់រំ យុវជន និងកីឡាខេត្ត ជម្រុញដល់ គ្រប់គ្រឹះស្ថានសិក្សា ទាំងរដ្ឋ និងឯកជន ជម្រុញដល់សិស្សដែលគ្រប់អាយុ១៨ឆ្នាំ ក៏ដូចអាជ្ញាធរឃុំ សង្កាត់ ឲ្យទៅចុះឈ្មោះ បោះឆ្នោត នៅតាមសាលាឃុំ សង្កាត់ ព្រមទាំងសូមឲ្យគ្រប់គណបក្សនយោបាយទាំងអស់ ត្រូវចូលរួមក្នុងកិច្ចកសាងសមទ្ធិផលជាតិ ដើមី្បជាផលប្រយោជន៍ជាតិ និងសហគមន៍ខ្លួន ។

មានប្រសាសន៍នោះដែរ ឯកឧត្តម ឌឹម សុវណ្ណារុំ ក៏បានធ្វើការវាយតម្លៃខ្ពស់ ទៅលើលទ្ធផលនៃរបាយការណ៍របស់ គណៈកម្មការរៀបចំការបោះឆ្នោតខេត្តសៀមរាប ដែលបានអនុវត្តការងារបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ និងការបោះឆ្នោះជ្រើសរើសក្រុមប្រឹក្សារខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ដែលទទួលបាននូវ លទ្ធផលជាផ្លែផ្កា ដែលធ្វើឲ្យបេះដូងនៃលទ្ធិប្រជាធិបតេយ្យនៅកម្ពុជា កាន់តែធ្វើឲ្យប្រទេសប្រកាន់លទ្ធិប្រជាធិបតេយ្យបាន ទទួលស្គាល់ទៀតផង ។

ក្នុងនោះដែរឯកឧត្តមក៏បានធ្វើបកស្រាយ និង ធ្វើការពន្យល់បន្ថែមនូវរាល់សំណួរសំណូមពរដែល សមាជិក អង្គសន្និបាតបានលើកឡើង ព្រមទាំងបានផ្តល់នូវបទពិសោធន៍ និង អនុសាសន៍ល្អៗមួយចំនួន សម្រាប់គណៈកម្មការរៀបចំការបោះឆ្នោតខេត្ត និង អាជ្ញាធរក្រុង ស្រុក ឃុំសង្កាត់ យកទៅអនុវត្តបន្ត ឲ្យស្របទៅតាមច្បាប់នៃការបោះឆ្នោត ។

ឆ្លៀតក្នុងឱកាសនោះឯកឧត្តម ក៏បានធ្វើការក្រើនរំលឹក និង ជម្រុញដល់រដ្ឋបាលក្រុង ស្រុក ធ្វើការជម្រុញដល់រដ្ឋបាលឃុំ សង្កាត់ ធ្វើនូវបច្ចុប្បន្នភាព នៃអ្នកគ្រប់អាយុ ត្រូវចុះឈ្មោះបោះឆ្នោត ឲ្យបានគ្រប់ៗគ្នា ។ ឯកឧត្តម ឌឹម សុវណ្ណារុំ ក៏បានគូស បញ្ជាក់ថា ឆ្នាំ២០២៤នេះ កម្ពុជាយើងបានរៀបចំធ្វើការបោះឆ្នោតអសកល ចំនួនពីរ .ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោះជ្រើសរើសក្រុមប្រឹក្សារខេត្ត ក្រុង ស្រុក ខណ្ឌ អាណត្តិទី៤ ។ ក្នុងនោះនៅខេត្ត សៀមរាប ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ មានគណបក្សនយោបាយចំនួន៤ ចូលរួម ហើយការបោះឆ្នោះជ្រើសរើសក្រុមប្រឹក្សារខេត្ត ក្រុង ស្រុក ខណ្ឌ អាណត្តិទី៤ មានគណបក្សនយោបាយចំនួន ៥ចូលរួម គឺ គណបក្ស ប្រជាជនកម្ពុជា , គណបក្សឆន្ទះខ្មែរ , គណបក្សកម្លាំងជាតិ , គណបក្សខ្មែររួបរួមជាតិ និង គណបក្សហ៊្វុនស៊ិនប៉ិច ដែលបាន ប្រព្រឹត្តទៅប្រកបដោយ ឯករាជ្យ អព្យាក្រឹត្យ សច្ចះ យុត្តិធម៌ តម្លាភាព គ្មានអំពើហិង្សា និង ការគម្រាមកំហែង ស្របតាម គោលការណ៍នៃលទ្ធិប្រជាធិបតេយ្យ ៕

ដោយ ÷ ពន្លឺ