រាជធានីភ្នំពេញ ៖ កម្មករប្រមូលសំរាមរបស់ក្រុមហ៊ុន ស៊ីនទ្រី ជាង២ពាន់នាក់ ប្រមូលផ្ដុំគ្នាធ្វេីកូដកម្ម កាលពីម៉ោង៧យប់ថ្ងៃទី២៧ខែធ្នូឆ្នាំ២០១៨ នៅការ៉ាសរថយន្តស៊ីនទ្រី ផ្លូវបេតុបឹងតាម៉ាត ភូមិម័ល សង្កាត់ដង្កោ ខណ្ឌដង្កោ តវ៉ា មិនធ្វើការ ដោយទាមទារអោយក្រុមហ៊ុន តំឡើងប្រាក់ខែអោយពួកគេ ចំនួន១៥ដុល្លារបន្ថែម លើប្រាក់ខែគោលបច្ចុប្បន្ន ។
កម្មករប្រមូលសំរាមរបស់ក្រុមហ៊ុន ស៊ីនទ្រី ជាង២ពាន់នាក់ ទាមទារលក្ខខណ្ឌ ចំនួន៤ចំណុច ដូចជា ៖ ១-សុំអោយក្រុមហ៊ុនទូទាត់ប្រាក់ឈប់សំរាកប្រចាំឆ្នាំដែលនៅសល់
២-ទូទាត់ប្រាក់បំណាច់អតីតភាពការងារតាមប្រកាសលេខ ៤៤៣ ក.ប.ប្រ.ក.ខល
៣-ស្នើសុំតំឡើងប្រាក់ឈ្នួលប្រចាំឆ្នាំ ចំនួន១៥$ សម្រាប់ឆ្នាំ២០១៩ និង
៤-បញ្ហាផ្សេងៗ ។
កូដកម្មនេះដឹកនាំដោយសហជីពកម្មករនិយោជិកវិស័យទេសចរណ៍ ដែលដឹកនាំដោយលោក ទូច កុសល ហេីយក្នុងការតវ៉ានេះ កម្មករស៊ីនទ្រី បានប្រាប់អោយភ្នាក់ងារសារព័ត៌មានដឹងថា ប្រាក់ខែពួកគាត់ បានចែកជា២វេន គឺវេនយប់និងថ្ងៃ ដោយអ្នកធ្វើការវេន ថ្ងៃទទួលបានប្រាក់ខែចំនួន៥១ម៉ឺន និងអ្នកធ្វើការវេនយប់ទទួលបានប្រាប់ខែ៦១ម៉ឺន ហើយពួកគាត់មាននាំគ្នាធ្វើការតវ៉ានេះ ដោយពួកគាត់ទាមទារ អោយខាងក្រុមហ៊ុន តំឡើងប្រាក់ខែចំនួន១៥ដុល្លារ លើប្រាក់ខែគោលពួកគាត់បន្ថែមទៀត ព្រមទាំងអោយក្រុមហ៊ុន ផ្តល់សេវ៉ាថែមទាំងសុខភាព នឹងមានប្រាក់បំណាច់ប្រចាំឆ្នាំ និងប្រាក់ឧមត្ថមអាហារដូច កម្មករ កម្មការនី រោងចក្រផងដែរ ។
ជាលទ្ធិផលក្នុងការដោះស្រាយ ភាគីក្រុមហ៊ុនស៊ិនទ្រី ព្រមព្រាងចំនួន ០៣ចំណុចគឺទី(១.២.៤) ចំពោះចំណុចទី៣ ដែលកម្មករស្នើសុំតំឡើងប្រាក់ឈ្នួលប្រចាំឆ្នាំ១៥$បន្ថែម ពីលើប្រាក់ខែបច្ចុប្បន្ន គឺខាងក្រុមហ៊ុនអោយតែ៦$ប៉ុណ្ណោះ និងតំឡើងអោយ១$ទៀត នៅខែ០៧ ឆ្នាំ២០១៩ តែខាងកម្មករមិនព្រមទទួលយកដំណោះស្រាយនេះទេ តែបញ្ចុះនៅត្រឹម១២$។
ក្នុងហេតុការណ៍នេះដែរ ក៏មានការប៉ះទង្គិចគ្នា រវាងកម្មករស៊ីនទ្រីគ្នាឯង និងកម្មករគ្នាឯង ដោយមានអ្នកខ្លះចង់បានប្រាក់ខែប៉ុណ្ណឹង ហើយអ្នកខ្លះទៀត ទាមទារតំឡើងប្រាក់ខែ ។
ដោយឡែកខាងក្រុមហ៊ុនវិញ ក៏បានហៅតំណាងខាងកម្មករអោយចូលចរចារគ្នា តែខាងក្រុមហ៊ុនឡើងអោយដែរ តែតំលៃទៀបពេក គឺត្រឹមតែ៦ដុល្លារ ទើបពួកគាត់ជាកម្មករទទួលយកមិនបាន គឺទាមទារ ១២ដុល្លារ ទើបព្រមចូលធ្វើការវិញ ដូច្នេះហេីយបេីសិនជាការចរចាមិនត្រូវគ្នាទេ ខាងកម្មករមិនព្រមចេញទៅប្រមូលសំរាមវិញឡើយ៕
ដោយ ៖ សិរីបុត្រ
