រាជធានីភ្នំពេញ ៖ ព្រឹកថ្ងៃអង្គារ ៣ រោច ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែធ្នូ ឆ្នាំ២០១៨ វេលាម៉ោង០៨:០០នាទី នៅវិមានព្រឹទ្ធសភា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងសម័យប្រជុំលើកទី២ ព្រឹទ្ធសសភា នីតិកាលទី៤ ដោយមានសមាជិក សមាជិកា ព្រឹទ្ធសភាចំនួន៥៦ចូលរួមនិងមានរបៀបវារៈដូចខាងក្រោម៖
១-ពិនិត្យ និងឲ្យយោបល់លើសេចក្តីស្នើច្បាប់ស្តីពី វិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពី គណបក្សនយោបាយ។
២-ពិនិត្យ និងឲ្យយោបល់លើសេចក្តីព្រាងច្បាប់ស្តីពី បរធនបាលកិច្ច។
តំណាងក្រុមតំណាងរាស្ត្រហត្ថលេខី និងសហការីចំនួន៩រូបដឹកនាំដោយឯកឧត្តមបណ្ឌិតរដ្ឋ ជាម យៀប បានអញ្ជើញចូលបំភ្លឺសេចក្តីស្នើ ច្បាប់ក្នុងរបៀបវីរៈទី១។
តំណាងរាជរដ្ឋាភិបាលដឹកនាំដោយឯកឧត្តម អគ្គបណ្ឌិតសភាចារ្យ អូន ព័ន្ធមុនីរដ្ឋ ឧបនាយករដ្ឋមន្ត្រីក្រសួងសេដ្ឋកិច្ចហិរញ្ញវត្ថុ អមដោយ មន្ត្រីជាន់ខ្ពស់និងមន្ត្រីជំនាញចំនួន១០រូបបានចូលបំភ្លឺសេចក្តីព្រាងច្បាប់ក្នុងរបៀបវារៈទី២។
បន្ទាប់ពីបានស្តាប់របាយការណ៍របស់ឯកឧត្តមប្រធានគណ:កម្មការដែលជា វិស័យសមត្ថកិច្ចរាយការណ៍ជូនអំពីការពិនិត្យ សិក្សាលើសេចក្តីស្នើច្បាប់ និងសេចក្តីព្រាងច្បាប់ខាងលើ និងស្តាប់មតិពិភាក្សាផ្តល់យោបល់ ស្តាប់មតិបំភ្លឺតំណាងរាស្ត្រហត្ថលេខី និងតំណាងរាជរដ្ឋាភិបាលរួចមក អង្គព្រឹទ្ធសភាក៏បានធ្វើការអនុម័តលើខ្លឹមសារទាំងមូលនៃសេចក្តីស្នើច្បាប់ និងសេចក្តីព្រាងច្បាប់ទាំង២ខាងលើ ដោយសម្លេងគាំទ្រឥតកែប្រែ និងចាត់ទុកជាការប្រញាប់ចំនួន៥៦សម្លេងនៃចំនួនសមាជិកព្រឹទ្ធសភាទាំងមូល។
ដោយ ៖ សិរីបុត្រ
