ខេត្តសៀមរាប ÷ កុដិថ្មថ្មី០១ខ្នងនិង ផ្លូវបេតុងចូលវត្តចំនួន ០១ខ្សែ ប្រវែង ១៥៤ ម៉ែត្រ ទទឹង ៥ម៉ែត្រការ៉េ កំរ៉ាស់ ១តឹកកន្លះ និងជើងទង់ ០៦ដើម ដែលចំណាយថវិកាបានសាងសង់ជាង៧ម៉ឺនដុល្លារ និង៥លានរៀលនៅវត្តរតនមុនីរោងគោ ក្នុងភូមិរោងគោ ឃុំរោងគោ ស្រុកក្រឡាញ់ ខេត្តសៀមរាបត្រូវបានកាត់ខ្សែបូរសម្ពោធឆ្លងដាក់ឲ្យប្រើប្រាស់នៅព្រឹកថ្ងៃទី១៨ ខែមេសា ឆ្នាំ២០២៤ ក្រោមអធិបតីភាព ឯកឧត្ដមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប។
បើតាម លោក សុខ ណារ៉េត អភិបាលស្រុកក្រឡាញ់ ឱ្យដឹងថា៖សមិទ្ធផលថ្មីទាំងនេះ កើតឡើង ក្រោមការផ្តួចផ្តើមគំនិត និងចូលរួម ជួយឧបត្ថម្ភរបស់គណៈកម្មការ អាចារ្យវត្ត ព្រះចៅអធិការ ពុទ្ធបរិស័ទចំណុះជើងវត្ត ពិសេស ព្រះគ្រូចៅអធិការវត្ត បានគៀងគរប្រមូលបច្ឆ័យពីគ្រប់ទិសទីទាំងសប្បុរសជនក្នុងស្រុក និងក្រៅស្រុក ។ គិតមកដល់ពេលនេះ គណៈកម្មការ សាងសង់នៅជំពាក់ថ្លៃសំភារៈសំណង់កសាងកុដិចំនួន ប្រាំពីរលានរៀល និងនៅជំពាក់ថ្លៃសាងសង់ផ្លូវបេតុងចំនួន ម្ភៃប្រាំលានរៀល សរុបនៅខ្វះចំនួន ៣២លានរៀល ។
មានប្រសាសន៍ក្នុងឱកាសនោះ ឯកឧត្តម អ្នកឧកញ៉ា សៀង ណាំ បានថ្លែងថា ប្រទេសកម្ពុជា ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន អតីតនាយករដ្ឋមន្រ្តី បច្ចុប្បន្នជាប្រធានព្រឹទ្ឋសភា បានធ្វើឲ្យប្រទេសជាតិទាំងមូលមានសុខសន្តិភាព និងភាពជាម្ចាស់ពេញលេញក្នុងការដឹកនាំជោគវាសនាដ៏ប្រពៃរបស់ខ្លួន ដើម្បីស្វែងរកសន្តិភាព វឌ្ឍនភាព និងសេចក្តីថ្លៃថ្នូរ ជូនប្រជាជនខ្មែរគ្រប់រូបពោល គឺកម្ពុជាមាន ការបង្រួបបង្រួមជាតិ សន្តិភាពពេញលេញ មានឯករាជ្យភាព មានកំណើនសេដ្ឋកិច្ចខ្ពស់ និងមានប្រជាធិបតេយ្យពិតប្រាកដ។
ឯកឧត្តម មានប្រសាសន៍ថា ដោយឡែកសមិទ្ធផលដែលបានរៀបចំពីធីកាត់ខ្សែបូ ដាក់ឲ្យប្រើប្រាស់ នៅថ្ងៃនេះដែរ វាគឺជាសក្ខីភាពថ្មីមួយបន្ថែមទៀតដែរ ជាសម្បត្តិសាធារណៈរបស់វត្តសម្រាប់បងប្អូនប្រជាពលរដ្ឋ លោកយាយលោកតាក្នុងឃុំរោងគោ ស្រុកក្រឡាញ់ ខេត្តសៀមរាបទាំងមូលប្រើប្រាស់ទាំងអស់គ្នា។
ឯកឧត្តម បានរម្លឹកថា៖ក្រោយថ្ងៃ ១៧ មេសា ឆ្នាំ ១៩៧៥ ក្រោមការគ្រប់គ្រង ដោយរបបខ្មែរក្រហម ប៉ុល ពត ព្រះសង្ឃ ដែលគង់ក្នុងវត្តអារាមនេះក៏ដូចជាអារាមនានាក្នុងទូទាំងប្រទេសត្រូវបានពួកប៉ុល ពត ប្រល័យពូជសាសន៍ បានជំលៀស និងបង្ខំព្រះសង្ឃឲ្យសឹកទាំងអស់ សំណង់ទាំងឡាយក្នុងវត្ត រួមមាន កុដ្តិ សាលាឆាន់ ក៏ត្រូវពួកគេរុះរើ និងបំផ្លិចបំផ្លាញអស់គ្មានសល់ មិនតែប៉ុណ្ណោះពួកគេបានយកទីកន្លែងជាទីគោរពសក្ការៈ ទៅធ្វើជាកន្លែងស្នាក់ការ របស់ក្រុមឃាតករបាតដៃប្រលាក់ឈាម របស់ពួកខ្មែរក្រហម ប៉ុល ពត ផងដែរ ។
ជាមួយគ្នានេះដែរ ឯកឧត្តម អ្នកឧកញ៉ា សៀង ណាំ បានអំពាវនាដល់បងបង្អូនប្រជាពលរដ្ឋ និងអ្នកធ្វើដំណើរតាមដងផ្លូវត្រូវគោរច្បាប់ចរាចរណ៍ ដោយប្រកាន់ឱ្យបានខ្ជាប់ខ្ជួនអំពីសុវត្ថិភាពចរាចរណ៍ បើកបរតាមល្បឿនកំណត់ និងបើស្រវឹងសូមកុំបើកបរ កុំផ្ទុកមនុស្ស ឬសម្ភារៈលើសចំណុះ។ បញ្ហាគ្រោះថ្នាក់ដោយសារចរាចរណ៍ បានបង្កផលប៉ះពាល់ធ្ងន់ធ្ងរដល់អាយុជីវិត បង្កនូវពិការភាព បន្សល់ទុកនូវស្ត្រីម៉េម៉ាយ កុមារកំព្រា និងខាតបង់សេដ្ឋកិច្ចគ្រួសារ និងសេដ្ឋកិច្ចសង្គមជាតិច្រើនណាស់។
ក្នុងឱកាសនោះ ឯកឧត្តម បានប្រគេនព្រះចៅអធិការនូវថវិកាចំនួន១២លានរៀល ឧបត្ថម្ភដល់ដូនជីតាជី៥០នាក់ម្នាក់ៗទទួលបានក្រណាត់ស០១ដុំនិងថវិកា៥ពាន់រៀល។ ប្រជាពលរដ្ឋ៥០០នាក់ម្នាក់ៗសារុង០១ លោកគ្រូអ្នកគ្រូ៦នាក់ម្នាក់ៗថវិកា៥ម៉ឺនរៀល និងសិស្សានុសិស្ស៤៥ នាក់ម្នាក់ៗទទួលបានសៀវភៅ០២ក្បាល ប៊ិក០២ដើម និងថវិកា៥ពាន់រៀល។ សរុបថវិកាទាំងប្រគេនចៅអធិការនិងឧបត្ថម្ភនេះចំនួន២២លានរៀលផងដែរ៕
ដោយ ÷ ពន្លឺ
