រាជធានីភ្នំពេញ ៖ ក្រោយពីមានការផ្សព្វផ្សាយតាមបណ្តាញសង្គម FaceBook ដោយគណនេយ្យមួយដែលមានឈ្មោះថា CBN Khmer ថាមានការបញ្ជាឲ្យចាប់ខ្លួនលោកឧកញ៉ា គិត ម៉េង នោះ ភ្លាមៗកាលពីរសៀលថ្ងៃទី២២ ខែធ្នូ ម្សិលមិញ ក្រុមហ៊ុន CBS ដែលជាក្រុមហ៊ុនប្រព័ន្ធផ្សព្វផ្សាយរបស់លោកឧកញ៉ា គិត ម៉េង បានចេញលិខិតធ្វើការបដិសេធចំពោះព័ត៌មាននេះ។
ក្រុមហ៊ុន CBS បានលើកឡើងថា ខណៈនេះអ្នកឧកញ៉ា គិត ម៉េង អគ្គនាយកក្រុមហ៊ុន CBS កំពុងចូលរួមក្នុងវិធីសប្បាយរីករាយជាមួយក្រុមគ្រួសារ និងមិត្តភក្តិនៅឯខេត្តសៀមរាប ទឹកដីបវរ អច្ឆរិយៈ នៃកម្ពុជា និងពុំមានការចាប់ខ្លួនអ្វីឡើយ។
ក្រុមហ៊ុន CBS បានចាត់ទុកថា ទង្វើរបស់ facbook page ឈ្មោះ CBN Khmer គឺជាការផ្សាយដោយអសីលធម៌ បម្រើឲ្យគោលដៅនយោបាយទុច្ចរិតដើម្បីបង្ខូច និងប្រមាថដល់សេចក្តីថ្លៃថ្នូររបស់ថ្នាក់ដឹកនាំជាតិ និងអ្នកឧកញា គិត ម៉េង ដោយខុស ជាពិសេសការផ្សាយនេះ គឺក្នុងបំណងបំពុលបំភ័ន្តប្រជាជនកម្ពុជាឲ្យរំជើបរំជួល និងចលាចលចំពោះព័ត៌មានមិនពិតនេះ៕
ដោយ ៖ សិរីបុត្រ
