ខេត្តសៀមរាប ÷ កាលពីរសៀលថ្ងៃទី០៦ ខែមីនា ឆ្នាំ២០២៤ រដ្ឋបាលខេត្តសៀមរាប បានសហការជាមួយក្រុមហ៊ុន Solution Natural Resource And Environment (SNR&E) បានបើកសិក្ខា សាលាស្តីពីការ ចែករំលែក និងផ្លាស់ប្តូរចំណេះដឹងពីការថែរក្សាសុខភាព ក្នុងការការពារមិនឱ្យកើតជំងឺទឹកនោមផ្អែម និងវិធីសាស្ត្រថែរក្សា និងការពារមិនឱ្យកើតជំងឺទឹកនោមផ្អែម និងជំងឺតំរងនោម ក្រោមអធិបតីភាព លោក ពិន ប្រាកដ អភិបាលរងខេត្តសៀមរាប ដោយមានសិក្ខាមចូលរួមពីសំណាក់អស់លោក លោកស្រី តំណាងមន្ទីរ-អង្គភាពនានាជុំវិញខេត្ត លោក លោកស្រី ក្រុមប្រឹក្សាសង្កាត់ក្នុងក្រុង និងតំណាងអង្គការ-សមាគមផងដែរ។
លោក អ៊ុល គិមស៊ា ប្រធានក្រុមសិក្សាស្រាវជ្រាវក្រុមហ៊ុន Solution Natural Resource And Environment (SNR&E) បានមានប្រសាសន៍លើកឡើងថា ជម្ងឺទឹកនោមផ្អែម ជាប្រភេទជម្ងឺមួយដែលលាក់មុខ និងពេញនិយម ហើយពេលបច្ចុប្បន្ន ប្រជាជនជាច្រើន បានជួបជម្ងឺនេះ ដោយសារបរិភោគចំណីអាហារ ទឹកមិនស្អាត ស្រាបៀ ភេសជ្ជៈ បន្លែ និងផ្លែឈើដែលគ្មានអនាម័យ។ ជាពិសេស ជម្ងឺទឹកនោមផ្អែម និងជម្ងឺតំរងនោមដែលបានកើត ឡើងលើសរីរាង្គលើរាងកាយយើងមិនថាធំឬតូច សុទ្ធតែមានភាពចាំបាច់ជួយឱ្យរាងកាយដំណើរការមិនប្រក្រតី ហើយក្នុងនោះក៏មានតម្រងនោមដែរ។ ត្បិតតែកម្រងនោមជាសរីរាង្គតូចមួយ តែមានមុខងារសំខាន់ៗដូច ចង្គ្រោះជាតិពុល រក្សាលំនឹងជាតិទឹក ក៏ដូចជាផលិតអ័រម៉ូនមួយចំនួន ។
លោក ពិន ប្រាកដ អភិបាលរងខេត្តបានថ្លែងថា ជំងឺទឹកនោមផ្អែម និងជំងឺតំរងនោម គឺជាឃាតករលាក់ មុខ ដែលបាននិងកំពុងសម្លាប់មនុស្សបន្តិចម្តងៗ ដោយពុំដឹងខ្លួន។ លោកបានបន្តថា ដោយពិនិត្យឃើញថា ហានិភ័យដែលកើត មានឡើងគួរឱ្យមានការព្រួយបារម្មណ៍ អំពីសុខភាពរបស់មនុស្ស ហើយបញ្ហាទាំងនេះក៏បានគំរាមកំហែងសេដ្ឋកិច្ចជាតិនិងសេដ្ឋកិច្ចគ្រួសារផងដែរនោះទើបរដ្ឋបាលខេត្តសៀមរាប រៀបចំសិក្ខាសាលានេះឡើងដើម្បីចែករំលែក និងផ្លាស់ប្តូរចំណេះដឹងពីការថែរក្សាសុខភាពក្នុងការការពារមិនឱ្យកើតជំងឺទឹកនោមផ្អែម និងវិធីសាស្ត្រថែរក្សា និងការពារមិនឱ្យកើតជំងឺទឹកនោមផ្អែម និងជំងឺតំរងនោមដើម្បីឱ្យសិក្ខាកាមដែលអញ្ជើញមកពីស្ថាប័នពាក់ព័ន្ធ នៃរដ្ឋបាលខេត្ត រដ្ឋបាលសង្កាត់ក្នុងក្រុង ព្រមទាំងអង្គការ សមាគម ដៃគូអភិវឌ្ឍន៍នានាក្នុងខេត្តសៀមរាប បានឈ្វេង យល់ និងមានឱកាសបានជួបពិភាក្សា និងផ្តល់យោបល់លើការថែរក្សាសុខភាព ដើម្បីការពារមិនឱ្យកើតជំងឺទឹកនោមផ្អែម និងជំងឺតំរងនោមផងដែរ។
លោកអភិបាលរងខេត្តបានមានប្រសាសន៍បញ្ជាក់ថា ជំងឺទឹកនោមផែ្អម គឺជាជំងឺមួយដែលបង្កឡើងដោយភាពខុសបែ្លកនៃអ័រម៉ូន ដែលអាចបណ្តាលឱ្យមានបញ្ហាជាច្រើនដូចជា ក្រលៀន ជើង ប្រអប់ជើង ភែ្នក បេះដូង ប្រព័ន្ធសសៃប្រសាទ និងចរន្តឈាម។ បើសិនជាយើងទុកវាមិនព្យាបាលទេនោះបញ្ហាទាំងនេះអាចនឹងនាំ ខ្សោយក្រលៀន កើតដំបៅ ស្លាប់អវៈយវៈ ងងិតភែ្នក ឬក៏អាចនឹងនាំឱ្យមាន ការដាច់សរសៃឈាម ក្នុងខួរក្បាលទៀតផង ហើយ ជំងឺទឹកនោមផែ្អម កំពុងតែកើនឡើងជាលំដាប់ផងដែរ។ តាមរយៈសិក្ខាសាលាដ៏មានសារៈសំខាន់នេះ លោកអភិបាលរងខេត្តក៍បានមានប្រសាសន៍ផ្តាំផ្ញើរនិងក្រើនរំឭកដល់អង្គសិក្ខាកាមទាំងអស់ ត្រូវ យកចិត្តទុកដាក់លើសុខភាពផ្ទាល់ខ្លួន និងចូលរួមកាត់ បន្ថយហានិភ័យ ដែលបង្កឱ្យមានជំងឺទឹកនោមផ្អែម ដោយផ្អែកលើចំណុចសំខាន់ៗ និងងាយៗសម្រាប់ការអនុវត្តន៍ ក្នុងការរស់នៅប្រចាំថ្ងៃ ដែលយើងទាំងអស់គ្នាត្រូវប្រកាន់យកមានដូចជា៖ កុំពិសារប្រៃពេក ផ្អែមពេក កុំពិសារខ្លាញ់ពេក និងធ្វើលំហាត់ ប្រាណឱ្យបានជាប់ជាប្រចាំ ដែលនេះគឺជាមធ្យោ បាយដ៏ល្អ សម្រាប់ការចូលរួមការពារជំងឺទឹកនោម ផ្អែម ជំងឺលើសសម្ពាធឈាម និងជំងឺមិនឆ្លងផ្សេងៗទៀតជាដើម។ មួយវិញទៀតការត្រួតពិនិត្យជាតិស្ករក្នុងឈាម ជាជំនួយក្នុងការរុករកបានទាន់ពេលនូវហានិភ័យ នៃការកើតឡើងជំងឺទឹកនោមផ្អែម ដែលអាចឈានទៅរកការព្យាបាលបានទាន់ពេលផងដែរ។ ត្រូវឧស្សាហ៍តាមដានសម្ពាធឈាមរបស់ខ្លួន ដែលជាទូទៅត្រូវឱ្យនៅក្រោម ១៣០/៨០ ជៀស វាងការពិសារភេសជ្ជៈដែលមានជាតិផ្អែមដែលជាហានិភ័យ ឱ្យមានជំងឺទឹកនោមផ្អែម ប្រភេទ២ (Type 2 Diabetis) និងចូលរួមផ្សព្វផ្សាយឱ្យបានទូលំទូលាយនូវការយល់ដឹង និងចូលរួមអនុវត្ត ហើយ សូមចងចាំថា ជំងឺទឹកនោមផ្អែម ជាជំងឺដែលអាចការពារជាមុនបាន ប្រសិនបើបុគ្គលម្នាក់ៗ អាចត្រួតពិនិត្យបានដោយខ្លួនឯងនូវរបបអាហារ ដែលពិសាប្រចាំថ្ងៃ និងអនុវត្តបានខ្ជាប់ខ្ជួននូវចំណុចសាមញ្ញៗ ផងដែរ ៕
ដោយ ÷ ពន្លឺ
