កិច្ចប្រជុំផ្សព្វផ្សាយស្ដីពីការប្រើប្រាស់ឯកសារព័ត៌មានស្ថានភាព សេដ្ឋកិច្ច សង្គមកិច្ច ឯកសារព័ត៌មានពិន្ទុវិស័យ និងអត្រាភាពក្រីក្រឆ្នាំ២០២៤

ខេត្តសៀមរាប ÷ នៅព្រឹកថ្ងៃទី២៧ ខែកុម្ភៈ ឆ្នាំ២០២៤ នេះ មន្ទីរផែនការខេត្តសៀមរាប បានរៀបចំកិច្ចប្រជុំផ្សព្វផ្សាយស្ដីពីការប្រើប្រាស់ឯកសារព័ត៌មានស្ថានភាព សេដ្ឋកិច្ច សង្គមកិច្ច ឯកសារព័ត៌មានពិន្ទុវិស័យ និងអត្រាភាពក្រីក្រខេត្ត ក្រុងស្រុក ឆ្នាំ២០២៤ សម្រាប់ដំណើរការកសាងផែនការនៅថ្នាក់ក្រោមជាតិ ក្រោមអធិបតីភាពឯកឧត្តម កុយ សង សមាជិកក្រុមប្រឹក្សាខេត្ត និងលោក សុខ ថុល អភិបាលរងខេត្ត ដោយមានការចូលរួមពីប្រធាន-អនុប្រធានមន្ទីរអង្គភាព អាជ្ញាធរក្រុងស្រុក និងតំណាងអង្គការជាតិអន្តរជាតិជាច្រើនរូប។

លោក ហាក់ សុធារ៉ា ប្រធានមន្ទីរផែនការខេត្ត បានឲ្យដឹងថា ឯកសារព័ត៌មានស្ថានភាពសេដ្ឋកិច្ច សង្គមកិច្ច ពិន្ទុវិស័យ អត្រាភាពក្រីក្រខេត្ត ក្រុងស្រុក ជាឯកសារព័ត៌មានដែលមានសារៈសំខាន់បំផុតនៅក្នុងដំណើរការរៀចំកសាងផែនការនៅថ្នាក់ក្រោមជាតិ សម្រាប់ជាជំនួយក្នុងការដឹកនាំពិភាក្សា ដែលអាចកំណត់បាននូវបញ្ហា ទីតាំងបញ្ហា មូលហេតុនៃបញ្ហា តម្រូវការ និងដំណោះស្រាយ ហើយឯកសារពិន្ទុវិស័យ គឺងាយស្រួលក្នុងការសង្ខេបព័ត៌មានដោយវិធីងាយៗ និងអាចឃើញភ្លាមៗពីបណ្តាតំបន់ដែលបានអនុវត្តល្អ និងតំបន់ដែលត្រូវកែលម្អ, អាចប្រៀបធៀបរវាងឃុំសង្កាត់ ក្រុងស្រុក ឬខេត្ត ដែលត្រូវការជួយបន្ថែម និងការយក ចិត្តទុកដាក់, អាចកំណត់បានភ្លាមៗនូវចំណុចអាទិភាពក្នុងដំណើរការកសាងផែនការ, បង្ហាញពីវឌ្ឍនៈភាពតាមបណ្តាឆ្នាំ និងបង្ហាញពីលទ្ធផលនៃសកម្មភាព ដែលយើងកំពុងអនុវត្ត និងជួយក្នុងការត្រួតពិនិត្យ និងតាមដាន។

លោក សុខ ថុល អភិបាលរងខេត្ត មានប្រសាសន៍ថា រាជរដ្ឋាភិបាលអាណត្តិទី៧ នៃរដ្ឋសភា ដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញនៅគោលនយោបាល យុទ្ធសាស្រ្តបញ្ចកោណ ដែលផ្ដោតសំខាន់ទៅលើគន្លឹះចំនួន៤ គឺ៖ មនុស្ស ផ្លូវ ទឹក និងបច្ចេកវិទ្យា ហើយការទាក់ទងទៅលើប្រព័ន្ធបច្ចេកវិទ្យា នៅក្នុងនីតិកាលនេះដែល រាជរដ្ឋាភិបាលបានផ្ដល់ជូនបន្ថែមនៅអធិភាពគន្លឹះក្នុងបញ្ចកោណដំណាក់កាលទី៤ ក្នុងការកាត់បន្ថយភាពក្រីក្រប្រជាពលរដ្ឋឱ្យបានអត្រា១០% ឈានទៅដល់ការកាត់បន្ថយភាពក្រីក្រជាអប្បបរមា។

លោកអភិបាលរងខេត្ត មានប្រសាសន៍ទៀតថា កិច្ចប្រជុំនាពេលនេះដែរ គឺជាការជម្រុញឲ្យអ្នកពាក់ព័ន្ធបានយល់ដឹងបន្ថែមពីការប្រើប្រាស់ និងប្រមូលឯកសារនេះ ព្រោះវាជាឧបករណ៍សម្រាប់ការតស៊ូមតិ ការគៀងគរជំនួយ និងប្រើក្នុងដំណើរការវិភាជធនធាន។ ការវិភាគបញ្ហា គឺជាសកម្មភាពគន្លឹះមួយក្នុងដំណើរការនៃការរៀបចំផែនការ មានន័យថា ប្រសិនបើគ្មានទិន្នន័យច្បាស់លាស់ទេ ការវិភាគបញ្ហាគឺមិនបានត្រឹមត្រូវ និងគ្រប់ជ្រុងជ្រោយនោះទេ ហើយលទ្ធផលនៃការអនុវត្តគម្រោងដែលកើតចេញពីការវិភាគ ពិតជាមិនអាចឆ្លើយតបទៅនឹងតម្រូវការពិតប្រាកដរបស់ប្រជាពលរដ្ឋ ក៏ដូចជាមិនអាចចូលរួមចំណែកក្នុងការអភិវឌ្ឍមូលដ្ឋាន និងការកាត់បន្ថយភាពក្រីក្របានឡើយ។ ដូច្នេះទាមទារឲ្យយើងវិភាគបញ្ហាឱ្យបានគ្រប់ជ្រុងជ្រោយ ព័ត៌មាន និងទិន្ន័យគ្រប់គ្រាន់ច្បាស់លាស់ ដើម្បីប្រមូលឯកសារទាំងនេះ រៀបចំឡើងសម្រាប់បម្រើឲ្យការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលនៅថ្នាក់ក្រោមជាតិ សម្រាប់ធ្វើការអភិវឌ្ឍន៍ ក៏ដូចជាជួយដល់បណ្តាមន្ទីរ-អង្គភាពជំនាញ អង្គការជាតិ-អន្តរជាតិ និងអ្នកពាក់ព័ន្ធនានា សម្រាប់កំណត់តំបន់គោលដៅ ដើម្បីផ្តល់សេវាសាធារណៈផ្សេងៗ ដល់ប្រជាពលរដ្ឋនៅមូលដ្ឋានផងដែរ៕

ដោយ ÷ ពន្លឺ