រាជធានីភ្នំពេញ ÷ តាមមាត់ចាបមាត់ព្រាបនិយាយតាមហាងកាហ្វេ ដោយនិយាយចំអកឡកឡឺយ ថា៖«ពូកែពុករលួយទើបជាគយល្អ» និងថា«ការរកលុយពុករលួយ វាជាទម្លាប់ និងជាវប្បធ៌មរបស់លោកគយ»ទៅហើយ!។
ក្រុមកាសែតយើងដែលហោះហើរ រុលតត្រុក ដូចរុយក្បាលខៀវ ទោះបុគ្គលរលួយនោះទៅសម្ងំជុះលើចុងឈើក៏ទៅរោមដល់គូទដែរ ថ្មីៗនេះបុគ្គលដែលគេដឹងថាជាស្តេចអុកប្រចាំផ្សារអូឬស្សី លោកយី ថុល បច្ចុប្បន្នជាមេគយច្រកទ្វារអន្តរជាតិបាវុិត ធ្លាប់ល្បីមានរឿងអាស្រូវស្រីញីស្អុយង៉ោងម្តងរួចហើយកាលលោកនៅកាន់ជាមេច្រក៤០០(ស្រុកសំឡូត)តែច្បាប់ អត់ហ៊ានក្អក បានដូរប៉ុស្តិ៍ទៅកាន់ព្រែកចាក បន្តឡើង កូដខ្លាំងមកនៅច្រកបាវុិតទៀត ពេលនេះត្រូវរុយក្បាលខៀវឱ្យដឹងថា លោក យី ថុល ត្រូវសង្ស័យបានឃុបឃិតជាមួយក្រុមហ៊ុន Sambath Co.Ltd លបលាក់បើកដៃឱ្យឈ្មួញនាំជេីងមាន់ក្លាសេ្សចំនួន ០៤កុងតឺន័រឆ្លងព្រំដែនពីប្រទេសយួន ស្ងាត់ៗអត់ចាំបាច់មានឯកសារមួយសន្លឹកបានយ៉ាងរលូន។ ប៉ុន្តែគ្រាន់តែឆ្លងផុតព្រំដែនបន្តិចប៉ះចំថ្ងៃស៊យទំនិញលោតឆ័ត្រទាំងនេះដែលសង្ស័យលោក យី ថុល បើកដៃឱ្យចូលត្រូវសមត្ថ កិច្ចចម្រុះរបស់ខេត្តស្វាយរៀងចាប់បានទាំងអស់ ហេតុវាមិនរលូនដូចសព្វមួយដង ខណៈការត្រួត ពិនិត្យរកឃើញថា ជាទំនិញមានភាពមិនប្រក្រតីគឺ អត់ឯកសារអ្វីទាំងអស់។
មន្ត្រីដែលបានចូលរួមក្នុងការបង្ក្រាប ឱ្យដឹងថា៖មិនដែលក្រុមហ៊ុនឯកជនឯណា ថ្លើមដុះមមីសហ៊ាននាំទំនិញដល់ទៅ៤កុងទឺន័រ ដោយអត់បំពេញឯកសារប្រតិវេទន៍គយអត់លិខិតបង់ពន្ធ និងអត់លិខិតអនុញ្ញា តឱ្យនាំចូលពីមាត់ច្រក បែបនោះទេ នាំចូលមកក្នុងបានលុះត្រាតែមេគយបើកដៃ ឬមេគយឃុបឃិត ឱ្យលោតឆ័ត្រតែម្តងដើម្បីកុំឱ្យបែកលុយទើបអាចទៅរួច។ ដោយខណៈពេលនេះសមត្ថកិច្ចចម្រះកំពុងស្នេីសុំបង្កេីតគណកម្មការចម្រុះដេីម្បីដុតបំផ្លាញ ចោល។
តើលោក យី ថុល កំពុងត្រូវមហាជនដែលដឹងរឿងនេះ ចាត់ទុកថាលោក(ជាគយតួឯក)ឈានមុខគេ សូម្បីមានការណែនាំពីសម្ដេចបហាបវរធិបតី ហ៊ុន ម៉ាណែត នាយករដ្ឋមន្ត្រី ហេីយក៏លោកថ្លេីមធំដុះរោមហ៊ានឱ្យទំនិញខូចគុណភាពទាំងនោះចូលទាំងបំពានបានដែរ?។ អ្នកខ្លះលើកឡើងថា លោក យី ថុល ចង់ដើរតួឯកដើម្បីស្ទង់កម្លាំងរបស់សម្តេចធិបតី ហ៊ុន ម៉ាណែត ពង្រឹងវប្បធ៌មពុករលួយស្មោកគ្រោក ធ្វើគំរូដល់មន្ត្រីគយក្នុងអាណត្តិទី៧នេះឬយ៉ាងណា?។
ទាក់ទងនឹងការចោទប្រកាន់ខាងលើអង្គភាពយើងមិនអាចសុំការបំភ្លឺពីលោក យី ថុល បានទេនារសៀលថ្ងៃទី៧ ខែកុម្ភៈឆ្នាំ២០២៤។ ទោះយ៉ាងណាអង្គភាពយើងខ្ញុំនឹងរង់ចាំការបំភ្លឺរៀងរាល់ម៉ោងធ្វើការ។
ដោយ ÷ ចំរុង
