ខេត្តសៀមរាប ÷ ក្នុងពេលថ្មីៗនេះក្រុមការងារលេខាធិការដ្ឋានសុវត្ថិភាពចរាចរណ៍ផ្លូវគោកខេត្តសៀមរាប ដែលដឹកនាំដោយលោក ជួត ច័ន្ទតារា អនុប្រធានមន្ទីរសាធារណការ និងដឹកជញ្ជូនខេត្ត សហការជាមួយកម្លាំងការិយាល័យនគរបាលចរាចរណ៍ជើងគោកខេត្ត បានចុះធ្វើការផ្សព្វផ្សាយច្បាប់ស្តីពីចរាចរណ៍ផ្លូវគោក ដេីម្បីជាការពញ្ញាក់ស្មារតីដល់អ្នកប្រេីប្រាស់ផ្លូវឲ្យមានការប្រុងប្រយ័ត្នបានខ្ពស់ក្នុងគោល បំណងរួមចំណែកក្នុងការកាត់ បន្ថយគ្រោះថ្នាក់ចរាចរណ៍ឲ្យ ស្ថិតមកនៅកម្រិត ទាប ក្នុងឱកាសពេលបុណ្យឆ្លងឆ្នាំសកល ២០២៣.២០២៤ ដែលនឹងឈានចូលមកដល់ក្នុងពេលខាងមុខនេះ។
ក្នុងសកម្មភាពនៃការផ្សព្វផ្សាយនោះ ក្រុមការងារលេខាធិការដ្ឋានសុវត្ថិភាពចរាចរណ៍ផ្លូវគោកខេត្ត និង មន្ត្រីនគរបាលចរាចរណ៍ បានធ្វើការដាក់នូវជាសំណួរ ចម្លើយ ជូនដល់បងប្អូនអ្នកបញ្ជាយាន្តជំនិះគ្រប់ប្រភេទ ដើមី្បធ្វើការស្វែងយល់អំពី ច្បាប់ ស្លាក គំនូសចរាចរណ៍ ដែលមាននៅតាមបណ្តាផ្លូវកំពុងធ្វើចរាចរណ៍ ។ ក្នុងនោះដែរមន្ត្រីជំនាញចរាចរណ៍ និង នគរបាលចរាចរណ៍ ក៏បានធ្វើការពន្យល់ និងធ្វើការអប់រំណែនាំ ចំពោះបងប្អូនដែលមិនបានប្រើប្រាស់មួកសុវត្ថិភាពក្នុងពេលបើកបរម៉ូតូគ្រប់ប្រភេទ និង មិនបានពាក់ខ្សែក្រវ៉ាត់សុវត្ថិភាព ក្នុងពេលបើកបញ្ជារថយន្ត និងមានសារធាតុស្រវឹងនៅក្នុងពេលបើកបរ ដែលបង្កនូវហានិ ភ័យដល់អ្នកដទៃ ដែលបានធ្វើចរាចរណ៍នៅតាមដងផ្លូវសាធារណៈ ព្រម ទាំងប៉ះពាល់ខូច ខាតដល់ទ្រព្យសម្បត្តិសាធារណៈ និងទ្រព្យសម្បត្តិផ្ទាល់ខ្លួននិងអ្នកដទៃ ឬក៏បាត់ បង់ជីវិត និងពិការអស់មួយជីវិតផងដែរ ។
ក្នុងក្រុមការងារលេខាធិការដ្ឋានសុវត្ថិភាពចរាចរណ៍ផ្លូវគោក បានធ្វើការចែកចាយនូវ -សៀវភៅច្បាប់ចរាចរណ៍ ៣៦០ ក្បាល , សៀវភៅអ្នកបើកបរម៉ូតូ ៤៦០ក្បាល , ខិតបណ្ណជំនួយស្មារតី ៥០០សន្លឹក , ស្ទីឃ័រចំណាំងផ្លាត ៥០សន្លឹក (ថ្ងៃនេះ ថ្ងៃស្អែកកុំឲ្យមានគ្រោះថ្នាក់ចរាចរណ៍ )បាន ១០ផ្ទាំង ។ ក្នុងនោះដែរក្រុមការងារបានធ្វើការបិទនូវចំណាំងផ្លាត ទៅលើរ៉ឹម៉ក់ ម៉ូតូ រ៉ឺម៉ក់គោយន្ត , passApp និងរថយន្តមួយចំនួនទៀតផងដែរ៕
ដោយ ÷ ពន្លឺ
