ខេត្តកែប៖ នារសៀលថ្ងៃទី២០ ខែតុលា ឆ្នាំ២០២៣ នេះ រដ្ឋបាលខេត្តកែបបានទទួលស្វាគមន៍វត្តមានរបស់ប្រតិភូអ្នកសារព័ត៌មានមកពីក្លឹបអ្នកកាសែតកម្ពុជា និងសមាគមន៍សារព័ត៌មានមកពីប្រទេសថៃ ក្នុងដំណើរទស្សនកិច្ចមកកាន់ខេត្តកែបរយៈពេល២ថ្ងៃ ចាប់ពីថ្ងៃទី ២០ ខែតុលា រហូតដល់ថ្ងៃទី២១ ខែតុលា ឆ្នាំ២០២៣។
ដំណើរទស្សនកិច្ចនេះ ដឹកនាំដោយលោក ពុយ គា ប្រធានក្លឹបអ្នកកាសែតកម្ពុជា និងលោក Mongkol Bangprapa ប្រធានសមាគមន៍សារព័ត៌មានថៃ និងអ្នកសារព័ត៌មានទាំងពីរប្រទេស ដោយមានវត្តមានស្វាគមន៍ពីសំណាក់លោក ប៊ុន យោង អភិបាលរងខេត្តទទួលបន្ទុក តំណាងដ៏ខ្ពង់ខ្ពស់ឯកឧត្តមបណ្ឌិត សោម ពិសិដ្ឋ អភិបាលខេត្តកែប នៅសាលាខេត្តកែប អមដោយមន្ទីរអង្គភាព និងអាជ្ញាធរក្រុង ស្រុកផង ដែរ។
ក្នុងដំណើរស្វាគមន៍នាពេលនោះ លោក ប៊ុន យោង អភិបាលរងខេត្តកែប ទទួលបន្ទុកសារព័ត៌មាន បានសម្តែងការត្រេកអរ និងទទួលការស្វាគមន៍យ៉ាងកក់ក្តៅ។
ក្នុងជំនួបនោះ លោក ប៊ុន យោង មានប្រសាសន៍ថា ខេត្តកែបជាគោលដៅទេសចរណ៍ដ៏សំខាន់មួយរបស់ប្រទេសកម្ពុជា ហើយរាជរដ្ឋាភិបាលបានកំណត់ចក្ខុវិស័យប្រែក្លាយខេត្តកែបជាគោលដៅទេសចរណ៍ ធម្មជាតិសម្រាកកម្សាន្តបែបប្រណិតកម្រិតខ្ពស់ផងដែរ។
លោកបន្តថា ខេត្តកែប មានខ្យល់សមុទ្រដ៏បរិសុទ្ធ ហើយមានផលវិជ្ជមានសម្រាប់សុខភាព ហើយកន្លងទៅខ្យល់សមុទ្រខេត្តកែប អាចព្យាបាលជំងឺហឺត និងជំងឺស្រ្តេសបាន ដែលនេះជាការអះអាងរបស់ដុកទ័រមកពីប្រទេសបារាំង។
លោក ពុយគា ប្រធានក្លឹបអ្នកកាសែតកម្ពុជា បានសម្តែងការភ្ជាក់ផ្អើលចំពោះការលើកឡើងរបស់អភិបាលរងខេត្តកែប ក្នុងនោះលោកស្នើឲ្យបណ្តាញ សារព័ត៌មាន ផ្សព្វផ្សាយពីចំណុចពិសេសរបស់ខេត្តកែបនេះ ជូនដល់សាធារណៈជនឱ្យបានកាន់តែទូលំទូលាយ។
ក្នុងដំណើរទស្សនកិច្ចរយៈពេល២ថ្ងៃនេះ រដ្ឋបាលខេត្តកែប បានរៀបចំដំណើរទៅស្វែងយល់ពីសក្តានុពលរបស់ខេត្តកែប នៅទីតាំងមួយចំនួនមាន ឧទ្យានជាតិកែប(កន្លែងសត្វកេងកង, ប៉មមើលទេសភាព) ចម្ការម្រេច, ចម្ការត្របែក, ទីលានប្រណាំងសេះខេត្តកែប និងទៅតំបន់មួយទៀតដែលកំពុងប្រែមុខប្រែមាត់ខ្លាំង គឺឆ្នេរអង្កោល៕
ដោយ ÷ យាន ដារី
