ខេត្តសៀមរាប ÷នៅព្រឹកថ្ងៃទី១៦ ខែតុលាឆ្នាំ២០២៣ នេះអាកាសយានដ្ឋានអន្ដរជាតិសៀមរាប អង្គរ បានបើកដំណើរការហោះហើរចុះចតដោយមានអ្នកដំណើរប្រមាណជាង ៣០០នាក់មកកាន់ ខេត្ត សៀមរាប។ ក្នុងកិច្ចដំណើរការបើកនេះក្រោមអធិបតីភាពឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាតំណាងដ៏ខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។
ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានថ្លែងថា អតីតតំបន់ព្រលានយន្ដហោះអន្ដរជាតិ សៀមរាបអង្គរ ជាកន្លែងសង្គ្រាមដ៏ក្ដៅគគុកនៅមុនឆ្នាំទស្សវត្សរ៍៩០ ប៉ុន្ដែបច្ចុប្បន្ននេះជាភ័ព្វសំណាងរបស់កម្ពុជា បានឱ្យធ្វើទីតាំងនោះជាអាកាសយានដ្ឋានអន្ដរជាតិដ៏សំខាន់បំផុតសម្រាប់កម្ពុជា។
ឯកឧត្ដមបន្ដថា ការបើកឱ្យដំណើរអាការអាកាស យានដ្ឋានអន្តរជាតិសៀមរាបអង្គរ ក្នុងថ្ងៃដំបូងនេះ ជាការបើកទំព័រប្រវត្ដិសាស្ដ្ររបស់កម្ពុជា និងជាការលើកស្ទួយវិស័យទេសចរក្រោយវិបត្ដិកូវីដ១៩ ដោយមានអ្នកទេសចរជាច្រើននាក់ មកពីទីក្រុងបាងកកប្រទេស ថៃ និងចិនជាដើម ទៅកំសាន្ដក្នុងខេត្ដសៀមរាប។ ឯកឧត្ដមបានថ្លែងបន្តថា អាកាសយានដ្ឋានអន្តរជាតិសៀមរាបអង្គរនេះ ជាសមិទ្ធផលដ៏ធំធេងបានផ្តើមចេញសុទ្ធសាធពីគោលនយោបាយ នៃចំណងមិត្តភាពដែកថែបកម្ពុជា-ចិន ខណៈទុនវិនិយោគចំណាយរហូតដល់១១០០លានដុល្លារ។
ឯកឧត្តមឧបនាយករដ្ឋមន្ត្រីបានថ្លែងអំណរគុណចំពោះរដ្ឋាភិបាលចិន ជាពិសេសការវិនិយោគលើអាកាសយានដ្ឋានអន្តរជាតិ សៀមរាបអង្គរថ្មីនេះ ដែលជាមរតមនុស្សជាតិ ដែលជំរុញឲ្យសេដ្ឋកិច្ច ពាណិជ្ជកម្ម វប្បធម៌ និងសង្គមសម្រាប់ប្រជាជាតិកម្ពុជា និងសមិទ្ធផលជាប្រវត្តិសាស្ត្រ ដែលបង្ហាញពីឆន្ទៈក្នុងកិច្ចសហប្រតិបត្តិការដែកថែបរវាងប្រទេសទាំងពីរ។ ឯកឧត្តមបានលើកឡើងទៀតថា «ក្នុងថ្ងៃជាប្រវត្តិសាស្ត្រនេះ ក្នុងនាមសម្តេចធិបតីនាយករដ្ឋមន្រ្តី ខ្ញុំសូមជូនពរឱ្យមិត្តភាព នៃប្រទេសយើងទាំងពីរ (កម្ពុជា-ចិន) កាន់តែរឹងមាំខ្លាំងក្លា និងស្ថិតស្ថេរជាដរាប»។
សូមបញ្ជាក់ផងដែរថា អាកាសយានដ្ឋានអន្តរជាតិសៀមរាបអង្គរ មានចម្ងាយពីប្រាសាទអង្គរវត្ត៤០ គីទ្បូម៉ែត្រ និង៥១គីទ្បូម៉ែត្រ ពីក្រុងសៀមរាប ដែលមានទីតាំងស្ថិតនៅក្នុងឃុំតាយ៉ែក ស្រុកសូទ្រនិគម ខេត្តសៀមរាប វិនិយោគដោយវិនិយោគគិនចិន ក្នុងផ្ទៃដី៧០០ហិកតា ចំណាយទឹកប្រាក់វិនិយោគប្រមាណជាង១ពាន់លានដុល្លារដែលជាការវិនិយោគ BOTក្នុងរយៈពេល៥៥ឆ្នាំ។ អាកាសយានដ្ឋាននេះ មានចំណតសម្រាប់យន្តហោះចតចំនួន៣៨ ចំណត មានសមត្ថភាពទទួលអ្នកដំណើរ តាមផ្លូវអាកាសបាន ៧លាននាក់ ក្នុងឆ្នាំ២០២៤ និង១២លាននាក់ក្នុងឆ្នាំ២០៤០ខាងមុខ ។
តាមការគ្រោងទុក នឹងបើកសម្ពោធជាផ្លូវការ នៅថ្ងៃទី១៦ ខែវិច្ឆិកា ឆ្នាំ២០២៣ ខាងមុខនេះ ក្រោមអធិបតីភាព សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាជាមួយនឹងថ្នាក់ដឹកនាំចិនផងដែរ៕
ដោយ ÷ ពន្លឺ
