ខេត្តសៀមរាប ÷ នៅព្រឹកថ្ងៃទី១១ ខែ តុលា ឆ្នាំ២០២៣ នេះគណៈកម្មាធិការប្រយុទ្ធនឹងជំងឺអេដស៍ខេត្តសៀមរាបសហការជាមួយអាជ្ញាធរជាតិប្រយុទ្ធជំងឺអេដសបានបើកកិច្ចប្រជុំសម្របសម្រួលជាមួយម្ចាស់សេវា.មេការសេវាកំសាន្តនិងអង្គភាពពាក់ព័ន្ធក្រោមប្រធានបទ “ កិច្ចសហការ និងការចូលរួមឆ្លើយតបមេរោគអេដស៍ ជំងឺអេដស៍ខេត្តសៀមរាប ” ដែលដឹកនាំកិច្ចប្រជុំដោយលោក មួង ណារិន អនុប្រធានមន្ទីរសុខាភិបាលខេត្តសៀមរាប និងក្រោមវត្តមានការចូលរួមបើកអង្គប្រជុំតាមរយៈវីដេអូហ្សូម ពីសំណាក់ លោក ពិន ប្រាកដ អភិបាលរងខេត្ត និងជាប្រធានគណៈកម្មាធិការប្រយុទ្ធនឹងជំងឺអេដស៍ខេត្តសៀមរាប ។
លោក មួង ណារិន អនុប្រធានមន្ទីរសុខាភិបាលខេត្តបានមានប្រសាសន៍ថា ការបើកកិច្ច នាពេលនេះគឺមានគោលបំណង បង្កើនទំនាក់ទំនង និងកិច្ចសហការល្អម្ចាស់សេវា មេការសេវាកំសាន្តក្នុងការឆ្លើយតបមេរោគអេដស៍ ជំងឺអេដស៍លើក្រុមគោលដៅប្រឈមមុខខ្ពស់. ផ្តល់ការលើកទឹកចិត្ត និងគាំទ្រ ដល់ម្ចាស់សេវា មេការសេវាកំសាន្តក្នុងការចូលរួមការឆ្លើយតបមេរោគអេដស៍ជំងឺអេដស៍. ផ្តល់នូវការយល់ដឹងអំពីចំណេះដឹងនិងមេរោគអេដស៍ និងកាមរោគ ដល់ម្ចាស់សេវា មេការសេវាកំសាន្តដើម្បីអប់រំផ្សព្វផ្សាយបន្ត .សម្របសម្រួលដោះស្រាយឧបសគ្គបញ្ហាផ្សេងៗអំពីសកម្មភាពការឆ្លើយតបមេរោគអេដស៍ជំងឺអេដ លើកក្រុមគោលដៅប្រឈមមុខខ្ពស់ផងដែរ។
មានប្រសាន៍បើកកិច្ចប្រជុំតាមរយៈវីដេអូហ្សូម លោក ពិន ប្រាកដ អភិបាលរងខេត្ត និងជាប្រធានគណៈកម្មា ធិការប្រយុទ្ធនឹងជំងឺអេដស៍ខេត្តសៀមរាបបានថ្លែងថា ខេត្តសៀមរាប គឺជាគោលដៅដ៍ចម្បងបំផុតដែលចាំបាច់ត្រូវស្តារសកម្មភាពទេសចរណ៍ឡើងវិញទាំងការជំរុញចលនាទេសចរណ៍ផ្ទៃក្នុងនិងការទាក់ទាញភ្ញៀវទេសចរណ៍ជាតិ អន្តរជាតិពីទីផ្សារសំខាន់ៗ ។
លោកបានបន្តទៀតថា កិច្ចប្រជុំនាពេលនេះ នឹងផ្ដល់នូវការយល់ដឹងអំពីចំណេះដឹងមេរោគអេដស៍ និងកាមរោគ ដល់ម្ចាស់សេវា និងមេការសេវាកំសាន្ដ ដើម្បីអប់រំ ផ្សព្វផ្សាយបន្ដដល់អ្នកពាក់ព័ន្ធ ។ ជាមួយគ្នានោះដែរ លោក ពិន ប្រាកដ ក៏បានអំពាវនាវ ដល់មន្ទីរសុខាភិបាលខេត្ត អង្គការដៃគូទាំងអស់ជាពិសេស ម្ចាស់ និងមេការសេវាកំសាន្ដក្នុងខេត្តសៀមរាប ត្រូវសហការជាមួយអាជ្ញាធរគ្រប់លំដាប់ថ្នាក់ ក្នុងការចូលរួមដោះស្រាយឧបសគ្គ បញ្ហាផ្សេងៗ អំពីសកម្មភាព ការឆ្លើយតបមេរោគអេដស៍ ជំងឺអេដស៍លើក្រុមគោល ដៅប្រឈមមុខខ្ពស់ផងដែរ ។
នៅក្នុងកិច្ចនោះក៏មាន បទបង្ហាញ អំពីស្ថានភាពរាល ដាលមេរោគអេដស៍ក្នុងពិភពលោក ក្នុងប្រទេស កម្ពុជា និងក្នុងខេត្តសៀមរាប ព្រមទាងមានការធ្វើវេទិកាពិភាក្សាអំពីកិច្ចសហការ និងចូលរួមពីម្ចាស់សេវា មេការសេវាកំសាន្តនិងផ្នែកពាក់ព័ន្ធក្នុងការចូលរួមឆ្លើយតបជំងឺអេដស៍ និងផ្តលឱកាសឱ្យក្រុមគោល ដៅចូលរួមទទួលអប់រំ .តេសឈាម និងទទួលសេវា ថែទាំជំងឺអេដស៍កាមរោគផងដែរ ។
យោងតាមរបាយការណ៍នៅក្នុងបទបង្ហាញរបស់លេខាធិការដ្ឋានគណៈកម្មាធិការប្រយុទ្ធនឹងជំងឺអេដស៍ខេត្តសៀមរាបបានឱ្យដឹងថា ស្ថិតិអ្នកផ្ទុកមេរោគអេដស៍នៅលើពិភពលោកក្នុងឆ្នាំ២០២២គឺមានចំនួន៣៤លាននាក់ ខណៈមាន១.៣លាននាក់បានឆ្លងមេរោគអេដស៍ថ្មីក្នុងឆ្នាំ២០២២.ស្លាប់មានចំនួន៦៣០.០០០នាក់ និង ចំនួន២៩.៨លាននាក់បានទទួលការព្យាបាលដោយឱសថប្រឆាំងមេរោគអេដស៍ឆ្នាំ២០២២ . មានចំនួន៨៥.៦លាន នាក់គឺជាចំនួនមនុស្សដែលបានឆ្លងមេរោគអេដស៍ចាប់តាំងពីមានការផ្ទុះឆ្លងរាលដាលមេរោគអេដស៍ចាប់តាំងពីដំបូងព្រមទាំងមាន ៤០.៤លាននាក់ គឺចំនួនមនុស្សដែលបានស្លាប់ដោយសារមេរោគអេដស៍ចាប់តាំងពីមានការផ្ទុះឆ្លងរាលដាលមេរោគអេដស៍ចាប់តាំងពីដំបូងមក។
ចំណែកនៅក្នុងប្រទេសកម្ពុជាស្ថិតិក្នុងឆ្នាំ២០២២ ចំនួនអ្នកផ្ទុកមេរោគអេដស៍មានចំនួន ៧៦.០០០នាក់ ដោយក្នុងនោះមនុស្សពេញវ័យ ចំនួន៧៤.០០០នាក់ ស្រ្តីចំនួន៣៦.០០០នាក់ និង កុមារចំនួន២.០០០នាក់ ។ ការឆ្លងថ្មីមេរោគអេដស៍ចំនួន១.៤០០នាក់ (មនុស្សពេញវ័យ១.៣០០នាក់ និងកុមារ១០០នាក់) ចំពោះប្រទេសកម្ពុជាការឆ្លងមេរោគអេដស៍ថ្មីគឺមានការឆ្លងចំនួន៤នាក់ជារៀងរាល់ថ្ងៃផងដែរ ៕
ដោយ ÷ ពន្លឺ
