ខេត្តសៀមរាប ÷ គណៈកម្មាធិការជាតិជម្រុញចលនាភូមិមួយផលិតផលមួយនៃទីស្តីការគណៈរដ្ឋមន្ត្រី សហការជាមួយរដ្ឋបាលខេត្តសៀមរាប បានរៀបចំតាំងពិព័រណ៍ «ភូមិមួយផលិតមួយ»រយៈពេល៥ថ្ងៃចាប់ពីថ្ងៃទី២៦ដល់ថ្ងៃទី៣០ខែកញ្ញាឆ្នាំ២០២៣ នាបរិវេណសួនច្បារក្បែរមាត់ស្ទឹងសៀមរាប ដោយមានការដាក់លក់និងទិញផលិតផលក្នុងស្រុករបស់បងប្អូនអាជីវករ សិប្បករ ក្នុងខេត្ត មានចម្លាក់ គ្រឿងឧបភោគបរិភោគ បន្លែបង្ការ និងភេសជ្ជៈជាដើម ។
ក្នុងនោះដែរពិធីកាត់ខ្សែបូរបើកការតាំងពិព័រណ៍ភូមិមួយផលិតផលមួយប្រព្រឹត្តិឡើងនៅរសៀលថ្ងៃទី២៦ខែកញ្ញាឆ្នាំ២០២៣ ក្រោមវត្តមានឯកឧត្តម ផល សុជាតិ អគ្គលេខាធិការ នៃគណៈកម្មាធិការជាតិជម្រុញចលនាភូមិមួយផលិតផលមួយ និងលោក យុន លីនណេ អភិបាលរង នៃគណៈអភិបាលខេត្តសៀមរាប ដោយមានការចូលរួមពីថ្នាក់ដឹកនាំមន្ទីរ អង្គភាព និងបងប្អូនអាជីវករលក់ផលិតផលខ្មែរជាច្រើនរូបផងដែរ។
ការរៀបចំពិព័រណ៍ផលិតផលក្នុងស្រុក ភូមិមួយផលិតផលមួយ ខេត្តសៀមរាបនេះធ្វើឡើង ក្នុងគោលបំណង ដើម្បីរកទីផ្សារផលិតផលក្នុងស្រុក ព្រមទាំងការចងក្រងផលិតករ សេវាករ និងសិប្បករ នៅតាមមូលដ្ឋានឱ្យចូលជាសមាជិកចលនាភូមិមួយផលិតផលមួយ និងអង្គភាព-ស្ថាប័នពាក់ព័ន្ធ ដែលជាសមាជិកគណៈកម្មាធិការជាតិជំរុញចលនាភូមិមួយផលិតផលមួយ។ ម៉្យាងវិញទៀត គោលការណ៍ណែ នាំនេះក៏មានបំណងជំរុញឱ្យអ្នកពាក់ព័ន្ធធ្វើការណែនាំ និងពន្យល់ដល់ប្រជាពលរដ្ឋ និងអ្នកផលិតតាមមូលដ្ឋានឱ្យបានយល់ច្បាស់បន្ថែមទៀតអំពីសារៈសំខាន់ និងផលប្រយោជន៍ក្នុងការចូលរួមចលនាភូមិ១ផលិត ផល១ និងធ្វើយ៉ាងណាជំរុញពួកគាត់ចូលជាសមាជិកចលនានេះបានទូលំ-ទូលាយ។
លោក យុន លីនណេ អភិបាលរងខេត្តបានលើកឡើងថា៖ ការរៀបចំពិព័រណ៍ផលិតផលក្នុងស្រុក ភូមិ១ផលិតផល១ របស់គណៈកម្មាធិការជាតិជំរុញចលនាភូមិមួយ ផលិតផលមួយ ក្នុងគោលបំណងបំផុសស្មារតីអ្នកផលិតនិងអ្នកប្រើប្រាស់ឱ្យបង្កើនការគាំទ្រ និងចូលរួមផ្សព្វផ្សាយ ជំរុញការអនុវត្តចលនាភូមិ១ផលិតផល១ ដើម្បីរួមចំណែកអនុវត្តគោលនយោបាយរបស់រាជរដ្ឋាភិបាលឱ្យទទួលបាន ជោគ ជ័យ ហើយដើម្បីសម្រេចផែនការសកម្មភាពនេះ រដ្ឋបាលខេត្ត និងគណៈកម្មាធិការជំរុញចលនាភូមិ១ ផលិតផល១ ថ្នាក់ខេត្ត នឹងខិតខំប្រឹងប្រែងសហការជាមួយរដ្ឋបាលក្រុង-ស្រុក និងមន្ទីរ-អង្គភាពពាក់ព័ន្ធ ភាគីវិស័យឯកជនរួមទាំងសមាសភាពពាក់ព័ន្ឋជាច្រើនទៀត ដើម្បីអនុវត្តការងារឱ្យទទួលបានលទ្ធផលល្អប្រសើរ ក្នុងន័យចូលរួមផ្សព្វផ្សាយ ជំរុញ និងចងក្រងផលិតករ សេវាករ និងសិប្បករ នៅតាមមូលដ្ឋាន ឱ្យចូលជាសមាជិកចលនាភូមិ១ផលិតផល១ ព្រមទាំងអភិវឌ្ឍន៍ធនធានមនុស្សទាក់ទងនឹងការជំរុញចលនាភូមិ១ផលិតផល១ នៅថ្នាក់ខេត្ត ដើម្បីទទួលបានចំណេះដឹង បទពិសោធន៍ និងចូលរួមចំណែកកាត់បន្ថយភាពក្រីក្រ កាត់បន្ថយចំណាកស្រុក លើកកម្ពស់ជីវភាពរស់នៅ និងគុណភាពជីវិតរបស់ប្រជាជនតាម សហគមន៍ ។
ឯកឧត្តម ផល សុជាតិ អគ្គលេខាធិការ នៃគណៈកម្មា ធិការជាតិជម្រុញចលនាភូមិមួយផលិតផលមួយ នៃទីស្តីការគណៈរដ្ឋមន្ត្រី បានគូសបញ្ជាក់ឲ្យដឹងថា៖ គណៈកម្មាធិការជាតិជំរុញចលនាភូមិមួយ ផលិតផលមួយ បានបង្កើតអស់រយៈពេល១៦ឆ្នាំហើយ ដោយ សម្តេចតេជោ ហ៊ុន សែន អតីតនាយករដ្ឋមន្ត្រី បាន យកចិត្តទុកដាក់ខ្លាំងណាស់លើចលនាភូមិមួយ ផលិតផលមួយ ព្រោះវាអាចជួយធ្វើឲ្យសេដ្ឋកិច្ចមូលដ្ឋានល្អ ។
ឯកឧត្តម បានបញ្ជាក់ថា ភូមិមួយផលិតផលមួយ ទាមទារឲ្យមានការចូលរួមយ៉ាងសកម្មពីក្រសួង អង្គភាព មន្ទីរស្ថាប័នពាក់ព័ន្ឋ សំដៅធ្វើយ៉ាងណាជម្រុញឲ្យមានការអភិវឌ្ឍផលិតផលថ្មីៗ ក៏ដូចជា ពង្រឹងគុណភាព និង សមត្ថភាពពាណិជ្ជកម្មនៃផលិតផល ដែលមានស្រាប់ នេះជាគោលការណ៍គ្រឹះ និងជាគោលដៅដែលយើងចង់បាន សំដៅធ្វើឲ្យទទួលបាននូវផលិតផលមានភាពសម្បូរបែប គុណភាពល្អ ស្របតាមយុទ្ឋសាស្ត្របញ្ចកោណ របស់រាជរដ្ឋាភិបាល នីតិកាលទី៧នេះផងដែរ ៕
ដោយ ÷ ពន្លឺ
