ខេត្តសៀមរាប ÷ នៅព្រឹកថ្ងៃទី២១ ខែកញ្ញា ឆ្នាំ២០២៣ នេះ នៅសាលប្រជុំសាលាខេត្តសៀមរាប លោក ហែន ពុទ្ធី នាយករងរដ្ឋ បាលសាលាខេត្តសៀមរាប បានដឹកនាំកិច្ចប្រជុំពិនិត្យ និងពិភាក្សារបស់ក្រុមការងារបច្ចេកទេសគណៈកម្មការរដ្ឋបាល ដើមី្បបែងចែកក្រុមការងារគោលដៅ និងកំណត់ឃុំដែលជាអទិភាព ក្នុងការប្រកាសតំបន់ធ្វើការវិនិច្ឆ័យ នៃការចុះបញ្ជីដីធ្លី មានលក្ខណៈជាប្រព័ន្ធ នៅក្នុងភូមិសាស្ត្រខេត្តសៀមរាប ដោយមានការចូលរួមពីអស់លោក លោកស្រីប្រធានមន្ទីរជំនាញ និង តំណាងមន្ទីរ អង្គភាពពាក់ព័ន្ធ អាជ្ញាធរក្រុង ស្រុក និង មន្ត្រីការិយាល័យភូមិបាលក្រុង ស្រុក ។
មានប្រសាសន៍ក្នុងកិច្ចប្រជុំ លោក ហែន ពុទ្ធី បានលើកពីគោលដៅសំខាន់ៗ ដែលក្រុមការងារបច្ចេក ទេសគណៈកម្មការរដ្ឋបាល ដែលអនុវត្តនៅសេស សល់ ក្នុងការប្រកាសតំបន់ធ្វើការវិនិច្ឆ័យ នៃការចុះបញ្ជីដីធ្លី មានលក្ខណៈជាប្រព័ន្ធ នៅក្នុងភូមិសាស្ត្រខេត្ត ។ កិច្ចប្រជុំនេះដែរក៏បានជម្រុញដល់អាជ្ញាធរក្រុង ស្រុកទាំង១២ លើការចុះបញ្ជីជាលក្ខណៈប្រព័ន្ធ ដើមី្បឲ្យការចុះបញ្ជីជាលក្ខណៈប្រព័ន្ធទៅបាននោះ ក្រុង ស្រុកទាំងអស់ ត្រូវធ្វើបច្ចុប្បន្នភាព និង រៀបចំក្រុមការងារថ្នាក់ ក្រុង ស្រុកឲ្យមានគ្រប់សមាសភាពពាក់ព័ន្ធ ។
លោកក៏លើកឡើងផងដែរថា កន្លងមកស្រុកមួយចំនួន ក៏បានអនុវត្តការចុះបញ្ជីជាលក្ខណៈប្រព័ន្ធ និង ការធ្វើកម្មសិទ្ធិដីធ្លីដាច់ដោយដុំផងដែរ។ នៅចំពោះមុខនេះរដ្ឋបាលខេត្ត មន្ទីរជំនាញ ក៏បាន រៀបចំក្រុមការងារបច្ចេកទេសគណៈកម្មការរដ្ឋបាលនៅតាមស្រុក ដោយមានប្រធានការិយាល័យភូមិបាលជាប្រធាន និង មន្ត្រីស្រុក ហើយក៏ទាមទានូវកម្រិតយល់ដឹងអំពីបច្ចេកទេសក្នុងការចុះបញ្ជីដីធ្លី និង កិច្ចដំណើរការផ្សព្វផ្សាយនៅពេលវាស់ វែង ជាការកាត់បន្ថយនូវការផ្តឹងតវានៅពេលធ្វើការបិទផ្សាយទិន្នន័យក្បាល់ដី ។លោកបានបញ្ជាក់ថា ដើមី្បជៀសវាងនូវ ភាពយឺតយ៉ាវក្នុងការចេញប័ណ្ណកម្មសិទ្ធិដីធ្លីជូនប្រជាពលរដ្ឋ ។
លោកបន្តទៀតថា ក្រុមវាល ពេលចុះធ្វើការវាស់វែង ចាំ បាច់ត្រូវមានមន្ទីរពាក់ពាន័្ធចូលរួម ដោយតំបន់មួយចំនួននឹងប៉ះពាល់ទីបុរាណដ្ឋាន ស្ទឹង បឹង អូរ ប្រឡាយជាដើម ។ ក្នុងនោះដែរ លោកក៏បានណែនាំដល់អាជ្ញាធរក្រុង ស្រុក និង ការិយាល័យភូមិបាល ក្នុងពេលធ្វើប្លង់គោល ត្រូវកំណត់ឲ្យបាន ច្បាស់នៅ លើផែនទី ភូមិសាស្ត្រនៃមូលដ្ឋានខ្លួន ដោយកំណត់ពីទំហំផ្លូវ ថ្នល់ អូរ ប្រឡាយ ឬ ក៏ផ្លូវ អូរ ប្រឡាយ ស្រះ មួយចំនួនត្រូវប្តូរប្រភេទប្រឡាយ និង កំណត់ជាអាង ស្តុបទឹកកខ្វក់ ដែលឃុំ ស្រុករៀបចំទុកជាមុន ។
ដើមី្បឲ្យកិច្ចដំណើការចុះបញ្ជីដីធ្លីបានលឿន លោកក៏បានក្រើនរំលឹកដល់មន្ទីរជំនាញ និងមន្ទីរពាក់ព័ន្ធ ក៏ដូចអាជ្ញាធរមូលដ្ឋាន ក្នុងការគ្រប់គ្រងឲ្យបាននូវហេដ្ឋារចនា សម្ព័ន្ធ និង គ្រប់គ្រងប្រភេទដីធ្លី (ដីលំនៅដ្ឋាន និងដីស្រែចំការ ) ឲ្យបានច្បាស់លាស់ ។
លោក ហែន ពុទ្ធី បានបន្តទៀតថា ក្នុងកិច្ចការងារនេះ រដ្ឋបាលខេត្ត និងមន្ទីរជំនាញបានកសាងនូវផែនទី ៣ប្រភេទ គឺផែនទីព្រំប្រទល់ , ផែនទីហេដ្ឋារចនាសម្ព័ន្ធ , ផែនទីប្រើប្រាស់ដីធី្ល ដោយត្រូវបានកំណត់ច្បាស់លាស់នូវទីប្រជុំជន ជាតំបន់លំនៅដ្ឋាន និង ជម្រកព្រៃឈើ ដើមី្បលើកនូវផែនការអភិវឌ្ឍន៍មូល ដ្ឋាន ។
ក្នុងនោះលោកបានសំណូមពរដល់មន្ទីរ ពាក់ព័ន្ធទាំងអស់សូមជួយធ្វើការសម្របសម្រួល និងផ្តល់ទិន្នន័យ បែបបច្ចេកទេស ក្នុងការពន្លឿន លើការវាស់វែងដីធ្លី ជាលក្ខណៈប្រព័ន្ធនេះ បានដំណើការទៅដោយរលូន ។
ក្នុងនោះដែរលោក ហ៊ី សាយ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត បានធ្វើបទបង្ហាញ ស្តីពីកិច្ចដំណើរការចុះបញ្ជីដីធ្លីមានលក្ខណៈជាប្រព័ន្ធ និងផែនការចុះបញ្ជីដីធ្លីមានលក្ខណៈជាប្រព័ន្ធនៅក្រុង ស្រុក ព្រម ទាំងការបែង ចែកក្រុមការងារតាមស្រុកគោលដៅ ។ ក្នុងនោះដែរក៏បង្ហាញ ពីកិច្ចដំណើរការកសាងផែនទីទាំង៣ប្រភេទ ផែនទីព្រំប្រទល់ , ផែនទីហេដ្ឋារចនាសម្ព័ន្ធ , ផែនទីប្រើប្រាស់ដីធី្លផងដែរ ៕
ដោយ ÷ ពន្លឺ
