គម្រោងជួសជុលផ្លូវគ្រួសក្រហមពីរខ្សែ ក្នុងឃុំស្ពានត្នោត បញ្ចប់ការដេញថ្លៃជាស្ថាពរ ខណៈមន្ត្រីជំនាញណែនាំឲ្យអ្នកម៉ៅកាអនុវត្តការងារឲ្យស្របតាមស្តង់ដា

ខេត្តសៀមរាប ÷ គម្រោងជួសជុលផ្លូវដីសក្រាលគ្រួសក្រហម ចំនួន២ខ្សែ ដែលស្ថិតនៅក្នុងឃុំស្ពានត្នោត ស្រុកជីក្រែង ខេត្តសៀមរាប ដែលជាការចំណាយរបស់គម្រោងមូលនិធិឃុំឆ្នាំ២០២៣ បានបញ្ចប់ការ ដេញថ្លៃជាស្ថាពរ នៅថ្ងៃទី១៩ ខែកញ្ញា ឆ្នាំ២០២៣ នេះ ជាមួយតម្លៃដេញថ្លៃជាង ៥០លានរៀល។

លោក ង៉ោ ពង្សទិត្យសុវណ្ណៈ ប្រធានគណៈកម្មការលទ្ធកម្មឃុំស្ពានត្នោត បានឲ្យដឹងថា គម្រោងដែលបានបញ្ចប់ការដេញថ្លៃនេះ គឺធ្វើការជួសជុលផ្លូវដីស ក្រាលក្រួសក្រហម ២ខ្សែ មានប្រវែង ១.៣៣៦ម៉ែត្រ ទទឹង ៥ម៉ែត្រ ជើងទេផ្លូវ ១.៥ម៉ែត្រ កម្រាស់គ្រួសក្រហម ០.១៥ម៉ែត្រ សាងសង់លូមូលកាត់ផ្លូវមុខកាត់ ០.៨ម៉ែត្រ ប្រវែង ៦ម៉ែត្រ ចំនួន៣កន្លែង ដាក់លូការ ពារផ្លូវមុខកាត់ ០.៨ម៉ែត្រ ចំនួន៤កង់ និងស្លាកសញ្ញាគម្រោងចំនួន១កន្លែង។ គម្រោងនេះក្នុងតម្លៃប៉ាន់ស្មាន ១០៦.៨៩៥.៤៣០រៀល ជាលទ្ធផលបានទៅលើក្រុមហ៊ុន ឯក គង់ ក្នុងតម្លៃ ៥០.៦៨៣.០០០ រៀល។

ក្នុងឱកាសនោះដែរ លោក ប៊ិន រដ្ឋ អនុប្រធានការិយាល័យគាំទ្រទីចាត់ការផែនការ និងវិនិយោគខេត្តសៀមរាប បានណែនាំដល់ម្ចាស់ក្រុមហ៊ុនម៉ៅការ គឺត្រូវអនុវត្តការងារជួសជុលឲ្យស្របទៅតាមស្តង់ដា និងបទដ្ឋានបច្ចេកទេស ទោះស្ថិតនៅក្នុងតម្លៃប៉ុន្មានក៏ដោយ។ ជាមួយនោះក្រុមហ៊ុន និងអាជ្ញាធរឃុំត្រូវមានទំនាក់ទំនង និងចុះពិនិត្យតាមដានជាប្រចាំទៅលើការងារនេះ ហើយប្រសិនបើមានបញ្ហាផ្សេងៗ ត្រូវទាក់ទងបន្ទាន់ទៅក្រុមការងារបច្ចេកទេសស្រុក ឬខេត្ត ដើម្បីដោះស្រាយឲ្យបានទាន់ពេលវេលា។ ជាពិសេសបញ្ហាមួយទៀតនោះ ទាក់ទងនឹងបណ្ដាផ្សព្វផ្សាយដែលបានផ្សព្វផ្សាយពីបញ្ហាផ្លូវមួយចំនួនទៅលើបញ្ហាផ្លូវខ្លះបានបញ្ចប់គម្រោងដេញថ្លៃហើយមិនទាន់សាងសង់ ដូចនេះសុំឲ្យអាជ្ញាធរ និងអ្នកម៉ៅការសហការផ្សព្វផ្សាយឲ្យបានទាន់ពេលវេលាជូនប្រជាពលរដ្ឋក្នុងមូលដ្ឋានពីមូលហេតុនេះការមិនទាន់អនុវត្ត ដើម្បី ឲ្យពួកគាត់បានយល់ពីការងារនេះ។

ជាមួយគ្នានោះផងដែរម្ចាស់ក្រុមហ៊ុនដែលទទួលបានការម៉ៅការគម្រោងផ្លូវខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋាន ដើម្បីឲ្យការអនុវត្តការងារជួសជុលនេះបានឆាប់រួចរាល់ និងស្របទៅតាមស្តង់ដាផងដែរ៕

ដោយ ÷ ពន្លឺ