ក្រុមប្រឹក្សាខេត្តសៀមរាបបើកកិច្ចប្រជុំសាមញ្ញលើកទី៥២ឆ្នាំទី៥ជាឆ្នាំចុងក្រោយនៃអាណត្តិទី៣

ខេត្តសៀមរាប ÷ ក្រុមប្រឹក្សាខេត្តសៀមរាប អាណត្តិ ទី៣ បានបើកកិច្ចប្រជុំសាមញ្ញលើកទី៥២ ឆ្នាំទី៥ ជាឆ្នាំចុងក្រោយនៃអាណត្តិទី៣ នៅសាលប្រជុំសាលាខេត្តសៀមរាប នាព្រឹកថ្ងៃទី១៤ ខែ កញ្ញា ឆ្នាំ២០២៣ ក្រោមកិច្ចដឹកនាំរបស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង លោក នាក់ ណេរ៉ុន អភិបាលរងនៃគណៈអភិបាលខេត្ត ព្រមទាំងមានការអញ្ជើញចូលរួម ពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត តំណាងអាជ្ញាធរអប្សារា គ្រឹះស្ថានអង្គរ និង លោក លោកស្រី អាជ្ញាធរក្រុង-ស្រុក ថ្នាក់ដឹកនាំមន្ទីរ-អង្គភាព លោកនាយក នាយករងរដ្ឋបាល នាយក-នាយករងទីចាត់ការ អង្គភាពនានាជុំវិញខេត្តចូលរួមផងដែរ ។

តាមរយៈការពិនិត្យនិងពិភាក្សាលើសេចក្ដីព្រាងរបាយការណ៍ប្រចាំខែសីហា ឆ្នាំ២០២៣ ស្តីពីការអនុវត្តការងាររបស់រដ្ឋបាលខេត្តសៀមរាប សមាជិកនៃកិច្ចប្រជុំ ក៏បានលើនូវករណីពាក់ព័ន្ធមួយចំនួន អំពីការអនុវត្តគោនយោបាយភូមិឃុំ សង្កាត់មានសុវត្ថិភាព ,បញ្ហាផ្លូវថ្នល់ក្នុងក្រុង ភ្លើងបំភ្លឺផ្លូវសាធារណៈ, បញ្ហាសិស្ស គេចសាលា មកផ្តុំគ្នាជក់បារីអេឡិចត្រូនិច , ការកំណត់តំបន់បរិស្ថាននៅក្នុងតំបន់អប្សរា , បញ្ហាការផ្តល់ប័ណ្ណកម្មសិទ្ធិដីធ្លី មានការយឺតយ៉ាវ ,បញ្ហាកកស្ទះប្រព័ន្ធប្រឡាយធ្វើឲ្យទឹកលិចផ្លូវនៅពេលភ្លៀងធ្លាក់ ,បញ្ហាកង្វះ នូវសៀវភៅគ្រួសារ , ព្រមទាំងអនាម័យម្ហូបអាហារនៅតំបន់ទេសចរណ៍សហគមន៍ ។ មន្ត្រីជំនាញ អង្គភាព មន្ទីរ ពាក់ពន្ធ័ បានធ្វើការបំភ្លឺជូនដល់កិច្ចប្រជុំជាបន្តបន្ទាប់រួចមកទើបបានអនុម័តដោយការលើកដៃទៅលើពង្រាងរបាយការណ៍ប្រចាំខែសីហា ឆ្នាំ២០២៣របស់រដ្ឋបាលខេត្តសៀមរាប ។

លោក នាក់ ណេរ៉ុន បានជម្រុញដល់ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក និង អង្គភាព ចំណុះសាលាខេត្ត ត្រូវបង្កើនការយកចិត្តទុកដាក់ ពង្រឹងការងារសន្តិសុខ សណ្តាប់ធ្នាប់សាធារណៈ បញ្ហាអនាម័យ បរិស្ថាន តាមក្រុង ស្រុក និង បានក្រើនរំលឹកដល់អាជ្ញាធរក្រុង ស្រុក ត្រូវអនុវត្តឲ្យមានប្រសិទ្ឋិភាពនូវការណែនាំរបស់សម្តេចធិបតី នាយករដ្ឋមន្ត្រី សូមឲ្យផ្អាក់នូវសេវា មួយចំនួន នៅតាមច្រកចេញចូលតែមួយ សំខាន់លើសេវាអាជីវកម្មក្រៅប្រព័ន្ធ ។

ថ្លែងបូកសរុបបិទកិច្ចប្រជុំ ឯកឧត្តម អ៊ាន ឃុន មានប្រសាសន៍ថា តាមរយៈកិច្ចប្រជុំនេះ បានឆ្លុះបញ្ចាំងនូវមតិយោបល់ល្អៗ ប្រកបដោយ ក្រមសីលធម៌វិជ្ជាជីវៈ ពីសំណាក់ឯកឧត្តម លោកជំទាវសមាជិក សមាជិកា លោក លោកស្រីជាថ្នាក់ដឹកនាំមន្ទីរអង្គភាពពាក់ព័ន្ធ ទាំងអស់បានបង្ហាញឲ្យឃើញថា ដំណើរការនៃកិច្ចប្រជុំសាមញ្ញលើកទី៥២របស់ក្រុមប្រឹក្សាខេត្ត ប្រព្រឹត្តទៅតាមលំដាប់លំដោយ និង ទទួលបានលទ្ធផលល្អតាមការគ្រោងទុក ។

ឯកឧត្តមបានបញ្ជាក់ថា ក្រោយការបង្កើតនូវរាជរដ្ឋាភិបាល នីតិកាលទី៧ រដ្ឋបាលខេត្តសៀមរាបបានអនុវត្តកិច្ចការសំខាន់ៗ លើកការងារសន្តិសុខ សណ្តាប់ ធ្នាប់សាធារណៈ ការគ្រប់គ្រងគ្រោះមហន្តរាយ ដោយខ្យល់កន្ទ្រាក់ ជំនន់ទឹកភ្លៀង ដោយគណៈអភិបាលខេត្ត មន្ត្រីពាក់ព័ន្ធ បានចុះផ្ទាល់ដល់មូលដ្ឋាន និង ដោះស្រាយបានទាន់ពេលវេលាដល់គ្រួសារជួបការលំបាក និងងាយរងគ្រោះផងដែរ ។

ក្នុងនោះឯកឧត្តមបានលើកឡើងថា គ្រប់កាលៈទេសៈដែលប្រជាពលរដ្ឋជួបការលំបាក អាជ្ញាធរខេត្តបានយកចិត្តទុកដាក់ក្នុងការដោះស្រាយរាល់បញ្ហាដែលបានលើកឡើង ព្រោះបញ្ហាទាំងនេះ គឺ ជាបញ្ហារបស់ប្រជាពលរដ្ឋដែលតែងតែលើកឡើងជាអន្លើៗ និងបានដោះស្រាយប្រកបដោយប្រសិទ្ធភាព មានសាមគ្គីភាពផ្ទៃក្នុង និង មានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និង វិសហមជ្ឈការ នៅរដ្ឋបាលថ្នាក់ក្រោមជាតិ ។ ជាមួយនោះដែរ រដ្ឋបាលខេត្តត្រៀមរៀបចំវេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ដែលត្រូវអនុវត្តនៅត្រីមាសទី៤ នៃឆ្នាំ២០២៣។

ជាមួយនេះ រដ្ឋបាលខេត្ត នឹង ត្រៀមរៀបចំការបោះឆ្នោតជ្រើសរើស ប្រធាន អនុប្រធានការិយាល័យប្រជាពលរដ្ឋ របស់រដ្ឋបាលខេត្ត ដែលត្រូវបោះឆ្នោតជ្រើសរើសជាថ្មីតាមរយៈគណៈកម្មាធិការសម្រាប់រយៈពេល៥ឆ្នាំបន្ត ក្នុងត្រីមាសទី៤ ឆ្នាំ២០២៣នេះ ។

ក្នុងកិច្ចប្រជុំសាមញ្ញលើកទី៥២ របស់ក្រុមប្រឹក្សាខេត្ត អាណត្តិទី៣នេះ ក៏មានបើកកិច្ចប្រជុំពិនិត្យ និង ពិភាក្សា អនុម័តលើការតែងតាំងមន្ត្រីរាជការស៊ីវិល ក្នុងរចនាសម្ព័ន្ធរដ្ឋបាលខេត្ត និងរដ្ឋបាលស្រុក (ជាលក្ខខណៈសម្ងាត់) ផងដែរ ៕

ដោយ ÷ ពន្លឺ